ދެވަނަ ފިޔަވަހިން ދޫކުރުމަށް ހަމަޖެހިފައިވާ 400 ގޯތި ދޫކުރުމުގެ ޕްރޮސެސްއާ މެދު އަދިވެސް ގޮތެއް ނުނިމޭ ކަމަށް ބުރާސްފަތިދުވަހު ހައުސިން މިނިސްޓްރީން ގޯތިދޫކުރުމަށް ހަވާލުކުރި ހުޅުމާލެ ޑިވެލޮޕްމެންޓަ ކޯޕަރޭޝަން (އެޗްޑީސީ) އިން ބުނެފިއެވެ.
އެޗްޑީސީގެ މީޑިއާ އޮފިޝަލް ރާއްޖެއެމްވީއަށް ވިދާޅުވީ ހައުސިން މިނިސްޓްރީން އެ ކޯޕަރޭޝަނާ ހަވާލުކުރި ހިސާބުން ގޯއްޗަށް އެދި ފޯމު ނަންބަރު ދޫކުރުމާއި ފޯމު ބަލައިގަތުމާ ގުޅޭ ގޮތުން މިނިސްޓްރީއާ އެކު މަޝްވަރާތައް ފަށާފައިވާ ކަމަށެވެ.
"އަދި ވަކި ގޮތަކަށް ނުނިމޭ. ނިމުނުހާ އަވަހަކަށް މައުލޫމާތު ހިއްސާކުރާނަން،" އެޗްޑީސީގެ މީޑިއާ އޮފިޝަލް ވިދާޅުވިއެވެ.
ދެވަނަ ފިޔަވަހިން ނުއަގުގައި 400،000ރ. އަށް ގޯއްޗެއްގެ މަގުން 400 ގޯތި ވިއްކަން ހުޅުވާލުމުން އެ މަޝްރޫއު ހުއްޓުވުމަށް ފަހު އެންޓި ކަރަޕްޝަން ކަމިޝަން (އޭސީސީ) އިން ވަނީ ގާނޫނީ ގޮތުން ސުވާލު އުފެދޭ ކަންތައްތަކާއި ކަރަޕްޝަނަށް މަގުފަހިވާ މައްސަލަތަކެއް ތަހުގީގުކުރަން ފަށާފައެވެ. އެކަމާ ގުޅިގެން ވަކި ކަންތައްތަކެއް އިސްލާހުކޮށް އަލުން ގޯތި ދޫކުރުމަށް ހުޅުވާލުމަށް ވަނީ އަންގާފައެވެ. އޭސީސީން ހައުސިން މިނިސްޓްރީއަށް އިސްލާހު ކުރަން އެންގި ކަންތައްތައް އިސްލާހުނުކޮށް އެ އެންގުމާ ޚިލާފަށް އެމިނިސްޓްރީން ވަނީ މިމަހުގެ 9 ވަނަ ދުވަހު ގޯއްޗަށް އެދޭ ފޯމާއި ފޯމު ބަލައިގަންނަން ފަށާފައެވެ.
މިމަހުގެ 11 ވަނަ ދުވަހު އޭސީސީން ވަނީ ހައުސިން މިނިސްޓްރީން އެމަސައްކަތް އަލުން ފެށީ އެންގުމާ ޚިލާފަށް ކަމަށާއި އެކަން ކޯޓު އަމުރެއްގެ ދަށުން ހުއްޓުވާނެ ކަމަށް ބުނެފައެވެ.
ހައުސިން މިނިސްޓަރ މުހައްމަދު މުއިއްޒު ވިދާޅުވެފައި ވަނީ ދެވަނަ ފިޔަވަހީގެ ގޯތީގެ ހުރިހާ ކަމެއް ކުރާނީ އެޗްޑީސީން ކަމަށާއި ގޯއްޗަށް ދައްކާ ފައިސާ ބަލައިގަތުމާއި ގުރުއަތުލުން ކުރިއަށް ގެންދާނީ ވެސް އެކޯޕަރޭޝަނުން ކަމަށެވެ. އަދި އެޗްޑީސީއާ އެމަސައްކަތް ހަވާލުކުރިއިރު އެދުވަހާ ހަމައަށް 5،100 ފޯމު ހައުސިން މިނިސްޓްރީން ބަލައިގެންފައިވާ ކަމަށާއި އެއިން އެއްވެސް ފޯމެއް ބާތިލް ނުވާނެ ކަމަށް މިނިސްޓަރު ވިދާޅުވިއެވެ.
