ގަވައިދާ ހިލާފަށް މާލޭގެ މަޖީދީ މަގުގައި ޕާކު ކުރާ ވެހިކަލްތައް ޓޯ ކުރާނެ ކަމަށް ފުލުހުން ބުނެފިއެވެ.

ފުލުހުން ބުނީ، މަޖީދީ މަގުގައި އާންމު ދަތުރުފަތުރާއި ޕަބްލިކް ޓްރާންސްޕޯޓަށް ދަތިވާގޮތަށް ގަވައިދާ ހިލާފަށް ޕާކުކޮށްފައި ހުންނަ އުޅަނދުތައް ޓޯވކުރުމުގެ މަސައްކަތް ކުރަމުންދާ ކަމަށެވެ.

އެގޮތަށް ޕާކް ކޮށްފައިވާ އުޅަނދު ދުއްވި ފަރާތްތަކާމެދު ފިޔަވަޅު އަޅާނެކަން ފާހަގަކޮށް ފުލުހުން ބުނީ، މިގޮތަށް ޓޯވކުރެވޭ އުޅަނދުތައް ދޫކުރެވޭނީ 48 ގަޑިއިރު ފަހުން ކަމަށެވެ.

އެގޮތުން ބުރާސްފަތި ދުވަހު އެކަނި ވެސް މަޖީދީ މަގުން ދެ ފުރޮޅުލީ 37 ވެހިކަލް، 4 ފޮރޮޅުލީ 5 ވެހިކަލް ޓޯ ކޮށްފައިވާ ކަމަށް ފުލުހުން ބުނެއެވެ.

އުޅަނދުތައް ޕާކްކުރުމަށް ކަނޑައެޅިފައިވާ ޕާކިންގ ޒޯންތަކުގައި ޕާކް ކުރުމަށް ޚާއްސަ ސަމާލުކަމެއް ދިނުމަށް ވެސް ފުލުހުން ވަނީ އިލްތިމާސްކޮށްފައެވެ.

މީގެ އިތުރުން ފުލުހުން ވަނީ މާލޭގެ މަގުތަކުގެ ސަލާމަތާއި ރައްކާތެރިކަން ކަށަވަރުކޮށް، މަގުތައް ތަރުތީބު ކުރުމަށް ފުލުހުން ކުރަމުންދާ މަސައްކަތްތަކަށް އާންމު ރައްޔިތުންދޭ އެއްބާރުލުން ފާހަގަކޮށްފައެވެ.

މަޖީދީ މަގަކީ މާލޭގެ އެންމެ ބާރުބޮޑު އެއް މަގެވެ. ގިނަ ފިހާރަތަކެއް މި މަގުގައި ހުންނައިރު، މާލޭގެ މައި އެންމެ ބޮޑު މަގަށްވާތީ، އަބަދުވެސް އެ މަގު ވަރަށް ބާރު ބޮޑު ބޮޑެވެ. މަގުގެ ދެ ފަރާތަށްވާ ގޮތަށް ވެހިކަލް ޕާކު ކޮށްފައި ހުރުމުގެ ސަބަބުން ހިނގާ މީހުންނާ ދުށްވާ މީހުންނަށް ދަތިވެއެވެ. އަދި ބަހުގެ ދަތުރުތަކާއެކު ވަރަށް ބޮޑަށް މަގު ޓްރެފިކް ވެގެން ވެސް ދެއެވެ. މަޖީދީ މަގުގައި ޕާކު ކުރުމަކީ މަނާ ކަމެއް ނަމަވެސް ސަރޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގ މަސައްކަތް ކުރާ ފުލުހުންގެ ކާރު މަޖީދީ މަގުގެ ދެ ފަރާތަކުގައި ޕާކު ކުރާތީ އެކަމުގެ ޝަކުވާ ވެސް އާއްމު ރައްޔިތުން ކުރެއެވެ. މަނާ ކަމެއް ނަމަވެސް ވަރަށް ގިނައިން ފުލުހުންގެ ވެހިކަލް އެސަރަހައްދުގައި ޕާކު ކޮށްފައި އޮންނަކަން ފާހަގަވެއެވެ.