މެއި މަހުގެ ބިލް ބޮޑުކަމަށް ފެންނަނީ އޭޕްރިލް މަހު ޑިސްކައުންޓު ލިބިފައިވާތީ: ސްޓެލްކޯ
4 ޖޫން 2025 | ބުދަ 04:52މެއި މަހުގެ ކަރަންޓް ބިލްތައް ލިބުނުއިރު އޭޕްރިލް މަހުގެ ބިލައްވުރެ ބޮޑުވުމުން ގިނަ ބަޔަކު އަންނަނީ އެކަމުގެ ޝަކުވާ ކުރަމުން
ސްޓެލްކޯގެ ލޯގޯ
މެއި މަހުގެ ބިލް ބޮޑުވެފައިވާ ކަމަށް ފެންނަނީ ވޭތުވެދިޔަ އޭޕްރިލް މަހު ޑިސްކައުންޓް ލިބިފައިވާތީ ކަމަށް ސްޓެލްކޯއިން ބުނެފިއެވެ.
އެކުންފުނިން އެކްސް ގައި ކުރި ޕޯސްޓެއްގައި ބުނީ، އައު ޓެރިފް ރޭޓާއިއެކު ކަރަންޓު ބިލަށް އައިސްފައިވާ ބަދަލު ސާފުކޮށް ފެންނާނީ ވޭތުވެދިޔަ 3 ބިލް (ރަމަޟާން ޑިސްކައުންޓް ހިމަނާފައިވާ 2 ބިލާއި ކުރު މުއްދަތަކަށް ބިލްކޮށްފައިވާ ބިލް) ގެ ކުރިން އެ ގޭބިސީއަކަށް ބިލްކޮށްފައިވާ ބިލާއި އަޅައި ކިޔުމުން ކަމަށެވެ.
މެއި މަހުގެ ކަރަންޓް ބިލްތައް ލިބުނުއިރު އޭޕްރިލް މަހުގެ ބިލަށްވުރެ ބޮޑުވުމުން ގިނަ ބަޔަކު އަންނަނީ އެކަމުގެ ޝަކުވާ ކުރަމުންނެވެ.
މި އަހަރަށް ފާސްކުރި ބަޖެޓުގައިވާ ގޮތަށް މުތުލަގަށް އެންމެނަށް ލިބޭ ބްލެންކެޓް ސަބްސިޑީ ކަނޑާނުލައި ކަރަންޓުގެ އަގުތައް ޖޫން 1 އިން ފެށިގެން ކުޑަކުރަން ވަނީ ނިންމައިފަ އެވެ.
އެ ބަދަލުތަކުގައިވާ ގޮތުން، 0-100 ޔުނިޓުގެ ބޭންޑަށް މިހާރު ނަގާ 1.50 ރުފިޔާގެ ރޭޓު 1.25 ރުފިޔާއަށް ދަށްކޮށްފައިވެއެވެ. އަދި 101-200 ޔުނިޓުގެ ބޭންޑަށް މިހާރު ނަގާ 1.70 ރުފިޔާގެ ރޭޓު 1.50 ރުފިޔާއަށް ދަށްކޮށް 201-300 އަދި 301-400 ޔުނިޓުގެ ބޭންޑުތަކަށް މިހާރު ނަގާ 2.15 އަދި 2.50 ރުފިޔާގެ ރޭޓު 1.50 ރުފިޔާއަށް ވަނީ ދަށްކޮށްފައެވެ.
މީގެއިތުރުން، 401-500 ޔުނިޓުގެ ބޭންޑަށް މިހާރު ނަގާ 2.95 ރުފިޔާގެ ރޭޓު 2.66 ރުފިޔާއަށް ދަށްކޮށް 501-600 ޔުނިޓުގެ ބޭންޑަށް މިހާރު ނަގާ 3.55 ރުފިޔާގެ ރޭޓު 3.20 ރުފިޔާއަށް ދަށްކޮށްފައިވެއެވެ. އަދި 600 ޔުނިޓަށްވުރެ މަތީ ބޭންޑަށް މިހާރު ނަގާ 4.25 ރުފިޔާގެ ރޭޓު 3.83 ރުފިޔާއަށް ވަނީ ދަށްކޮށްފައެވެ.
ކޮންމެ މަހެއްގެވެސް ކަރަންޓު ބިލު ލިބުމުން ކަރަންޓު ބިލު އަގުބޮޑުވެގެން ރައްޔިތުންގެ ޝަކުވާތަކުގެ އަޑު ދުވަހެއް ދުވަހަކަށް ދަނީ ގަދަވަމުންނެވެ.
