ލ. އަތޮޅަށް ދެވަނަ އެއާޕޯޓެއް ބޭނުންވާ ކަމަށާއި އެހެން ނަމަވެސް އެ އެއާޕޯޓު އަޅާނެ ވަކިތަނެއް އަދި ކަނޑަނޭޅޭ ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

ހައްދުންމައްޗަށް ރައީސް މުއިއްޒު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު މާވަށަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ވާހަކަދައްކަވަމުން ރައީސް މުއިއްޒު ވިދާޅުވީ ލ އަތޮޅުގައި ދެވަނަ އެއާޕޯޓެއް އެޅުމަކީ މި ސަރުކާރުގެ ވެސް ވިސްނުމެއް ކަމަށެވެ. އެހެން ނަމަވެސް ކުރިން އިސްކަން ދެއްވާނީ ފުރަތަމަ ވެވަޑައިގެންފައިވާ ވައުދުތަކަށް ކަމަށާއި އެއާޕޯޓުގެ ވައުދު ވާނީ އެ ވައުދުތައް ފުއްދަވާފައި ކަމަށް ރައީސް ވިދާޅުވި އެވެ.

ރައީސް މުއިއްޒު ވިދާޅުވެފައިވަނީ އެއާޕޯޓު އަޅާނެ ތަނެއް ކަނޑައެޅުމުގައި ދުރު ރާސްތާގެ ވިސްނުމަކާއި އިގްތިސާދީ ދެމެހެއްޓެނިވި ކުރިއެރުމަށް އިސްކަންދެއްވާނެ ކަމަށެވެ.

އެއާޕޯޓު އެޅުމުގައި އެންމެ އިސްކަމެއް ދެއްވާނީ ގިނަ ރިސޯޓުތަކެއް ތަރައްގީކުރެވޭނެ ސަރަހައްދަކާ ގާތުން ކަމަށް ރައީސް ފާހަގަކުރެއްވިއެވެ. މީގެ އިތުރުން ޖިއޮގްރަފިކަލް ގޮތުން ވެސް އެންމެ އެކަށީގެންވާ ތަނެއްގައި އެއާޕޯޓު އެޅުމަށް ވިސްނާވަޑައިގަންނަވާ ކަމަށް ވިދާޅުވިއެވެ.

ފާއިތުވި އަހަރުގެ ރިޔާސީ އިންތިޚާބުގެ ކެމްޕޭނުގައި ވެސް މާވަށު ރައްޔިތުންނާ ބައްދަލުކުރެއްވި އިރު، ލ. އަތޮޅުގައި ނުނިންމާ އޮތް ހަމައެކަނި ކަމަކީ ދެވަނަ އެއާޕޯޓެއް އަޅާނެ ތަން ކަނޑައެޅުން ކަމަށް ރައީސް މުއިއްޒު ވިދާޅުވެފައިވެއެވެ. އަދި މި ނިންމުން ނިންމަވާނީ އިގްތިސާދީ ގޮތުން ރައްޔިތުންނަށް އެންމެ ފައިދާހުރި ގޮތަކަށް ކަމުގައި ވެސް އޭރު ވިދާޅުވިއެވެ.

ލޯކަލް ކައުންސިލް އިންތިޚާބާއި ދިމާކޮށް ރައީސް މުއިއްޒު ރަށްރަށަށް ކުރައްވާ މިފަދަ ދަތުރުފުޅުގެ ތެރެއިން ވައުދުތައް ފުއްދުގެ ނަމުގައި ގިނަ މަޝްރޫއުތަކެއް އަންނަނީ އިއުލާނު ކުރައްވަމުންނެވެ. އިދިކޮޅު ފަރާތްތަކުން ބުނާގޮތުގައި ރައީސް މުއިއްޒުގެ އަމާޒަކީ ރަށްރަށަށް ފައިދާހުރި ތަރައްގީގެ މަޝްރޫއުތައް ހިންގުމެއް ނޫން ކަމާއި ބޭނުމަކީ ވޯޓު ހޯދުމެވެ.