އިސްރާއީލަށް އަމާޒުކޮށް އީރާނުން ހޮނިހިރު ދުވަހު ވެސް ހަމަލާތަކެއް ދީފި

އީރާނަށް އަމާޒުކޮށް އިސްރާއީލް އިން ދިން ހަމަލާތަކާ ގުޅިގެން، އެކަމުގެ ބަދަލެއްގެ ގޮތުގައި އީރާނުން ދެމުން އަންނަ ހަމަލާތަކުގައި، އިސްރާއީލަށް އަމާޒުކޮށް ހޮނިހިރު ދުވަހު ވެސް ހަމަލާތަކެއް ދީފައިވާ ކަމަށް އިސްރާއީލްގެ ދައުލަތުގެ މީޑިއާ އިން ހާމަކޮށްފި އެވެ.

އިސްރާއީލް އިން ވަނީ އީރާންގެ ނިއުކްލިއާ ފެސލިޓީތަކަށް އަމާޒުކޮށް ހަމަލާތަކެއް ދީފަ އެވެ. އެކަމުގެ ބަދަލެއްގެ ގޮތުގައި ހުކުރު ދުވަހު އީރާނުން ވަނީ އިސްރާއީލަށް ވަރުގަދަ އަދި ނުރައްކާތެރި ހަމަލާތަކެއް ދީފަ އެވެ.

އީރާނުން ވަނީ އިސްރާއީލަށް އަމާޒުކޮށް، "މިސައިލް ފުންޏެއް" އޮއްސާލައިފަ އެވެ. އެއާއެކު އިސްރާއީލްގެ ވެރި ރަށް ތެލް އަވީވްގައި ސައިރަންގެ އަޑުފަށްގަނޑު އިވިފައިވާއިރު، އިސްރާއީލްގެ ރައްޔިތުން ސަލާމަތްތެރިކަން ހޯދުމުގެ އިންޒާރު ވެސް ސަރުކާރުން ވަނީ ދީފަ އެވެ. އެ ހަމަލާތަކާ ގުޅިގެން އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވެސް، "އެހެން ސަރަހައްދަަކށް" ގެންގޮސްފައިވާ ކަމަށް ވަނީ ބުނެފަ އެވެ. 

އިސްރާއީލަށް ދެމުން އަންނަ ހަމަލާތަކާ ގުޅިގެން އީރާންގެ އިސް އޮފިޝަލަކު ބައެއް މީޑިއާ ތަކަށް ވިދާޅުވެފައި ވަނީ، އިސްރާއީލްގެ އެއްވެސް ސަރަހައްދެއްގައި ރައްކާތެރިކަމެއް ނޯންނާނެ ކަމަށެވެ. އަދި އިސްރާއީލްގެ ކިބައިން ބަދަލު ހިފާނެ ކަމަށާއި، އެކަން ވާނީ ވޭންދެނިވި ބަދަލު ހިފުމަކަށް ކަމަށް ވެސް ބުނެފައިވެ އެވެ. 

މީގެ އިތުރުން އިސްރާއީލް އިން އީރާނަށް ދިން ހަމަލާތަކުގައި އީރާންގެ އަސްކަރިއްޔާގެ އިސް ކޮމާންޑަރުންނާއި، ސައިސްޓިސްޓުން އަދި އާންމު ރައްޔިތުުން މެރުުމުގެ ސަބަބުން، އިސްރާއީލް އިން އެކަމުގައި ބޮަޑު އަގެއް އަދާ ކުރަން ޖެހޭނެ ކަމަށް ވެސް އޭނާ ބުނެފައިވެ އެވެ. 

އިސްރާއީލްގެ އަސްކަރިއްޔާ އިން ބުނެފައިވާ ގޮތުގައި ހޮނިހިރު ދުވަހުގެ ފަތިހު ވެސް އީރާނުން ވަނީ އިސްރާއީލަށް އަމާޒުކޮށް އައު ހަމަލާތަކެއް ދީފަ އެވެ. އެއީ "ހޮނެސްޓް ޕްރޮމިސް 3" ގެ ނަމުގައި އީރާނުން ކުރިއަށް ގެންދާ އޮޕަރޭޝަންގެ ދަށުން ދީފައިވާ ހަމަލާތަކެއް ކަމަށް ބުނެފައިވެ އެވެ. 

އެ ހަމަލާތަކާ ގުޅިގެން އިސްރާއީލްގެ އަސްކަރިއްޔާ އިން ބުނެފައި ވަނީ ހޮނިހިރު ދުވަހުގެ ފަތިހު 4:40 ގައި މިސައިލް ތަކެއް ފޮނުވާލާފައިވާ ކަމަށާއި، އެކަމާ ގުޅިގެން އިސްރާއީލްގެ ރައްޔިތުން ރައްކާތެރި ތަންތަނަށް ދިޔުމަށް އެންގިފައިވާ ކަމަށެވެ. އެ ހަމަލާތައް 10 މިނެޓު ވަންދެން ވަޒަން ކުރުމަށް ފަހު، ރައްކާތެެރި ތަންތަނުން ނިކުތުމުގެ ހުއްދަ ވަނީ ދީފަ އެވެ.