ރާއްޖޭގައި ހިއްކާފައިވާ ބިންތަކުގައި ފެނާއި ކަރަންޓު އަދި ނަރުދަމާގެ ޚިދުމަތްތައް ގާއިމްކުރުމަށް ބަޖެޓުން ހަރަދު ނުކޮށް އެހެން ގޮތަކަށް ފައިނޭންސް ހޯދުމުގެ މަސައްކަތް ކުރަނީ
18 ޖޫން 2025 | ބުދަ 06:542010 ވަނަ އަހަރުން ފެށިގެން ހިއްކާފައި ހުރި ބިންތަކުގައި ވެސް ފެނާއި، ކަރަންޓު އަދި ނަރުދަމާ ގާއިމް ކުރެވިފައިނުވޭ
ރައްޔިތުންގެ މަޖިލީހުގައި ހައުސިންގ މިނިސްޓަރު ޑރ. އަބްދުﷲ މުއްތަލިބު ވާހަކަދައްކަވަނީ
ދިވެހިރާއްޖޭގައި ހިއްކާފައިވާ ބިންތަކުގައި ފެނާއި ކަރަންޓު އަދި ނަރުދަމާގެ ޚިދުމަތްތައް ގާއިމްކުރުމަށް ބަޖެޓުން ހަރަދު ނުކޮށް އެހެން ގޮތަކަށް ފައިނޭންސް ހޯދައިގެން މަސައްކަތް ކުރިއަށް ގެންދެވޭތޯ ބަލާ ކަމަށް ކޮންސްޓްރަކްޝަން އެންޑް ހައުސިންގ މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
ބުދަ ދުވަހު ރައްޔިތުން މަޖިލީހުގެ ޖަލްސާގައި ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ކުރެއްވި ސުވާލަށް ޖަވާބު ދެއްވަމުން މިނިސްޓަރު މުއްތަލިބު ވިދާޅުވީ ރާއްޖޭގައި ވަރަށް ގިނަ ސަރަހައްދުތަކުގައި ބިންތައް ހިއްކާފައިވާ ކަމަށާއި، 2010 ވަނަ އަހަރުން ފެށިގެން ހިއްކާފައި ހުރި ބިންތަކުގައި ވެސް ފެނާއި، ކަރަންޓު އަދި ނަރުދަމާ ގާއިމް ކުރެވިފައިނުވާ ކަމަށެވެ.
މިނިސްޓަރު މުއްތަލިބު ވިދާޅުވީ ވަރަށް ބޮޑެތި ބިންތަކެއްވާއިރު، އެބިންތަކުގައި މީހުން އާބާދު ކުރުމަށް ޚިދުމަތްތައް ގާއިމްކުރަންޖެހޭ ކަމަށެވެ. ފެނާއި ކަރަންޓު އަދި ނަރުދަމާ ގާއިމްކުރުމަށް ދައުލަތުގެ ބަޖެޓުން ހަރަދު ކުރުމުގެ ބަދަލުގައި، ކޮންޓްރެކްޓް ފައިނޭންސް އުސޫލުން ނުވަތަ ލޯނު ފައިނޭންސް އުސޫލުން ކުރިއަށް ގެންދެވޭނެ ކަހަލަ މެކޭނިޒާމެއްގެ ތެރެއިން ބަޔަކު ހޯދައިގެން ކުރިއަށް ގެންދެވޭތޯ މަސައްކަތް ކުރާ ކަމަށް މިނިސްޓަރު މުއްތަލިބު ވިދާޅުވިއެވެ.
އެހެންވީމަ އަޅުގަނޑުމެން މިހާރު އިންނާނެ ހަގީގަތުގައި ބަޖެޓުގައި އެއް ޕްރޮޖެކްޓެއްގެ ގޮތުގައި އެފަދަ ތަންތަނުގައި މަޝްރޫއުތައް ކުރިއަށް ގެންދެވޭނެ ގޮތަކަށް ހިމަނާފައި. އެހެންނަމަވެސް މިދަންވަނީ ވަރަށް ބޮޑެތި ބިންތަކުގެ ވާހަކަ. ތިނަދޫގައި ވެސް އެއީ 50 ހެކްޓަރުގެ ބިން، އެހާ ބޮޑު އިންވެސްޓްމަންޓެއް ކުރަން ބަލާއިރު، ދައުލަތުގެ ބަޖެޓުން ހަރަދު ކުރުމުގެ ބަދަލުގައި ކޮންޓްރެކްޓް ފައިނޭންސް އުސޫލުން ނޫނީ ލޯނު ފައިނޭންސް އުސޫލުން ކުރިއަށް ގެންދެވޭނެ ކަހަލަ މެކޭނިޒާމެއްގެ ތެރެއިން ބަޔަކު ހޯދައިގެން ކުރިއަށް ގެންދެވޭތޯ އަޅުގަނޑުމެން މަސައްކަތް ކުރަމުން މިގެންދަނީ. މިދަންނަވަނީ އެންމެ ރަށެއް ދެރަށެއްގެ ވާހަކައެއް ނޫން. އައްޑޫ އަތޮޅުގެ ހުރިހާ ބިންތަކެއް. ތިނަދޫ އޭދަފުށި މިހުރިހާތަނެއް ހުރީ މިކަހަލަ ގޮތަކަށް. ހަގީގަތުގައި އެތަންތަނަށް ހައްލެއް ހޯދައިދީ އާބާދުކުރެވޭނެ ގޮތެއް ހޯދުމަށްޓަކައި ސަރުކާރުން އަމިއްލަ ފަރާތްތަކާ ގުޅިގެން ކުރިއަށް ގެންދެވޭނެ ފައިނޭންސް ކުރެވޭނެ އޮޕްޝަނެއް ލިބޭތޯ ބަޖެޓުގައި އެގޮތަށް ހިމަނާފައި އޮތީ. އެހެންވީމަ އެގޮތަށް އަޅުގަނޑުމެންނަށް ޕާޓީ ލިބޭހާ އަވަހަށް މިދެންނެވި ރަށްރަށުގައި މަސައްކަތް އެލިބޭ ތަރުތީބަކުން ކުރިއަށް ގެންދެވޭނެ ވާހަކަ ދަންނަވަން.ކޮންސްޓްރަކްޝަން އެންޑް ހައުސިންގ މިނިސްޓަރު ޑރ. އަބްދުﷲ މުއްތަލިބު
ކުރީ ސަރުކާރުގައި ބިމުގެ ދަތިކަން ކުރިމަތިވެފައިވާ ގިނަ ރަށްތަކެއްގެ ބިންތައް ވަނީ ހިއްކާފައެވެ. ތަރައްގީގެ ޕްލޭން އެކުލަވާލައި ފައިނަލް ކުރި ނަމަވެސް އެޕްލޭންތަކަށް މިސަރުކާރުން ނުބަލާ ކަމަށް އެރަށްރަށުގެ ކައުންސިލްތަކުން ދަނީ ބުނަމުންނެވެ.
ރާއްޖޭގެ އެކި ސަރަހައްދުތަކުގައި ހިމެނޭ ރަށްތަކުގެ ބިންތައް ހިއްކާފައިވާއިރު، އެ ބިންތައް ތަރައްގީ ކުރުމަށް ފައިނޭންސް މިހާތަނަށް ލިބިފައިނުވާކަން މިނިސްޓަރު މުއްތަލިބު ދެއްކިވާހަކަތަކުން ހާމަވެއެވެ. އަދި މި ބިންތަކުގައި އަމަލީ މަސައްކަތްތައް ފެށޭނެ ދުވަހެއް ވިދާޅެއް ނުވެއެވެ.
ރައީސް މުއިއްޒުގެ މި ސަރުކާރަށް ދޮޅު އަހަރުވެގެންދާއިރު، ތަރައްގީގެ އެއްވެސް މަޝްރޫއެއް ކުރިއަށް ނުގެންދާތީ ގިނަ ރައްޔިތުންގެ ފާޑު ކިޔުން ސަރުކާރަށް ވަނީ އަމާޒުވެފައެވެ. އަދި ކުރީ ސަރުކާރުގައި ފެށި ތަރައްގީގެ މަޝްރޫއުތައް ވެސް ވަނީ މިސަރުކާރު އައުމާއެކު ހުއްޓިފައެވެ.
