ސިޔާސީ ނުފޫޒާއެކު ފޯކައިދޫ ސްކޫލުގެ އިނާމު ދިނުމުގެ ޖަލްސާ ފަސްކުރިކަމުގެ ތުހުމަތު، އެންމެ މޮޅު ދަރިވަރުންގެ ލިސްޓު ވެސް ރިވިއު ކުރަނީ
15 ޖޫން 2025 | އާދީއްތަ 08:27މިދިޔަ އަހަރުގެ އެންމެ މޮޅު ދެ ދަރިވަރުންނަށް ސްކޫލުގެ ފަރާތުން އެކަން އެންގުމުން ޖަލްސާއަށް ވަރަށް ބޮޑަށް ތައްޔާރުވި
ފޯކައިދޫ ސްކޫލު
ށ. ފޯކައިދޫ ސްކޫލުން ހޮވާ އެންމެ މޮޅު ދަރިވަރުންގެ ލިސްޓު ބަދަލު ކުރުމަށް އިނާމު ދިނުމުގެ ޖަލްސާ ކުއްލި ގޮތަކަށް ފަސްކޮށްފިއެވެ.
ރާއްޖެއެމްވީއަށް އެރަށު ސްކޫލުގެ ބެލެނިވެރިއެއް ބުނީ، ކޮންމެ އަހަރަކު ވެސް އިނާމު ދިނުމުގެ ޖަލްސާއަށް އެރަށުގެ ސްކޫލުގެ ދަރިވަރުންނާ ބެލެނިވެރިން ވަރަށް ބޮޑަށް ތައްޔާރުވާ ކަމަށާއި، ގިނަ ބަޔަކު އެ ޖަލްސާއަކަށް އިންތިޒާރު ކުރާ ކަމަށެވެ.
އެގޮތުން އެހެން އަހަރުތަކުގައި ވެސް އަމަލުކުރާ ގޮތަށް، މި އަހަރު ވެސް މިދިޔަ އަހަރުގެ އެންމެ މޮޅު ދެ ދަރިވަރުންނަށް ސްކޫލުގެ ފަރާތުން އެކަން އެންގުމުން އިނާމު ދިނުމުގެ ޖަލްސާއަށް ވަރަށް ބޮޑަށް ތައްޔާރުވި ކަމަށެވެ. އެ ޖަލްސާގައި ވާހަކަ ދެއްކުމަށް ސްޕީޗް ލިޔެ، ވާހަކަ ދެއްކުމަށް ވަރަށް ބޮޑަށް ފަރިތަކުރި ކަމަށް އެ ބެލެނިވެރިޔާ ބުންޏެވެ.
އެންމެ މޮޅު ދެ ދަރިވަރުންގެ ގޮތުގައި ހޮވިފައިވަނީ އޯލަވަލް ޓޮޕްޓެންއަށް ދިޔަ ދަރިވަރެކެވެ. އަނެއް ދަރިވަރަކީ އޭ ލަވަލްގައި ޓޮޕްޓެންއަށް ކުއްޖެކެވެ.
ނަމަވެސް ކުއްލިއަކަށް ނުހޮވޭކަން އަންގައި، ޖަލްސާ ފަސްކޮށްފައިވާ ކަމަށް އެ ބެލެނިވެރިޔާ ބުންޏެވެ. ކުއްލިއަކަށް ވަކި ގަވާއިދެއްގެ ދަށުން ދެވަނަ ފަހަރަށް އެންމެ މޮޅު ދަރިވަރުން ހޮވުމަށް މާކްސްދީފައިވާ ގޮތް ރިވިއު ކުރާ ކަމަށް ސްކޫލުގެ ފަރާތުން ބުނި ނަމަވެސް މީގެ ކުރިން އެގަވާއިދެއް ނޭނގޭ ކަމަށް އެ ބެލެނިވެރިޔާ ބުނެފައިވެއެވެ.
މިއީ ސިޔާސީ ގޮތުންއައި ކުއްލި ނުފޫޒެއް ކަމަށާއި، ވަކި ބައެއްގެ ދަރިންނަށް ވަނަ ދިނުމުގެ ގޮތުން ގެނައި ބަދަލެއް ކަމަށް ވެސް އެ ބެލެނިވެރިޔާ ތުހުމަތުކޮށްފައިވެއެވެ. އަދި އާދައިގެ ރައްޔިތު މީހާގެ ދަރިފުޅަކީ މޮޅަށް ކިޔައިވައި ނަތީޖާ ނެރުނު ދަރިވަރެއް ނަމަވެސް ސިޔާސީ ނުފޫޒާއެކު، އެ ހައްގުން މަހުރޫމް ކުރީ ކަމަށް އޭނާ ބުނެފައިވެއެވެ.
މި މައްސަލައާ ގުޅިގެން ފަށާއިރު ޕްރޮގްރާމުން އެރަށުގެ ސްކޫލަށް ގުޅުމުން މައުލޫމާތު ދިން އިސް ބޭފުޅެއް ވިދާޅުވީ އިނާމު ދިނުމުގެ ޖަލްސާ ފަސްކޮށްފައިވާ ކަަމަށެވެ. އެއީ ބެލެނިވެރިން ހުށަހެޅި ޝަކުވާއަކާ ގުޅިގެން އެޑިޔުކޭޝަން މިނިސްޓްރީން އެގޮތަށް އެންގުމުން ކަމަށް އެބޭފުޅާ ވިދާޅުވިއެވެ. އަދި ވިދާޅުވީ ރިވިއު ކުރުމަށް އަންގައި، ޝަކުވާ ހުށަހަޅާފައިވަނީ 1 ޖޫން 2025 ގައި ކަމަށެވެ.
އެބޭފުޅާ ވިދާޅުވީ ސްކޫލުގެ އެންމެ މޮޅު ދަރިވަރުން ހޮވުމަށް އަލުން ރިވިއު ކުރަމުންދާ ކަމަށާއި، އަދި އެލިސްޓް އާއްމުނުކުރާ ކަމަށެވެ. އަދި ގަވާއިދާ އެއްގޮތަށް ރިވިއު ކުރުމަށްފަހު އެންމެ މަތިން މާކްސް ލިބޭ ދަރިވަރަކަށް ހައްގު ވަނަ ދޭނެ ކަމަށާއި، ވަކި ދަރިވަރަކު ހޮވުމަށް މަސައްކަތް ނުކުރާ ކަމަށެވެ.
އެޑިޔުކޭޝަނުން އެންގީ. ބެލެނިވެރިންގެ ޝަކުވާއަކާ ގުޅިގެން ރިވިއު ކުރަން އެންގީ. ކުރިން އެއްވެސް ކުއްޖަކަށް ނުދޭ ގޮތަކަށް ނޫން އެ ރިވިއު ކޮށްފައި. އެ މިސްޓޭކެއް ރަނގަޅުކުރީމަ އެ ހޮވޭ ކުއްޖަކަށް ލިބޭނެ. ކުރިން ހޮވިއިރުގައި ވެސް ގަވާއިދަށް ހޮވާފައި އިންނާނީ. އެކަމަކު ފޯމިއުލަރގައި މިސްޓޭކެއް އިން ކަމަށް ބެލެނިވެރިންގެ ފަރާތުން ޝަކުވާ ކޮށްފައި އޮތީ. އިންސާނުންވީމަ މިސްޓޭކެއް ޖެހިދާނެއްނުންތޯ.ފޯކައިދީ ސްކޫލުގެ އިސް ބޭފުޅެއް
ފޯކައިދޫ ސްކޫލުގައި އިނާމު ދިނުމުގެ ޖަލްސާ ބޭއްވުމަށް ފުރަތަމަ ނިންމާފައިވަނީ 4 ޖޫން 2025 ގައެވެ. އަދި ޖަލްސާ ފަސް ކުރުމަށް އަންގާފައިވަނީ 1 ޖޫން 2025 ގައެވެ.
