އާދީއްތަ ދުވަހު ބާއްވަން ހަމަޖެހިފައި އޮތް އީރާން އާއި އެމެރިކާގެ މަޝްވަރާ ބައްދަލުވުން ކެންސަލް ކޮށްފި

އީރާނާއި އެމެރިކާއާ ދެމެދު ކުރިއަށް ގެންދަމުން އަންނަ ނިއުކްލިއާ މަޝްވަރާތަކުގެ ހަ ވަނަ ބުރުގެ ބައްދަލުވުން އާދީއްތަ ދުވަހަށް ތާވަލުކޮށްފައި އޮތް ނަމަވެސް، އެ ބައްދަލުވުން ކެންސަލް ކޮށްފި އެވެ.

އާދީއްތަ ދުވަހު ބާއްވަން ހަމަޖެހިފައިވާ ހަ ވަނަ ބުރުގެ މަޝްވަރާ ބައްދަލުވުން ކެންސަލް ކޮށްފައި ވަނީ، އީރާނާއި އިސްރާއީލާ ދެމެދު މިހާރު ވަރުގަދަ ހަމަލާ ބަދަލު ކުރުންތަކެއް ކުރިއަށް ދަނިކޮށެވެ. އެ ބައްދަލުވުން ކެންސަލް ކޮށްފައިވާކަން ހާމަ ކުރެއްވީ، މަޝްވަރާ ތަކުގެ މެދުވެރިއެއްގެ ދައުރު އަދާ ކުރަމުން އަންނަ އޮމާންގެ ޚާރިޖީ ވަޒީރު ބަދުރު އަލް ބުސައިދީ އެވެ.

އޮމާންގެ ޚާރިޖީ ވަޒީރު ބަދުރު އަލް ބުސައިދީ އޭނާގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްްގައި ވިދާޅުވެފައި ވަނީ، އާދިއްތަ ދުވަހު އޮމާންގެ ވެރި ރަށް މުސްކަޓް ގައި ބޭއްވުމަށް ހަމަޖެހިފައި އޮތް މަޝްވަރާ ބައްދަލުވުން މިހާރު ނޯންނާނެ ކަމަށެވެ. އިތުރަށް އޭނާ ވިދާޅުވީ، ދެމެހެއްޓެނިވި ސުލްޙަވެރި ކަމަކަށް ވާސިލު ވެވޭނެ ހަމައެކަނި މަގަކީ ޑިޕްލޮމަސީ އާއި މަޝްވަރާގެ ތެރެއިން ކަމަށެވެ. 

އީރާނާއި އެމެރިކާއާ ދެމެދު ނިއުކްލިއާ މަޝްވަރާތައް ފެށުނީ މިއަހަރުގެ އެޕްރީލް މަހުގެ ތެރޭގަ އެވެ. އޭގެ ފަހުން މިހާތަނަށް ފަސް ބައްދަލުވުމެއް ބާއްވާފައިވާއިރު، އެންމެ ފަހުގެ ބައްދަލުވުން އޮތީ އިޓަލީގެ ވެރި ރަށް ރޯމްގަ އެވެ. އެ މަޝްވަރާތަކުގައި ދެ ޤައުމުގެ ވެސް އިސްވެރިން ވަނީ ބައިވެރިވެ ވަޑައިގެންފަ އެވެ.

އީރާނާއި އެމެރިކާއާ ދެމެދު ނިއުކްލިއާ މަޝްވަރާތައް ކުރިއަށް ގެންދަމުން އަންނައިރު، މައިގަނޑު ގޮތެއްގައި ޚިޔާލު ތަފާތުވެ، މައްސަލަ ދިމާވެގެން އުޅެނީ ޔުރޭނިއަމް ފައްކާ ކުރުމުގެ މަސައްކަތާ މެދު އެވެ. އެމެރިކާ އާއި އިސްރާއީލްގެ އިތުރުން، ހުޅަނގުގެ ޤައުމުތަކުން ތުހުމަތު ކުރަމުން އަންނަ ގޮތުގައި އީރާނުން މަސައްކަތް ކުރަނީ ނިއުކްލިއާ ހަތިޔާރު އުފެއްދުމަށެވެ.

އެހެން ނަމަވެސް، އީރާނުން އަންނަނީ އެ ތުހުމަތުތަކާ ދެކޮޅު ހަދަމުންނެވެ. އީރާނުން ބުނަމުން އަންނަނީ އެެއީ އެ ޤައުމަށް ލިބިގެންދާ ހައްގެއް ކަމަށާއި، އެކަމާ ދެކޮޅަށް ހުށަހަޅާ އެއްވެސް ޝަރުތަކަށް އެ ޤައުމުން އެއްބަސް ނުވާނެ ކަމަށެވެ.