ގެދޮރުވެރިޔާ ސްކީމްގެ ދަށުން ދޫކުރާ ފްލެޓުތައް ދޫކުރުމުގައި އޮޅުވާލުމަށް މި ސަރުކާރުން އުސޫލުގައިވާ ޝަރުތުތައް ބަދަލުކޮށްފައިވާ ކަމަށް މަޝްހޫރު ގާނޫނީ ވަކީލް އަލީ ހުސެއިން ވިދާޅުވެއްޖެ އެވެ.

ބުރާސްފަތި ދުވަހު ފަހި ޔޫނިއަންގެ ފަރާތުން ބޭއްވި ނޫސްވެރިންގެ ބައްދަލުވުމުގައި އަލީ ހުސެއިން ވިދާޅުވީ ގެދޮރުވެރިޔާ ސްކީމްގެ ދަށުން ފްލެޓުތައް ދޫކޮށްފައިވަނީ ވަކި ޚާއްސަ އުސޫލެއްގެ ދަށުން ކަމަށާއި، އެ އުސޫލު ގެޒެޓްކޮށްފައިވާ ކަމަށެވެ.

ނަމަވެސް މި ސަރުކާރުން ފްލެޓު ދިނުމާ ގުޅޭގޮތުން އެކުލަވާލާފައިވާ އުސޫލުގައިވާ ޝަރުތުތައް ބަދަލުކޮށްފައިވާ ކަމަށް އޭނާ ވިދާޅުވިއެވެ.

އަލީ ހުސެއިން ވިދާޅުވީ ކުރީ ސަރުކާރުން ޕޯޓަލްގައި ބަޔާންކުރި ޝަރުތުގެ ބައިގައި ހުށަހަޅާ ފަރާތުގެ ދަރިން ވޭތުވެދިޔަ 15 އަހަރުތެރޭގައި މާލޭގެ ސްކޫލު، ކޮލެޖް އަދި ޔުނިވާސިޓީ އެއްގައި ކިޔެވިކަން ނުވަތަ ކިޔަވަމުންގެންދާކަން އަންގައިދޭ ލިޔެކިއުންތައް އެ ޕޮއެންޓް އުނިކޮށްފައިވާ ކަމަށެވެ. އަދި އެބަޔަށްވީ ގޮތް ނޭނގޭ ކަމަށާއި، ނަމަވެސް ''އެޕްލިކެންޓްގެ ރަށްވެހިކަމުގެ މައުލޫމާތު'' މިސަރުކާރުން އިތުރުކޮށްފައިވާ ކަމަށެވެ. މިއީ ކުރީ ސަރުކާރުގެ އުސޫލުގައި ހިމެނޭ ޕޮއެންޓެއް ނޫން ކަމަށް އަލީ ހުސެއިން ވިދާޅުވިއެވެ.

އަލީ ހުސެއިން ވިދާޅުވީ އެމީހަކު މާލޭގައި 15 އަހަރު ދިރިއުޅުނުކަން ސާބިތުކޮށް ދިނުމަށް ދަރިން ސްކޫލުތަކާއި، ޔުނިވާސިޓީތަކުގައި ކިޔަމުންދާ ކަމުގެ ލިޔުން ހުށަހަޅާފައިވާ ކަަމަށެވެ. އެއީ ހޯދަން ވެސް ފަސޭހަ ލިޔުމަކަށްވާތީ ގިނަ ބަޔަކު އެލިޔުން ހުށަހަޅާފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ މި ސަރުކާރުން އެބައި އުނިކުރީ ރަނގަޅު މަގުސަދެއްގައި ނޫން ކަމަށާއި، އެއީ ގިނަ ބަޔަކު ލިސްޓުން އުނިކުރުމަށް ކަމަށެވެ.

އަލީ ހުސެއިން ވިދާޅުވީ މިއީ ގާނޫނީ ގޮތުން އުފެދިފައި އޮންނަ ސަރުކާރަކުން ކުރާވަރު ދަށު ދަރަޖާގެ އަމަލެއް ކަމަށެވެ. މިކަންކަން ހާމަވަމުންދާއިރު، ޝަރުތެއް ބަދަލުކޮށްފައިނުވާ ކަމަށް ބުނެ، ހައުސިން މިނިސްޓްރީ އަދި ސަރުކާރުން ދޮގު ހަދަމުންދާ ކަމަށް އޭނާ ވިދާޅުވިއެވެ.

މީގެ އިތުރުން އަލީ ހުސެއިން ވިދާޅުވީ ގެދޮރުވެރިޔާ ސްކީމުން ފްލެޓު ލިބުނު މީހުންނަށް މާލެސިޓީ ކައުންސިލްގައި މޭޔަރަކަށް ޑރ.މުހައްމަދު މުއިއްޒު ހުންނަވައި، މާލޭގައި 15 އަހަރު ދުވަހު ދިރިއުޅުނު ކަމަށް އަންގައިދޭން ލިޔުން ސިޓީ ކައުންސިލުން ދޫކޮށްފައިވާ ކަމަށެވެ.

ނަމަވެސް މިކަން ވެސް ސަރުކާރުން ދޮގު ކުރަމުންދާ ކަމަށާއި، 4 އޮކްޓޫބަރު 2023 ގައި ދޫކޮށްފައިވާ ލިޔުންތައް އެބަހުރި ކަމަށް އޭނާ ވިދާޅުވިއެވެ. އަދި ވިދާޅުވީ މާލެސިޓީ ކައުންސިލުން ދޫކޮށްފައިވާ ލިޔުމެއް ނެތް ކަމަށް ބުނެ ހައުސިން މިނިސްޓްރީން ވެސް މިކަމުގައި ދޮގު ބަޔާނެއް ނެރިފައިވާ ކަމަށެވެ.

އަލީ ހުސެއިން ވިދާޅުވީ ރައީސް ޑރ.މުހައްމަދު މުއިއްޒަކީ ދޮގު ހައްދަވާ ބޭފުޅެއް ކަމަށާއި، އެމަނިކުފާނުގެ ދަށުން މިނިސްޓަރުން އަދި މިނިސްޓްރީތަކުން ވެސް ދޮގު ބަޔާންތައް ނެރި ރައްޔިތުންނަށް އޮޅުވާލުން އާއްމު ކަމަކަށް ހަދާފައިވާ ކަމަށެވެ. އަދި މިއީ ކަންބޮޑުވާ މައްސަލައެއް ކަމަށް އަލީ ހުސެއިން ވިދާޅުވިއެވެ.