އަރަބި މިނިސްޓަރުންގެ ވަފުދަށް އިސްރާއީލް އިން ހުރަސްއެޅުން ކުށްވެރިކޮށްފި

ހުޅަނޑު އައްސޭރި އަށް، އަރަބި ޤައުމު ތަކުގެ ޚާރިޖީ ވަޒީރުން ކުރައްވަން އޮތް ދަތުރުފުޅަށް އިސްރާއީލް އިން ހުރަސް އެޅުމުން ޤައުމުތަކުން އެކަން ކުށްވެރިކޮށްފި އެވެ.

ސައުދީ އަރަބިއްޔާގެ ޚާރިޖީ ވަޒީރު ޕްރިންސް ފައިސަލް ބިން ފަރުޙާން އިސްވެ ހުންނަަވައި ކުރިއަށް އޮތް ހަފުތާާ ބަންދުގައި ހުޅަނގު އައްސޭރި އަށް ދަތުރުފުޅެއް ކުރެއްވުމަށް އޮތީ ހަމަޖެހިފަ އެވެ.

އެ ދަތުުރުފުޅުގައި މިޞްރު، ޖޯޑަން، ޤަތަރު އަދި ޔުނައިޓެޑް އަރަބް އެމިރޭޓްސްގެ ޚާރިޖީ ވަޒީރުން ވެސް ބައިވެރިވެ ވަޑައިގަންނަވާ ގޮތަށް އޮތީ ހަމަ ޖެހިފަ އެވެ. އަދި ތުރުކީގެ ވަފުދަކާއި، އަރަބި ލީގުގެ ސެކްރެޓަރީ ޖެނަރަލް ވެސް މި ދަތުރުފުޅުގައި ބައިވެރިވާ ގޮތަށް އޮތީ ހަމަޖެހިފަ އެވެ.

އިސްރާއީލް އިން ބުނެފައިވާ ގޮތުގައި ރާމަﷲ ގައި ފަލަސްތީނުގެ ސަރުކާރުގެ ވެރިންނާއި އަރަބި ގައުމުތަކުގެ ވަފުދު ބައްދަލު ކުރުމަކީ އިސްރާއީލު "ރުޅިއަރުވަން" ކުރާ ކަމެއް ކަމަށެވެ. އެ ބައްދަލުވުމުގައި މަޝްވަރާ ކުރަން ހަމަ ޖެހިފައި ވަނީ ފަލަސްތީނުގެ ދައުލަތެއް ގާއިމު ކުރުމާ ބެހޭ ގޮތުން ކަމަށާއި، "އިސްރާއީލަށް ގެއްލުން ދިނުމަށާއި އެ ގައުމުގެ ސަލާމަތަށް ނުރައްކާވާ ފަދަ ކަންކަމުގައި އިސްރާއީލުން އެއްބާރުލުން ނުދޭނެ" ކަމަށް ވެސް އެ ޤައުމުން ވަނީ ބުނެފަ އެވެ.

އެކަމާ ގުޅިގެން ޖޯޑަންގެ ޚާރިޖީ ވުޒާރާ އިން ބުނެފައި ވަނީ އިސްރާއީލް އިން މި ޒިޔާރަތް ހުއްޓުވުމަކީ އެކަމުގެ ކަންބޮޑުވުން އިންތިހާ އަށް ފާޅު ކުރަން ޖެހޭ ކަމެއް ކަމަށެވެ. 

މިދިޔަ ހުކުރު ދުވަހު އިސްރާއީލް އިން ވަނީ ޤައުމު ތަކުގެ ޚާރިޖީ ވަޒީރުންގެ އެ ޒިޔާރަތަށް އެއްވެސް އެއްބާރުލުމެއް ނުދޭނެ ކަމަށް ބުނެފަ އެވެ. އަދި ޚާއްސަކޮށް ފަލަސްޠީނުގެ ދައުލަތެއް ޤާއިމު ކުރުމަށް ކުރާ މަސައްކަތަށް އެއްބާރުލުން ނުދޭނެ ކަމަށް ވެސް ވަނީ ބުނެފަ އެވެ. 

ހުޅަނގު އައްސޭރީގައި އިސްރާއީލްގެ ދައުލަތެއް ޤާއިމު ކުރާނެ ކަމަށް އިސްރާއީލްގެ ޑިފެންސް މިނިސްޓަރު އިސްރާއީލް ކާޓްޒް މި ފަހުން ވިދާޅުވެފައިވެ އެެވެ. އޭނާ މިހެން ވާހަކަ ދައްކާފައި ވަނީ ފަލަސްޠީނުގެ ބިމުގައި އައު 22 އާބާދީއެއް ޤާއިމު ކުރާނެ ކަމަށް އެ ޤައުމުގެ ސަރުކާރުން ހާމަ ކުރި ފަހުންނެވެ. 

ހުޅަނގު އައްސޭރީގައި އިސްރާއީލް އިން އާބާދުވުމަކީ ބައިނަލްއަޤުވާމީ ޤާނޫނުތަކާ ޚިލާފު ކަމެއްގެ ގޮތުގައި އދ އިން ދެކެ އެވެ. އަދި އެއީ ދެމެހެއްޓެނިވި ސުލްޙަ އަށް ހުރަސް އެޅޭނެ ކަމެއްގެ ގޮތުގައި ވެސް ވަނީ ފާހަގަ ކޮށްފަ އެވެ.

ޖޫން މަހުގެ ތެރޭގައި ފަލަސްޠީނާއި އިސްރާއީލްގެ ދެ ދައުލަތުގެ ޙައްލަށް މަޝްވަރާ ކުރުމަށް އދ ގައި ބައިނަލްއަޤުވާމީ ބައްދަލުވުމެއް ބޭއްވުމަށް ވަނީ ހަަމަޖެހިފަ އެވެ. ފްރާންސް ސަރުކާރުގެ އިސް އޮފިޝަލުން ބުނެފައިވާ ގޮތުގައި އެ ބައްދަލުވުމުގެ ސަބަބުން، އިތުރު ޤައުމުތަކަކުން ފަލަސްޠީނުގެ މިނިވަން ދައުލަތް ބަލައި ގަތުމުގެ ފުރުސަތު އެބަ އޮތެވެ. 

އިސްރާއީލް އިން އައު ސެޓްލްމަންޓްތައް އިޢުލާން ކުރުމާ ގުޅިގެން، ބްރިޓަން އިން ވަނީ، އެއީ ފަލަސްޠީނު ދައުލަތެއް ގާއިމު ކުރުމަށް ގަސްދުގައި އެޅޭ ހުރަހެއް ކަމަށް ބުނެފަ އެވެ. އަދި އދ ގެ ސެކްރެޓަރީ ޖެނެރަލްގެ ތަރުޖަމާނު ވިދާޅުވެފައި ވަނީ، އެއީ ދެ ދައުލަތުގެ ހައްލާ "ދުރަށް ގެންދާ" ފިޔަވަޅެއް ކަމަށެވެ.