ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގައި، ޔުކްރެއިން އަށް އިތުރު ވައިގެ ދިފާއީ ވަސީލަތްތައް ހޯދުމުގެ މަސައްކަތް ޖަރުމަނުން ފަށައިފި އެވެ.

އެކަން ހާމަ ކުރައްވާފައި ވަނީ ބުދަ ދުވަހު ޖަރުމަނުގެ ޑިފެންސް މިނިސްޓަރު ބޯރިސް ޕިސްޓޯރިއަސް އެވެ. ނޫސްވެރިންނާ ވާހަކަ ދައްކަވަމުން އޭނާ ވިދާޅުވީ، ޔުކްރެއިންގެ ސަލާމަތާއި ރައްކާތެރިކަމަށް ހޯދަން ޖެހޭ ވަސީލަތްތައް ހޯދުމުގެ މަސައްކަތް ޖަރުމަނުން ކުރަމުން އަންނަ ކަމަށެވެ.

އެ މަސައްކަތުގެ ދަށުން އެމެރިކާ އާއި ބައެއް އެހެނިހެން ޤައުމުތަކުން ޕެޓްރިއޮޓް މިސައިލް ސިސްޓަމް އަދި އެފަދަ އެހެނިހެން ވައިފެ ދިފާއީ ވަސީލަތްތައް ޔުކްރެއިން އަށް ހަދިޔާ ކުރުމަށް މަސައްކަތް ކުރައްވާނެ ކަމަށް ވެސް ޖަރުމަނުގެ ޑިފެންސް މިނިސްޓަރު ވަނީ ވިދާޅުވެފަ އެވެ.

ޖަރުމަނުގެ ޑިފެންސް މިނިސްޓަރު ޕިސްޓޯރިއަސް ފާހަގަ ކުރެއްވި ގޮތުގައި އެ މަސައްކަތަކީ ރަޝިޔާގެ ހަމަލާތަކުން ޔުކްރެއިންގެ ވައިގެ މަގާއި، އާންމު ރައްޔިތުން ދިރިއުޅޭ ސަރަހަައްދުތައް ރައްކާތެރި ކުރުމަށް ކުރެވޭ ވަރަށް މުހިންމު މަސައްކަތެކެވެ. 

ޔުކްރެއިންގެ ވައިގެ ދިފާއީ ނިޒާމު ވަރުގަދަ ކުރުމަށް ބޭރުގެ ގައުމުތަކުގެ އެހީތެރިކަން ހޯދުމުގައި، ޖަރުމަނުން މިހާރު ވެސް އިސް ދައުރެއް އަދާ ކުރަމުންދެ އެވެ. އަދި މި އައު މަސައްކަތާ އެކު، އިތުރު ގައުމުތަކުގެ އެއްބާރުލުން ލިބޭނެ ކަމަށް މަސްރަހު ދިރާސާ ކުރާ ފަރާތްތަކުން އަންނަނީ ބުނަމުންނެވެ.

ޖަރުމަނުގެ ޑިފެންސް މިނިސްޓަރު މިހެން ވިދާޅުވެފައިވާއިރު، ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށްޓަކައި ގިނަ މަސައްކަތްތަކެއް އަންނަނީ ކުރަމުންނެވެ. އަދި އެކަމުގައި އެންމެ ބޮޑަށް ބާރު އަޅާ އެއް ޤައުމަކީ ވެސް އެމެރިކާ އެވެ. 

މީގެ އިތުރުން ފްރާންސް، އިނގިރޭސިވިލާތް އަދި ޕޮލެންޑުން ވެސް އަންނަނީ އެކަމުގައި ގިނަ މަސައްކަތްތަކެއްކޮށް، މަޝްވަރާތަކެއް ކުރަމުންނެވެ. މި ޤައުމުތަކުގެ އިސް ލީޑަރުން ވަނީ މިދިޔަ މަހު ޔުކްރެއިން އަށް ވަޑައިގެން، އެ ޤައުމުގެ އިސްވެެރިންނާ އެކު ބައްދަލުވުންތަކެއް ވެސް ކުރިއަށް ގެންގޮސްފަ އެވެ. އިނގިރޭސިވިލާތާއި، ފްރާންސް ވެސް އޮތީ އަސްކަރީ ގޮތުން ޔުކްރެއިން އަށް އެހީތެރިކަން ދިނުމަށް ތައްޔާރަށެވެ.

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިންމުމާ ގުޅޭ ގޮތުން، ދެ ޤައުމުގެ އިސް ވެރިންގެ ދެމުދުގައި ވަނީ މިހާތަނަށް ދެެ ބައްދަލުވުމެއް ބާއްވައިފަ އެވެ. ތުރުކީގެ އިސްތަންބޫލުގައި ކުރިއަށް ދިޔަ އެ ބައްދަލުވުމުގައި ހަނގުރާމަ ހުއްޓާލުމަށް ރަޝިޔާ އިން އެއްބަސް ނުވި ނަމަވެސް، އަސީރުން މިނިވަން ކުރުމުގައި ދެ ޤައުމުން ވެސް ވަނީ އެއްބަސްވުމަކަށް އައިސްފަ އެވެ.