ކޮމިޝަނަރ އޮފް ޕޮލިސްގެ އަނބިކަނބަލުން ވެސް އަނިޔާވެރިކަމާއި ދެކޮޅަށް ތެދުވެއްޖެ
27 އޯގަސްޓު 2017 | އާދީއްތަ 12:25މަހުލޫފާއި، ޔުމްނާ އަދި ރޮޒައިނާ ވަނީ ކޮމިޝަނަރ އޮފް ޕޮލިސް އަހުމަދު އަރީފްގެ އަނބިކަނބަލުންނާއި ބައްދަލުކުރައްވާފަ
ގުޅިފައިވާ ސިޔާސީ ޕާޓީތަކުގެ ބޭފުޅުން، ކޮމިޝަނަރ އޮފް ޕޮލިސްގެ އަނބިކަނބަލުންނާއެކު
ކޮމިޝަނަރ އޮފް ޕޮލިސް އަހުމަދު އަރީފްގެ އަނބިކަނބަލުން ވެސް އަނިޔާވެރިކަމާއި ދެކޮޅަށް ތެދުވެއްޖެ އެވެ.
ގުޅިފައިވާ ސިޔާސީ ޕާޓީތަކުގެ މަސައްކަތުގައި އިސްކޮށް ހަރަކާތްތެރިވެވަޑައިގަންނަވާ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފާއި، އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އަދި ރައީސް މައުމޫނު އަބްދުލްޢައްޔޫމްގެ ދަރިކަނބަލުން ޔުމްނާ މައުމޫނު ވަނީ ކޮމިޝަނަރ އޮފް ޕޮލިސް އަހުމަދު އަރީފްގެ އަނބިކަނބަލުންނާއި ބައްދަލުކުރައްވާފަ އެވެ. އަދި އެ ބައްދަލުވުމުގެ ފޮޓޯއެއް ތިން ބޭފުޅުންވެސް ވަނީ ޓުވީޓް ކުރައްވާފަ އެވެ.
ޓުވީޓްކުރައްވަމުން ޔުމްނާ މައުމޫނު ވިދާޅުވީ، ކޮމިޝަނަރ އޮފް ޕޮލިސް އަހުމަދު އަރީފްގެ އަނބިކަނބަލުން ވެސް ހުންނެވީ ބޭއިންސާފާއި އަނިޔާވެރިކަމާއި ދެކޮޅަށް ކަމަށެވެ. އަދި މިފަދަ ހިތްވަރުގަދަ ކަނބަލުންގެ ފަރާތުން ހިތްވަރު ހޯދަންޖެހޭ ކަމަށް ޔުމްނާ ވިދާޅުވެފައިވެއެވެ.
މަހުލޫފުވެސް ވިދާޅުވީ، ކިތަންމެ ސަރުކާރު އަނިޔާވެރި ވިޔަސް، ކޮމިޝަނަރ އޮފް ޕޮލިސް އަހުމަދު އަރީފްގެ އަނބިކަނބަލުން ވެސް ހުންނެވީ އަނިޔާވެރިކަމާއި ދެކޮޅަށް ކަމަށެވެ. ރޮޒައިނާ ވެސް ވަނީ ހަމައެފަދައިން ވިދާޅުވެ ޓުވީޓް ކުރައްވާފަ އެވެ.
ރާއްޖެޓީވީއަށް މައުލޫމާތުދެއްވަމުން ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ވިދާޅުވީ، އަރީފްގެ އަނބިކަނބަލުން ދެއްކެވި މިސާލުން މިސާލު ލިބިގަންނަން ޖެހޭކަމަށެވެ. އަދި އެކަމުން މިސާލު ލިބިގަނެ، ސިފައިންނާއި ފުލުހުން ވެސް އަނިޔާވެރިކަމާއި ދެކޮޅަށް ތެދުވުމަށް މަހުލޫފު ގޮވާލެއްވި އެވެ.
