ޓެކްސަސް އަށް އަރާފައިވާ ތޫފާން ހާވީގެ ބާރު މިހާރު ދަށްވެއްޖެ
26 އޯގަސްޓު 2017 | ހޮނިހިރު 11:49މިހާރު ހުރީ ކެޓެގަރީ 1 ގައި
ޓެކްސަސް އަށް ދަނީ ގަދަވަޔާއެކު ބޯކޮށް ވާރޭވެހެމުން
އެމެރިކާގެ ޓެކްސަސް އަށް މިހާރު އަރާފައިވާ ތޫފާން ހާވީ ގެ ބާރު މިހާރު ދަށްވެފައިވާ ކަމަށާއި މިހާރު ހުރީ ކެޓެގަރީ 1 ގައި ކަަމަށް އެމެރިކާގެ ނެޝެނަލް ހަރިކޭން ސެންޓަރުން ބުނެފިއެވެ.
އެހެނެްނަމަވެސް އޮފިޝަލުން ބުނާގޮތުން ކުރިއަށް އޮތް ދުވަސްތަކުގައި ވަރަށް ބޯކޮށް ވާރޭ ވެހޭނެ ކަމަށް ލަފާ ކުރެވޭއިރު، "ވަރަށް ބޮޑަށް ފެންބޮޑުވާނެ" ކަމަށްވެސް ބެލެވެއެވެ.
ތޫފާން ހާވީ ޓެކްސަސް އަށް އެރިއިރު ހުރI ކެޓެގަރީ 4 ގައި ކަމަށް ރިޕޯޓުތައް ބުނެއެވެ.
ރިޕޯޓުތައް ބުނާ ގޮތުން ޓެކްސަސްގެ އައްސޭރި ފަށަށް މިހާރު އަރާފައިވާ ތޫފާން ހާވީއަކީ ވޭތުވެދިޔަ 12 އަހަރުގައި އެ ސްޓޭޓަށް އެންމެ ގެއްލުން ދެނެވި ތޫފާނަށް ވެގެންދާނެއެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ ޓެކްސަސް ސްޓޭޓަށް ކާރިސާގެ އެހީދިނުމާ ބެހޭ ގަރާރުގައި ސޮއި ކުރައްވާފައެވެ. ގެެއްލުން ލިބޭ ސަރަހައްދުތަކަށް އެ ގަރާރުގެ ދަށުން އެމެރިކާގެ މައި ސަރުކާރުން އެހީ ލިބިގެން ދާނެއެވެ.
ތޫފާން ހާވީއާ ބެހޭ ގޮތުން ޓެކްސަސްގެ ގަވަރުނަރު ގްރެގް އެބޮޓް ވިދާޅުވީ ޓެކްސަސްގެ އެކި ސަރަހައްދުތަކުގައި ރިކޯޑް އަދަދަކަށް ފެން ބޮޑުވާނެ ކަމަށް ލަފާކުރެވޭ ކަމަށެވެ.
ތޫފާން ހާވީ ޓެކްސަސް އަށް އެރުމާ ގުޅިގެން މިހާރު ވެސް ބައެއް ސަރަހައްދުތަކުގެ ގަސްތައް ބިމާ ހަމަވެފައިވާ ކަމަށްވެއެވެ. އަދި އެތައް ހާސް ބަޔަކު ރައްކާތެރި ހިސާބުތަކަށް ބަދަލުވެފައިވާ ކަމަށް ރިޕޯޓުތައް ބުނެއެވެ.
