އެމްޑީޕީ ސަރުކާރުން ދޭން އުޅުނު ގޯތިތައް ނުދީ އޮތީ މުއިއްޒުގެ އިހުމާލުން: ސޯބެ
ކޮންވެންޝަން ސެންޓަރ ސަރަހައްދަށް ބިޑު ހުށަހަޅަން އޮތީ 14 ފެބްރުއަރީ 2012 ގައި
އައްޑޫ ކޮންވެންޝަން ސެންޓަރ: އެމްޑީޕީ ސަރުކާރުން ފަތުރުވެރިކަން ތަރައްޤީކުރުމަށް މަސައްކަތްކުރި
އައްޑޫ ސިޓީގައި ސާކް ސަމިޓް ބޭއްވުމަށް ތައްޔާރުކުރި ކޮންވެންޝަން ސެންޓަރު އެޅި ސަރަހައްދުގައި ހުރި އާއްމު ރައްޔިތުންގެ ގޯތިތަކުގެ ބަދަލުގައި އެމްޑީޕީ ސަރުކާރުން އައްޑޫގެ އެހެން ސަރަހައްދަކުން ދޭން ނިންމާފައިވާ ގޯތިތައް އަދިވެސް ނުދެވި އޮތީ ހައުސިންގ މިނިސްޓަރ ޑރ. މުހައްމަދު މުއިއްޒުގެ އިހުމާލުން ކަމަށް އައްޑޫ ސިޓީގެ މޭޔަރ ޢަބްދުﷲ ސޯދިގް (ސޯބެ) ވިދާޅުވެއްޖެއެވެ.
ސޯބެ މިހެން ވިދާޅުވީ އައްޑޫ ކޮންވެންޝަން ސެންޓަރު ސަރަހައްދުން އެމްޑީޕީ ސަރުކާރުން އައްޑޫ ރައްޔިތުންގެ އަތުން ވަކިކުރި ގޯތިތައް އަނބުރާ ހަވާލުކުރަން ރައީސް ޔާމީން ނިންމަވައި އެގޯތިތައް އަންނަ ހަފުތާއިން ފެށިގެން ހަވާލު ކުރަން ފަށާނެ ކަމަށް ޑރ. މުއިއްޒު ވިދާޅުވެފައި ވާތީ އެކަމަށް ރައްދު ދެއްވަމުންނެވެ.
ރާއްޖެ އެމްވީއަށް ސޯބެ ވިދާޅުވީ އައްޑޫ ކޮންވެންޝަން ސެންޓަރަކީ ސާކް ސަމިޓް ނިމުމުން އެތަނާއި މުޅި އެސަރަހައްދު ހިމެނޭ ގޮތަށް ސިޓީ ހޮޓަލަކާ އެކު ފަތުރުވެރިކަން ތަރައްޤީ ކުރުމަށް ނިންމާފައިވާ ތަނެއް ކަމަށާއި އެކަމަށްޓަކައި ބިޑަށް ހުޅުވާލުމުން އެކަމަށް ޝައުގުވެރިވާ ވަރަށް ރަނގަޅު ފަރާތަތްކުން މައުމޫމާތު ސާފުކޮށް ބިޑްފޮތް ގަނެފައިވާ ކަމަށެވެ.
ސޯބެ ވިދާޅުވީ ބިޑް ހުށަހަޅަން އޮތީ ފެބްރުއަރީ 14، 2012 ގައި ކަމަށާއި އެމްޑީޕީގެ ވެރިކަން ވައްޓާލީ ފެބްރުއަރީ 7، 2012 ގައި ކަމަށެވެ.
ސޯބެ ވިދާޅުވީ ވަކިވި ގޯތި ދޫކުރަން އޮތީ ސަރަހައްދީ ބަނދަރު ބޮޑުކުރުމުގެ ޕްރޮޖެކްޓާ ގުޅިގެން ލޭންޑް ޔޫސް ޕްލޭނެއް ހަދައިގެން އަލަށް ހިއްކޭ ސަރަހައްދުން ކަމަށެވެ. އެހެންނަމަވެސް 2012 ގައި ފުލުހުންނާއި ސިފައިން ސަރުކާރާ ދެކޮޅަށް ނުކުމެ ސަރުކާރު ބަދަލުވި ފަހުން ހައުސިންގ މިނިސްޓްރީގައި ހުންނަވަނީ މިހާރު ވެސް ހައުސިން މިނިސްޓަރަކަށް ހުންނެވި ޑރ. މުއިއްޒު ކަމަށާއި ވަކިކުރި ގޯތިތައް ނުދީ އޮތީ މުއިއްޒުގެ އިހުމާލުން ކަމަށެވެ. އަދި އެކަމުގެ ޒިންމާ ފުރިހަމައަށް މުއިއްޒު ނަންގަވަން ޖެހޭނެ ކަމަށް ސޯބެ ވިދާޅުވިއެވެ.
ޑެޕިއުޓީ މޭޔަރު މުހައްމަދު ޔަސްރިފް ކުރެއްވި ޓްވީޓެއްގައި ވިދާޅުވެފައި ވަނީ ބިންތައް ދޫކުރުމަށް އައްޑޫ ސިޓީ ކައުންސިލުން މަސައްކަތް ކުރި ކަމަށާއި 2014 ވަނަ އަހަރު އެ ސަރަހައްދުގެ މަގުތައް ހަދައިދިނުމަށް އެމްއާރުޑީސީ އަށް ސިޓީއަކުން ވެސް އެންގި ކަމަށެވެ. ނަމަވެސް ކައުންސިލްގެ މެންޑޭޓުން ބިންތައް ނެގީ ބިންތައް ދޫކުރިޔަ ނުދޭން ވެގެން ކަމަށް ޔަސްރިފް ވިދާޅުވެފައި ވެއެވެ. އޭގެ ބަދަލު އިންތިޚާބުގައި ހިފާނެ ކަމަށް ވެސް އޭނާ ވިދާޅުވިއެވެ.
