2 ހަފްތާގެ ތެރޭގައި މަސްޖިދުލް ނަބަވީ އަށް 12 މިލިއަނަށް ވުރެ ގިނަ މުސްލިމުން ޒިޔާރަތް ކޮށްފި

ހައްޖުގެ އަޅުކަން ފެށުމާ ހަމަ އަށް ފާއިތުވި ދެ ހަފްތާ ތެރޭގައި މަދީނާ ގައި ހުންނަ ކީރިތި ރަސޫލާގެ މިސްކިތައް 12 މިލިއަނަށް ވުރެ ގިނަ މުސްލިމުން ޒިޔާރަތް ކޮށްފި ކަމަށް ސައުދީ އަރަބިއްޔާ އިން ހާމަ ކޮށްފިއެވެ.

މަސްޖިދުލް ޙަރާމާއި މަސްޖިދުލް ނަބަވީގެ ކަންތައްތަކާ ބެހޭ ޖެނެރަލް އޮތޯރިޓީގެ ތަފާސް ހިސާބުތަކުން ހާމަވާ ގޮތުގައި، ޛުލްޤަޢިދާ މަހުގެ 15 ވަނަ ދުވަހުން ފެށިގެން ޛުލްޙިއްޖާ މަހުގެ 1 ވަނަ ދުވަހާ ހަމައަށް 12،914،153 މުސްލިމުން މަސްޖިދުލް ނަބަވީ އަށް ޒިޔާރަތް ކޮށްފައިވެއެވެ. އަދި މި މުއްދަތުގެ ތެރޭގައި ރައުޟާ ޝަރީފަށް 666،580 މުސްލިމުން ޒިޔާރަތް ކޮށްފައިވެއެވެ.

ސައުދީ ސަރުކާރުން ބުނެފައި ވަނީ މިސްކިތައް ޒިޔާރަތް ކުރާ ފަރާތްތަކަށް ލުއި ފަސޭހަތަކާއި ހިތްފަސޭހަކަން ހޯދައިދިނުމަށް ފުޅާ ދާއިރާއެއްގައި ޚިދުމަތްތައް ފޯރުކޮށްދީފައިވާ ކަމަށެވެ. މީގެ ތެރޭގައި މިސްކިތުގެ ގޯތިތެރޭގައި 161،802 ފަރާތަކަށް ދަތުރުފަތުރުގެ ޚިދުމަތް ފޯރުކޮށްދިނުމާއި، ރޯދައަށް ތިބި ފަރާތްތަކަށް 301،802 އިފްތާރު ޕެކޭޖުތައް ބެހުމާއި، 218،336 ފުޅި ޒަމްޒަމް ފެން ފޯރުކޮށްދިނުން ހިމެނެއެވެ. އަދި ޖުމްލަ 3،360 ޓަނުގެ ޒަމްޒަމް ފެން ބޭނުން ކުރެވިފައިވެއެވެ.

މިސްކިތުގެ މާހައުލު ބެލެހެއްޓުމާއި ސާފުތާހިރު ކަމަށްވެސް އިސްކަންދޭ ކަމަށް ބުނެފައިވެއެވެ. އެ ގޮތުން ޓީމުތަކުން 312 ޓަނުގެ ކުނި ނައްތާލައި، މިސްކިތުގައި 41،675 ލީޓަރުގެ ޑިސްއިންފެކްޓެންޓާއި ސްޓެރިލައިޒަރ ބޭނުން ކުރެވިފައިވާ ކަމަށާއި، މީގެއިތުރުން، މިސްކިތުގައި މީރު ވަސް ދުއްވުމަށް 7 ކިލޯގްރާމްގެ އޫދު އަދި 39 ލީޓަރުގެ ސެންޓާއި މީރުވަސް ދުވާ ތެޔޮ ބޭނުންކުރެވުނު ކަމަށް ވެސް ބުނެފައިވެއެވެ.