މޯލްޑިވިއަން އިން ޗައިނާއަށް ކުރާ ދަތުރުތަށް މުއްދަތެއް ނެތްގޮތަށް ހުއްޓާލައިފި

ގައުމީ އެއާލައިން މޯލްޑިވިއަން އިން ޗައިނާއަށް ކުރާ ދަތުރުތަށް މުއްދަތެއް ނެތް ގޮތަށް ހުއްޓާލާފި އެވެ.

ރާއްޖެއެމްވީއަށް އިތުބާރު ހުރި މަސްދަރަކުން މައުލޫމާތުދިން ގޮތުގައި، ގައުމީ އެއާލައިން މޯލްޑިވިއަންގެ އޭ330ގެ މަތިންދާ ބޯޓަށް ދިމާވި ޓެކްނިކަލް މައްސަލައަކާއި ގުޅިގެން އެބޯޓް ގްރައުންޑް ވުމާއި ގުޅިގެން މިހާރު ޗައިނާއަށް ދަތުރުކުރަމުން ދަނީ އޭ320 ގެ ބޯޓު ގައެވެ. އަދި ކުރިން ކުރަމުން އައި ދަތުރުތައް ހުއްޓާލީ ޗައިނާ އާއި ރާއްޖެއާއި ދެމެދު ޓްރާންސިޓް ފްލައިޓްތައް އަޅާތީ އެކަމާއި ޗައިނާގެ އެޖެންޓް ހިތްހަމަ ނުޖެހިގެން ކަމަށް ވަނީ މައުލޫމާތުލިބިފަ އެވެ.

ޗައިނާގެ މީޑިއާތަކުގައިވެސް މިވާހަކަތައް ޖެހި ނަމަވެސް، މިކަމުގެ މާބޮޑު ތަފްސީލެއް މޯލްޑިއަނުން ހާމަކޮށްފައެއް ނުވެއެވެ.

އެއާބަސް އޭ330 އަށް ދިމާވި ޓެކްނިކަލް މައްސަލައާއި ގުޅިގެން މޯލްޑިވިއަނުން ކުރާ އިންޓަރނޭޝަނަލް ފްލައިޓް އޮޕަރޭޝަންސްއަށް ވަނީ ބޮޑެތި ބުރޫތަކެއް އަރާފައެވެ. އެގޮތުން އިންޑިއާގެ ބެންގަލޯރަށް ބޮޑެތި ޑިމާންޑްތަކެއް އޮތް އިރު މިވަގުތު ބެންގަލޯރަށް ދަތުރު ކުރަނީ އޭޓީއާރު 72 މަރުކާގެ ބޯޓުގައެވެ. މިކަމަކާއި ގުޅިގެން ގިނަ އަދަދެއްގެ ފަސިންޖަރުންގެ ނުރުހުން މޯލްޑިވިއަންއަށް އޮތް ކަމަށް މައުލޫމާތުލިބެ އެވެ.

މޯލްޑިވިއަންގެ އޭޓީއާރު 72 މަރުކާގެ ބޯޓަކީ 70 ފަސިންޖަރުންގެ ޖާގައިގެ ބޯޓަށްވާއިރު، އެއާބަސް އޭ320 މަރުކާގެ ބޯޓަކީ 164 ފަސިންޖަރުންގެ ޖާގައިގެ ބޯޓެކެވެ.

އެއާބަސް އޭ330 ބޯޓުން 260 މީހުން އުފުލެ އެވެ. ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާހަށް ވެސް ހާއްސަ ކޮށްފައިވާ އެ ބޯޓުން ދުރުރާސްތާގެ ދަތުރުތައް ކުރެވޭއިރު ދަތުރުކުރާ ކޮންމެ ފަސިންޖަރަކަށް ވެސް 40 ކިލޯގެ ބެގޭޖު އުފުލޭނެ އެވެ.

އެއާބަސް އޭ330 ގެ އިތުރު ބޯޓެއް ހޯދަން 2025 ވަނަ އަހަރުގެ އޭޕްރިލް މަހުގެ ތެރޭގައި އިއުލާންކޮށްފައިވާއިރު، މޯލްޑިވިއަނަށް އިތުރު އެއާބަސްއެއް ގެނެސް މިއަހަރުގެ އޮކްޓޫބަރު މަހު އޭގެ ދަތުރުތައް ފެށޭނެ ކަމަށް މީގެ ކުރިން ރައީސް މުހައްމަދު މުއިއްޒު ވަނީ ވިދާޅުވެފަ އެވެ.

ނަމަވެސް މިބޯޓް ގެނައުންވެސް ލަސްވެފައިވާކަން މިނޫހަށް ވަނީ އިތުބާރު ހުރި ގޮތަކަށް މައުލޫމާތުލިބިފަ އެވެ. އަދި އަލަށް ގެންނަ އޭ330 ގެ ބޯޓް ގެނެވޭނެ ކަމަށް މިހާރު ލަފާކޮށްފައިވަނީ 2026 ވަނަ އަހަރުގެ ޖެނުއަރީ މަހުގަ އެވެ.