މޫސުމީ ކޮޅިގަނޑަކަށް މިހާރު ކެޓަގަރައިޒް ކުރެވިފައިވާ ހާވީގައި ޓެކްސަސްއަށް އަދިވެސް ބޯކޮށް ވާރޭ ވެހެމުން ދާއިރު ހިއުސްޓަންގެ އެކި ކަންކޮޅުތަކުން ފެންބޮޑުވެ ހާލުގައި ޖެހުނު 2،000 މީހުން ސަލާމަތް ކޮށްފިއެވެ.
ހެރިސް ކައުންޓީގެ ޝެރިފް އޮފީހުން ބުނީ ފެނުއަޑީގައިވާ ވެހިކަލްތަކުގެ ތެރޭގައި މީހުން މަރުވެފައި ވެދާނެ ކަމަށް ރިޕޯޓްތައް ލިބިފައިވާ ކަމަށާއި އެކަން ބަލަމުން އަންނަ ކަމަށެވެ.
ޓެކްސަސްގެ ގަވަރނަރ ގްރެގް އެބޮޓް މީޑިއާއަށް ވިދާޅުވީ ވިއްސާރައިގައި މަރުވި މީހުންގެ އަދަދު ކަށަވަރުކޮށް ނުދެއްވިދާނެ ކަމަށެވެ.
މޫސުމާ ބެހޭ ގައުމީ އިދާރާއިން ބުނެފައިވަނީ ހާލަތު "އާދަޔާ ޚިލާފް"ކަމަށެވެ.
ކޮންވެންޝަން ސެންޓަރާއެކު އެތައް ތަނެއް ވަނީ ބޯހިޔާވަހިކަމަށް ހުޅުވާލެވިފައެވެ.
ގަވަރނަރ އެބޮޓް ވިދާޅުވީ ޓެކްސަސްގެ 250 އެއްހާ ހައިވޭއާއި މަގުތައް ބަންދު ކޮށްފައިވާ ކަމަށެވެ. އަދި ރައީސް ޑޮނަލްޑް ޓްރަމްޕް ދެއްވި ހުއްދައާ އެއްގޮތަށް ސްޓޭޓްގެ 19 ކައުންޓީއެއްގައި ކާރިސާގެ ހާލަތު އިއުލާނު ކޮށްފައިވާ ކަމަށެވެ.
ވާރޭ ވެހެމުން ދިއުމުގެ ސަބަބުން ހިއުސްޓަންއާއި،ވިކްޓޯރިއާ އަދި ކޯޕަސް ކްރިސްޓީއާ ތިން ސިޓީއަށް އެހީ ފޯރުކޮށްދޭން ޖެހިފައިވަނީ އެކުއެކީގައި ކަމަށް އެބޮޓް ވިދާޅުވިއެވެ.
"އަދިވެސް އިންތިހާއަށް ބޯކޮށް ވާރޭ ވެހޭނެ"
ފަސްމީހަކު މަރުވި ކަމަށް ރިޕޯޓްތައް ބުނަމުން ދިޔަކަން ނޭޝަނަލް ވެދަރ ސަރވިސަސްއަށް ކުރިން ފާހަގަ ކުރެވިފައިވީ ނަމަވެސް ހިއުސްޓަންއިން މަރުވި ކަމަށް ކަށަވަރު ކޮށްދީފައިވާ މީހުންގެ އަދަދަކީ އެކެކެވެ.
ހޮނިހިރު ދުވަހު ކުރަންފެށި މި ވިއްސާރައިގައި މިހާތަނަށް މަރުވި މީހުންގެ އަދަދުކަމަށް ކަށަވަރު ކުރެވިފައިވަނީ ދޭކެވެ.
