އިނގިރޭސިވިލާތަށް ޓެރަރިޒަމްގެ ނުރައްކާ އިންތިހާއަށް މަތީގައި!

އިނގިރޭސިވިލާތަަށް ޓެރެރިސްޓް ހަމަލާއެއް އަތުވެދާނެ ކަމަށް ބަލާ މިންގަނޑުން ބަލާނަމަ އެގައުމު މިހާރު އޮތީ އެންމެ މަތީ ހަރުފަތުގައި ކަމަށާއި، އެއީ "ކްރިޓިކަލް" ހާލަތުގައި ކަމަށް ބޮޑު ވަޒީރު ތެރީސާ މޭ އަންގާރަ ދުވަހު ވިދާޅުވެއްޖެއެވެ.

އިނގިރޭސިވިލާތުގެ "ޓެރާ ތްރެޓް ލެވެލް"، "ކްރިޓިކަލް" ނުވަތަ އެންމެ ނުރައްކާތެރި ހާލަތުގައި ވުމުން އަންގައި ދެނީ، އެގައުމަށް، އިތުރު ޓެރަރިސްޓް ހަަމަލާއެއް އަތުވެދާނެ ކަން ވަރަށް ގާތް ކަމެވެ. "ޓެރާ ތްރެޓް ލެވެލް" އެންމެ މަތީ ހަރުފަތަަށް އިނގިރޭސިވިލާތުން ޖެއްސިއިރު، ހޯމަ ދުވަހުގެ ރޭ، ޖާނުން ފިދާވެގެން މެންޗެސްޓާ އެރީނާއަށް ވަނީ ބޮމުގެ ހަމަލާއެއް ދީފައެވެ. މެންޗެސްޓާ އެރީނާ އާށް ދިން ހަމަލާގައި 22 މީހުން މަރުވެ 59 މީހުން ޒަޚަމްވެފައިވެއެވެ.

ޖާނުން ފިދާވެގެން ބޮމުގެ ހަމަލާ ދިން ކަމަށް އޮފިޝަލުން ތުހުމަތުކޮށްފައި ވަނީ ސަލްމާން އަބެދީ ނަމަކަށް ކިޔާ މީހަކަށް ކަމަށްވާއިރު، ތަހުގީގު ކުރާ އޮފިޝަލުންނަށް އަދި، ހަަމަލާ ދިނީ އޭނާ އެކަނި ކަމަށް ކަށަވަރު ނުކޮށްދެވެއެވެ.

އިނގިރޭސިވިލާތުގެ މައި އިމާރާތްތަކާއި އަދި ތަންތަނުގައި ސަލާމަތީ ބާރުތަކުން މިހާރު ދަނީ ފޯރިމަރަމުންނެވެ.

އެމެރިކާގެ މަޝްހޫރު ލަވަކިޔުންތެރިޔާ އާރިއާނާ ގްރާންޑޭގެ ޝޯވއަށް ފަހު މެންޗެސްޓަރ އެރީނާއަށް ދީފައިވާ ބޮމުގެ ހަމަލާގެ ޒިންމާ އިސްލާމިކް ސްޓޭޓް ނުވަތަ އައިއެސް އިން ނަގައިފިއެވެ. ހަމަލާ ދިން ވަގުތު އެތަނުގައި ތިބި ބައެއް ފަރާތްތަކުން ބުނީ، ބޮން ގޮއްވާފައިވަނީ އާރިއާނާ ފަހު ލަވަ ނިންމާލާ "ޝުކުރިއްޔާ މެންޗެސްޓަރ"އޭ ބުނެ ސްޓޭޖުން ފޭބި ވަގުތެވެ. މެންޗެސްޓަރ އެރީނާއިން ބުނި ގޮތުގައި ބޮން ގޮއްވާފައިވަނީ ޝޯވ ބަލަން ދިޔަ މީހުން ނިކުންނަނިކޮށް، އެރީނާގެ ބޭރުންނެވެ. މި ހަމަލާގައި އާރިއާނާއަށް އަނިޔާއެއް ވެފައެއް ނުވާއިރު، އޭނާވަނީ އެކަމާ ގުޅިގެން "ހިތުގައި ޖެހިއްޖެ"ކަމަށް، ޓްވިޓާ މެދުވެރިކޮށް ބުނެފައެވެ.

މިފަހަރުގެ ކުރިން މިހާތަނަށް، އިނގިރޭސިވިލާތުގެ "ޓެރާ ތްރެޓް ލެވަލް"، "ކްރިޓިކަލް" އަށް ޖައްސައިފައި ވަނީ 2006 ގައެވެ.