ލެއްޗޭ ބަލިކޮށް، އިންޓަރ ދެ ވަނައިގައި

އިޓާލިއަން ލީގުގަައި ލެއްޗޭއާ ދެކޮޅަށް ކުޅުނު މެޗުން މޮޅުވެ، އިންޓަރ މިލާާނުން ލީގު ތާވަލްގެ ދެ ވަނައިގައި އޮވެއްޖެ އެވެ.

ލެއްޗޭގެ އަމިއްލަ ދަނޑުގައި އާދީއްތަ ދުވަހުގެ ރޭ އެ ޓީމާ ދެކޮޅަށް ކުޅުނު މެޗު އިންޓަރ މިލާނުން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި އެ ޓީމުން ދެ ލަނޑު ޖެހިއިރު، ދެ ވަނަ ހާފުގައި ވެސް ވަނީ ދެ ލަނޑު ޖަހައިފަ އެވެ.

މެޗު ފަށައިގެން ހަ ވަނަ މިނެޓުގައި އިންޓަރ އަށް ކުރި ހޯދައިދިނީ ޑޭވިޑް ފަރަޓެސީ އެވެ. އޭގެ ފަހުން ފަރަޓެސީ ދެ ވަނަ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ. މެޗުގެ ފުރަތަަމަ ހާފުގައި އިންޓަރގެ ދެ ވަނަ ލަނޑު ޖެހީ ލައުޓާރޯ މާޓިނޭޒް އެވެ.

މެޗުގެ ދެ ވަނަ ހާފު ފަށައިގެން 12 ވަނަ މިނެޓުގައި ޑެންޒެލް ޑަމްފްރީސް ވަނީ އިންޓަރ މިލާންގެ ތިން ވަނަ ލަނޑު ޖަހައިފަ އެވެ. އެ ލަނޑު އޭނާ ޖެހީ މާޓިނޭޒް ތަނަވަސްކޮށްދިން ފުރުސަތެއްގަ އެވެ. މެޗުގައި އިންޓަރ މިލާންގެ ފަހު ލަނޑަކީ އެ ޓީމަށް ލިބުނު ޕެނަލްޓީ ކާމިޔާބުކޮށް މާކަސް ތުރަމް ޖެހި ލަނޑެކެވެ.

މޮޅާއެކު އިންޓަރ މިލާން ދެ ވަަނައިގައި އޮތީ މިހާތަނަށް އެ ޓީމު ކުޅެފައިވާ 21 މެޗުން 50 ޕޮއިންޓާ އެކު އެވެ. އިންޓަރ މިލާނަށް ވުރެ އެއް މެޗު އިތުރަށް ކުޅެގެން އެއް ވަނައިގައި އޮތް ނަޕޯލީ އަށް ލިބެނީ 53 ޕޮއިންޓެވެ.