ފަޔަރ ޓްރަކު ހަލާކުވެގެން ފުވައްމުލަކު އެއަރޕޯޓް ބަންދު ކޮށްފައި އޮންނަތާ 24 ގަޑިއިރު ވަނީ!
ފަޔަރ ޓްރަކު ހަލާކުވުމާ ގުޅިގެން ފުވައްމުލަކަށް އަންނަން އޮތް ފްލައިޓުތައް ކެންސަލްވެއްޖެ
ފުވައްމުލަކު އެއަރޕޯޓު
ފަޔަރ ޓްރަކަށް ދިމާވި މައްސަލައެއް ހައްލު ނުކުރެވިގެން ފުވައްމުލަކު އެއަރޕޯޓު ވަގުތީގޮތުން ބަންދު ކޮށްފި އެވެ.
ރާއްޖެ އެމްވީ އަށް އެނގިފައިވާ ގޮތުގައި އެ އެއަރޕޯޓުުގައި ބޭނުންކުރާ ފަޔަރ ޓްރަކު ހަލާކުވެ ހޯމަ ދުވަހުގެ ހަވީރުން ފެށިގެން މި ވަގުތާ ހަމައަށްވެސް މައްސަލަ ހައްލު ކުރެވިފައެއް ނުވެ އެވެ. މިކަމުގެ ސަބަބުން ހޯމަ ދުވަހުގެ ހަވީރުން ފެށިގެން ފުވައްމުލަކަށް އަންނަން އޮތް ފްލައިޓުތައް ވަނީ ކެންސަލްވެފަ އެވެ.
މިކަމާއި ގުޅިގެން ފުވައްމުލައް ސިޓީގެ މޭޔަރު އިސްމާއިލް ރަފީގު ރާއްޖެ އެމްވިއާއި ވާހަކަ ދައްކަވަމުން ވިދާޅުވީ، މި އީ ވަރަށް ކަންބޮޑުވާ މައްސަލައެއް ކަމަށައި އާމުންގެ ފަރާތުންނާއި ގެސްޓުން ގެންގުޅޭ ފަރާތްތަކުގެ ޝަކުވާތައްވެސް އަންނަކަމަށެވެ. އަދި ކައުންސިލްއާއި މޯލްޑިވިއަން އަދި އެއަރޕޯޓް ގުޅިގެން މައްސަލަ ހައްލުކުރުމުގެ މަސައްކަތް ކުރަމުންދާކަމަށް ރަފީގު ވިދާޅުވި އެވެ.
ރަފީގު ވިދާޅުވި އެއަރޕޯޓުގައި އޮންނަނީ އެންމެ ފަޔަރ ޓްރަކެއް ކަމަށެވެ. އަދި މިވަގުތު މޯލްޑިވިއަންއާއި ގޫޅިގެން ފަސެންޖަރުން ލޯންޗެއްގައި އައްޑޫއަށް ގޮސް ގަން އިންޓަނޭޝަނަލް އެއަރޕޯޓުން ފުރޭނެ ގޮތް ހަމަޖެއްސުމުގެ މަސައްކަތް ކުރަމުން ދާކަމަށް ރަފީގު ވިދާޅުވި އެވެ.
ދެން އަޅުގަނޑުމެން ބެލިން މި ފަޔަރ ސާވިސްގަ އިން ފަަރ ޓްރަކު ބޭނުންކޮށްގެންވެސް ހައްލެއް ލިބޭތޯ. ވާގޮތަކީ މި އެއަރޕޯތުގައި ބޭނުންވާ ކެޓަގަރީއަށް އެ މިންގަނޑަކަށް ފަޔަރުގެ ސިވިލް ފަޔަރ ގަ އިންނަ ވެހިކަލް ނުވެސް ފެތޭ. އެހެންވީމަ ހުއްދައެއް ނުލިބެ.ފުވައްމުލައް ސިޓީގެ މޭޔަރު އިސްމާއިލް ރަފީގު
ރަފީގު ވިދާޅުވީ މީގެ ކުރިން ވެސް މިކަހަލަ މައްސަލައެއް ދިމާވި ކަމަށާއި އެހެން ނަމަވެސް އޭރު ވަރަށް އަވަހަށް އެ މައްސަލަ ހުއްލު ކުރެވުނު ކަމަށެވެ. އަދި މިފަހަރު ދިމާވި މައްސަލަ އަކީ އަވަހައް ހައްލު ކުރެވޭނެ މައްސަލައެއް ނޫންކަން އޭނާ ފާހަގަ ކުރި އެވެ.
މީގެ އިތުރުން ރާއްޖެ އެމްވީ އަށް މިކަމުގެ މައުލުމާތު ހިއްސާ ކުރެއްވި މޯލްޑިވިއަންގެ މީޑިއާ އޮފިޝަލް ވިދާޅުވީ، މިކަމުގެ ސަބަބުން އާމުންގެ ޝަކުވާ އަންނަ ކަމަށައި އަދި ފްލައިޓް ތައްވެސް އޮޕަރޭޓު ނުކުރެވޭ ކަމަށެވެ.
އަދި މޯލްޑވިއަން އިން އެކްސަ ގައި ކުރި ޕޯސްޓެއްގައި ބުނީ އެއަރޕޯޓް ބަންދުކުރުމާ ގުޅިގެން ދަތުރުކުރުމަށް ހަމަޖެހިފައިވާ ފަސިންޖަރުންނަށް އެހީތެރިވުމަށްޓަކައި ކުންފުނީގެ ފަރާތުން ޚާއްސަ ޓީމެއް މަސައްކަތްކުރަމުންދާ ކަމަށެވެ. އަދި މިކަމާ ގުޅިގެން ދިމާވެދާނެ އުނދަގޫތަކަށް މަޢާފަށް އެދޭ ކަމަށާއި، ދަތުރުވެރިންނަށް ވީހާވެސް އަވަހަކަށް ޚިދުމަތް ފޯރުކޮށްދިނުމަށް މަސައްކަތްކުރަމުންދާ ކަމަށްވެސް ބުނެފައިވެއެވެ.
