ޝެއިހު ފަރީދުގެ ޖަނާޒާ މެލޭޝިއާގައި ބާއްވައިފި، ޣައިބަށް ކަށުނަމާދު ކުރުން ހުކުރު ދުވަހު
11 ޖޫން 2025 | ބުދަ 11:58ޝައިޚް ފަރީދުގެ ޖަނާޒާ މެލޭޝިއާގައި ބާއްވާފައި ވަނީ ބުދަ ދުވަހު މެންދުރު
ޝެއިޚް އިބްރާހީމް ފަރީދު - ޝައިޚްގެ ޖަނާޒާ ބޭއްވީ ބުދަ ދުވަހު މެލޭޝިއާގައި
ރާއްޖޭގެ މަޝްހޫރު ދީނީ އިލްމުވެރިޔާ ޝައިޚު އިބްރާހިމް ފަރީދު އަހުމަދުގެ ޖަނާޒާ މެލޭޝިއާގައި ބާއްވައިފި އެވެ.
ޝެއިހު ފަރީދުގެ ޖަނާޒާ ބާއްވާފައި ވަނީ ބުދަ ދުވަހު މެންދުރު ނަމާދަށް ފަހު ސެލަންގޯގެ ރާޖާ ހާޖީ ފީސަބީލިﷲ މިސްކިތުގަ އެވެ. ފަސްދާނުލީ ތަނާހް ޕަރްކުބުރަން އިސްލާމް ރައުދަތުލް ބަޤީ ގަބުރުސްތާނުގަ އެވެ.
އުމުރުފުޅުން 53 އަހަރުގައި ފަރީދު އަވަހާރަވީ މިދިޔަ ހޯމަ ދުވަހު ހަވީރު ދީނީ ދައުވަތާ ގުޅުންހުރި ކަމެއްގައި މެލޭޝިއާއަށް ކުރެއްވި ދަތުރުގައި އެއާޕޯޓުގައި ހުންނަވަނިކޮށް ކުއްލި ގޮތަކަށް ހާލު ދެރަވެގެންނެވެ.
ފަރީދުގެ މައްޗަށް ރާއްޖޭގެ ހުރިހާ މިސްކިތެއްގައި ޣައިބަށް ކަށުނަމާދު ކުރުން އަންނަ ހުކުރު ދުވަހު، ހުކުރު ނަމާދަށް ފަހު އޮންނާނެ އެވެ.
ޝެއިހު ފަރީދުގެ މައްޗަށް ޣައިބަށް ކަށުނަމާދު ކުރުމާ ގުޅޭގޮތުން އިސްލާމިކް މިނިސްޓްރީން ވަނީ ރަށު ކައުންސިލުތަކަށާއި އަތޮޅު ކައުންސިލުތަކަށާ އަދި ސިޓީ ކައުންސިލުތަކަށް މިއަދު ސާކިއުލާއެއް ފޮނުވާފަ އެވެ.
އެ ސާކިއުލާގައި ބުނީ އަންނަ ހުކުރު ދުވަހުގެ ހުކުރު ނަމާދަށް ފަހު މީހުން ދިރިއުޅޭ ހުރިހާ ރަށެއްގެ ހުކުރުކުރާ ހުރިހާ މިސްކިތެއްގައި ފަރީދުގެ މައްޗަށް ޣައިބަށް ކަށުނަމާދު ކުރުމަށް ހަމަޖެހިފައިވާ ކަމަށެވެ. ވުމާ އެކު މި ނަމާދު ކުރެވޭނެ އިންތިޒާމް ހަމަޖެއްސުމަށް ވަނީ އެދިފަ އެވެ.
ފަރީދަކީ ރާއްޖޭގައި ދީނީ އިލްމު ފެތުރުމުގައި ފާހަގަކޮށްލެވޭ ފަދަ މަސައްކަތްތަކެއް ކުރެއްވި ބޭފުޅެކެވެ. އޭގެއިތުރުން އޭނާއަކީ އިސްލާހީ ހަރަކާތުގައި ވެސް އިސްކޮށް ހަރަކާތްތެރިވި ބޭފުޅެކެވެ. އޭރު ބޭއްވި އެއްވުންތަކުގައި ފަރީދު ތަގުރީރު ވެސް ކުރެއްވި އެވެ.
އޭގެ ތެރެއިން ބައެއް އެއްވުންތަކުގައި ބައިވެރިވި ކަމުގެ ތުހުމަތުގައި އޭރުގެ ސަރުކާރުން ޝެއިހު ޖަލުގައި ވެސް ބަންދުކުރި އެވެ. އޮގަސްޓު 12-13 ގެ އެއްވުމުގެ ތެރެއިން ވެސް ހައްޔަރުކޮށް ޖަލުގައި ބަންދުކުރި އެވެ.
ދީނީ އެއްބައިވަންތަކަން ހިމާޔަތް ކުރުމުގެ ގާނޫނުގެ ދަށުންނާއި ޓެރަރިޒަމްގެ ކުށުގެ ދައުވާ ވެސް ފަރީދުގެ މައްޗަށް އުފުލި އެވެ.
