ރައްޔިތުންގެ މަޖިލީހުގެ މެންބަރުންގެ ތެރެއިން އެންމެ ގިނައިން އެއާޕޯޓް ވީއައިޕީ ޚިދުމަތް ބޭނުންކުރެއްވީ ރައްޔިތުންގެ މަޖިލީހުގެ ނައިބްރައީސްކަން ކުރައްވާ ދިއްގަރު ދާއިރަގެ މެންބަރު އަޙްމަދު ނާޒިމް ކަން ހާމަވެއްޖެ އެވެ.

އަމިއްލަ ފަރާތަކުން ރައްޔިތުންގެ މަޖިލީހަށް ހުށަހަޅައިގެން ހޯދި މައުލޫމާތު ބިނާވެފައިވަނީ 28 މެއި 2024 (20 ވަނަ މަޖިލީހުގެ މެންބަރުން ހުވާކުރެއްވި ތާރީޚުން ފެށިގެން) އިން 31 ޖުލައި 2025 ގެ ނިޔަލަށެވެ.

އެ މައުލޫމާތުން ހާމަވި ގޮތުގައި ރައްޔިތުންގެ މަޖިލީހުގެ މެންބަރުން އެއާޕޯޓްގެ ވީއައިޕީ ހިދުމަތް ބޭނުންކުރައްވައިގެން ދައުލަތުން 1.5 މިލިއަން ރުފިޔާ ހަރަދުކުރިއިރު، އެއިން އެންމެ ބޮޑު ހަރަދެއް ހިނގާފައި ވަނީ މަޖިލީހުގެ ނައިބު ރައީސް އަހުމަދު ނާޒިމަށެވެ.

މަޖިލީހުން ހަދާފައިވާ ގަވައިދެއްގެ ދަށުން، މެންބަރުން އެއާޕޯޓުން ދަތުރުކުރައްވާ އިރު ވީއައިޕީ ލައުންޖު ބޭނުންކުރައްވައިގެން ހިނގާ ހަރަދު ދައްކަން ޖެހެނީ ދައުލަތުންނެވެ.

މި މުއްދަތުގައި މަޖިލީހުގެ ގިނަ މެންބަރުންތަކެއް ވަނީ ވީއައިޕީ ބޭނުންކުރައްވާފަ އެވެ. އޭގެ ތެރެއިން އެންމެ ގިނަ އަދަދަކަށް ވީއައިޕީ ބޭނުންކުރެއްވި ނާޒިމް ވަނީ 133 ފަހަރު ބޭނުންކުރައްވާފަ އެވެ. އެހެންކަމުން އޭނާ ވީއައިޕީ ބޭނުންކުރެއްވުމުގެ ޚަރަދެއްގެ ގޮތުން ޖުމްލަ 116،099.18 ރުފިޔާ އަރާފައިވެ އެވެ.

ދެވަނައަށް އެންމެ ގިނަ އަދަދަކަށް ވީއައިޕީ ބޭނުންކުރައްވާފައިވަނީ ފޭދޫ ދެކުނު ދާއިރާގެ މެންބަރު އިބްރާހިމް ދީދީ އެވެ. އޭނާ 97 ފަހަރު ވީއައިޕީ ޚިދުމަތް ބޭނުންކުރައްވައިގެން ޖުމްލަ 84،673.84 ރުފިޔާ އަރާފައިވެ އެވެ.

ތިންވަނައަށް އެންމެ ގިނައިން ވީއައިޕީ ބޭނުންކުރައްވާފައިވަނީ މީދޫ ދާއިރާ މެންބަރު އަދި މަޝްހޫރު ވިޔަފާރިވެރިޔާ އަޙްމަދު ސިޔާމް މުޙައްމަދެވެ. ސިޔާމް 78 ފަހަރު ވީއައިޕީ ޚިދުމަތް ބޭނުންކުރެއްވިއިރު ޖުމްލަ 68،088.24 ރުފިޔާ އަރާފައިވެ އެވެ.

ރައްޔިތުންގެ މަޖިލީހުގެ މެންބަރުންގެ ތެރެއިން އެންމެ ގިނައިން އެއާޕޯޓް ވީއައިޕީ ޚިދުމަތް ބޭނުންކުރެއްވީ މެންބަރު އަޙްމަދު ނާޒިމް ކަން ހާމަވިއިރު، އޭނާ އަކީ ދައުލަތުގެ ހަރަދުތައް ކުޑަކުރުމަށް އެންމެ ބޮޑަށް ވަކާލާތުކުރައްވާ އެއް މެންބަރެވެ. އެހެންވެ ސޯޝަލް މީޑިއާގައި މިހާރު ވެސް ނާޒިމަށް ފާޑުކިއުން އަމާޒުވަމުން ދެއެވެ.