ރާއްޖޭގެ ހުރިހާ ހައްޖުވެރިން ތިބީ މައްކާގައި ކަމަށާއި، ހުރިހާ ހައްޖާޖީންގެ ސަލާމަތާއި ރައްކާތެރިކަން ކަށަވަރުކުރާނެ ކަމަށް ހައްޖު ކޯޕަރޭޝަނުން ބުނެފިއެވެ.

ހައްޖުވެރިންނާ ގުޅޭގޮތުން އެ ކޯޕްރޭޝަންގެ މެނޭޖިން ޑިރެކްޓަރު، މުހައްމަދު ޝަކީލް ވިދާޅުވީ 1446 ވަނަ އަހަރުގެ ހައްޖުގެ އަޅުކަން ފުރިހަމަ ކުރުމަށް ހައްޖު ކޮޕަރޭޝަންގެ ހަވާލުގައި ސައުދީއަރަބިއްޔާއަށް ޒިޔާރަތްކުރި ހުރިހާ ހައްޖުވެރިން މިހާރު ތިބީ މައްކާގައި ދިވެހި ހައްޖުވެރިން ތިބުމަށް ހަމަޖެހިފައިވާ ހޮޓަލުގައި ކަމަށެވެ.

ޖުމްލަ ގޮތެއްގައި ހުރިހާ ހައްޖުވެރިންގެ ހާލުވެސް ރަނގަޅު ކަމަށް އޭނާ ވިދާޅުވިއެވެ.

މީގެ އިތުރުން ޝަކީލު ވިދާޅުވީ މައްކާގައި ތިބި ރާއްޖޭގެ 1000 ހައްޖާޖީންގެ ސަލާމަތާއި ރައްކާތެރިކަން ކަށަވަރުކުރާނެ ކަމަށާއި، ތަފާތު ކުރުމެއް ނުގެންގުޅޭނެ ކަމަށެވެ. އަދި ވިދާޅުވީ ހައްޖާޖީންނަށް ޚިދުމަތް ދިނުމުގައި އެއްވެސް ދަތިކަމެއް ނެތް ކަމަށާއި، ހުރިހާ އިންތިޒާމެއް ވަރަށް ފުރިހަމަ ކަމަށެވެ.

ރާއްޖެއިން ހައްޖުވެރިން ފުރާފައިވަނީ ހަތަރު ގުރޫޕަކަށް ބަހާލައިގެންނެވެ.

އެގޮތުން ހައްޖުވެރިންގެ ފުރަތަމަ ގުރޫޕް ފުރާފައިވަނީ 26 މެއި 2025 ވީ ހޯމަ ދުވަހުއެވެ. ދެވަނަ ގުރޫޕް 27 މެއި ވީ އަންގާރަ ދުވަހު، ތިން ވަނަ ގުރޫޕް 29 މެއި ވީ ބުރާސްފަތި ދުވަހުއެވެ. އަދި ހައްޖުވެރިންގެ ހަތަރުވަނަ ގުރޫޕް ފުރާފައިވަނީ 30 މެއި ވީ ހުކުރު ދުވަހުއެވެ.

ސައުދީން ރާއްޖެއަށް ދޫކުރާ ހައްޖު ކޯޓާގެ އަދަދަކީ 1000 އެވެ.