ޓެކްނިކަލް މައްސަލައެއް ދިމާވެ، ށ.ފުނަދޫ އެއަރޕޯޓް ބަންދުކޮށްފިއެވެ.

ހޮނިހިރު ދުވަހު މޯލްޑިވިއަންއިން ބުނީ، ޓެކްނިކަލް މައްސަލައެއް ދިމާވެ، ފުނަދޫ އެއަރޕޯޓް ބަންދުކޮށްފައިވާ ކަމަށެވެ. އަދި މި މައްސަލަ ދިމާވުމާއި ގުޅިގެން ހޮނިހިރު ދުވަހު އެއެއާލައިންގެ ޝެޑިއުލް ފްލައިޓްތައް އޮޕަރޭޓް ނުކުރާނެ ކަމަށެވެ.

މިކަމުގެ ސަބަބުން ދަތުރުތަކަށް އަސަރުކުރާނެކަން ފާހަގަކޮށް، މޯލްޑިވިއަންއިން ބުނީ، ފަސިންޖަރުންނަށް ދަތުރުކުރެވޭނެ އެހެން ގޮތްތަކެއް ހަމަޖެއްސުމުގެ މަސައްކަތް ކުރަމުންދާ ކަމަށާއި އެ ފަސިންޖަރުންނާއި މުއާމަލާތް ކުރާނެ ކަމަށެވެ.

މި މައްސަލަ ދިމާވުމާއި ގުޅިގެން މޯލްޑިވިއަންއިން ވަނީ މައާފަށް ވެސް އެދިފައެވެ. ނަމަވެސް ދިމާވި މައްސަލައެއް އަދި އިތުރު ތަފްސީލެއް ހިއްސާކޮށްފައިނުވެއެވެ.

ފުނަދޫ އެއާޕޯޓު ހިންގަނީ ރީޖަނަލް އެއާޕޯޓްސް ކުންފުނިންނެވެ. ފުނަދޫއަށް ދަތުރުކުރަނީވެސް މޯލްޑިވިއަން އިން އެކަންޏެވެ. މޯލްޑިވިއަން އިން ފުނަދޫއަށް ދަތުރު ކުރަނީ އަންގާރަ، ބުރާސްފަތި އަދި ހޮނިހިރު ދުވަހުއެވެ.

މިދިޔަ އަހަރު ފަހުކޮޅު ވެސް ދިމާވި ޓެކްނިކަލް މައްސަލަތަކާ ގުޅިގެން، ވަރަށް ބޮޑަށް ޝެޑިއުލް ފްލައިޓްތަކަށް ބުރޫއަރާފައިވެއެވެ. އަދި ވަގުތީ ގޮތުން އޮޕަރޭޝަންތައް މެދުކަނޑާލިއެވެ.

މި މައްސަލަ ތަކުރާރުކޮށް ދިމާވަމުންދާއިރު، 28 ފެބްރުއަރީ 2024 ފުނަދޫ ރައްޔިތުންނާ ބައްދަލުކުރައްވައި ރައީސް ޑރ. މުހައްމަދު މުއިއްޒު ވަނީ އެއަރޕޯޓު އިތުރަށް ތަރައްގީ ކޮށްދެއްވާނެ ކަމަށް ވައުދުވެވަޑައިގެންފައެވެ. އޭގެ ތެރޭގައި އެއަރޕޯޓުގެ ރަންވޭ އިތުރަށް ދިގުކުރުމާއި އެއަރޕޯޓުގެ ޚިދުމަތްތައް ރަނގަޅު ކުރުމާއި ފްލައިޓްތައް އިތުރުކުރާނެ ކަމަށް އެމަނިކުފާނު ވިދާޅުވެފައިވެއެވެ.

ނަމަވެސް މިސަރުކާރުގައި މިހާތަނަށް އައިރު، އެއަރޕޯޓު ތަރައްގީ ކުރުމުގެ އަމަލީ އެއްވެސް މަސައްކަތެއް ކޮށްފައިނުވެއެވެ. އެކަމުގެ ކަންބޮޑުވުން އެރަށުގެ ރައްޔިތުން ވެސް ކުރެއެވެ.

އަޟްހާ އީދު ބަންދާ ދިމާކޮށް ފުނަދޫގެ އެއަރޕޯޓު ބަންދުކުރުމާ ގުޅިގެން ގިނަ ބަޔަކަށް އެކަމުގެ ދަތި އުދަނގޫތައް ކުރިމަތިވާނެއެވެ.

2020 ވަނަ އަހަރުގެ ތެރޭގައި ހުޅުވައި، ޚިދުމަތް ދޭން ފެށި، ފުނަދޫ އެއަރޕޯޓުގައި ގާއިމްކޮށްފައިވަނީ 1200 މީޓަރު ދިގު، 30 މީޓަރު ފުޅާ ރަންވޭއެކެވެ. ޓެކްސީވޭގައި 90 މީޓަރު ހުރެ އެވެ. އޭޕްރަންގެ ފުޅާމިނުގައި 50 މީޓަރު އަދި ދިގު މިނުގައި 150 މީޓަރު ހުރެ އެވެ.