ގޭންގުތަކާ ގުޅުން އޮތް ކަމަށް ތުހުމަތުކުރެވޭ ފުލުހުންގެ މައްސަލަ ދަނީ ތަހުގީގު ކުރަމުން: ޑެޕިއުޓީ ކޮމިޝަނަރ އޮފް ޕޮލިސް ނަވީން
ތަހުގީގުތައް ވެސް އިތުރަށް ހަރުދަނާ ކުރުމަށް ކުރަންޖެހޭ މަސައްކަތްތައް ދަނީ ކުރަމުން
އާދިއްތަ ދުވަހު ގޭންގުތަކާ ބެހޭ ބިލު ތަސްދީގު ކުރެއްވުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން ވާހަކަދައްކަވަނީ
ގޭންގުތަކާ ގުޅުން އޮތް ކަމަށް ތުހުމަތުކުރެވޭ ފުލުހުންގެ މައްސަލަތައް ތަހުގީގު ކުރަމުންދާ ކަމަށް ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން ވިދާޅުވެއްޖެއެވެ.
އާދިއްތަ ދުވަހު ގޭންގުތަކާ ބެހޭ ބިލު ތަސްދީގު ކުރެއްވުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޑެޕިއުޓީ ކޮމިޝަނަރ އޮފް ޕޮލިސް ނަވީން ވިދާޅުވީ ގޭންގުތަކާ ބިލު ތަސްތީގު ކޮށްފައިވާއިރު، ތަންފީޒު ކުރުމަށް ތިން މަހު މުހުލަތެއް ލިބޭ ކަމަށާއި، އެ ކަމަށް ތައްޔާރުވުމުގެ މަސައްކަތްތައް ކުރަމުންދާ ކަމަށެވެ.
ނަވީން ވިދާޅުވީ ގޭންގް ކްރައިމް އެންފޯސްމަންޓެއް އުފެއްދިތާ ދުވަސްތަކެއް ވެފައިވާ ކަމަށާއި، އެމީހުން ތަމްރީން ކުރުމާއި، ތަހުގީގުތައް ވެސް އިތުރަށް ހަރުދަނާ ކުރުމަށް ކުރަންޖެހޭ މަސައްކަތްތައް މިހާރު ވެސް ކުރިއަށްދާ ކަމަށެވެ.
މީގެ އިތުރުން ނަވީން ވިދާޅުވީ ބައެއް ފުލުހުންގެ މައްޗަށް ބައެއް ތުހުމަތުތައް ކުރެވެމުންދާއިރު، ކުށްކުރާ މީހުންނާ ގުޅުން އޮންނަ ކަމަށް ވެސް ތުހުމަތުކުރެވޭ ކަމަށެވެ. އެހެންކަމުން ޕްރޮފެޝަނަލް ސްޓޭންޑް ކޮމާންޑްގެ ފަރާތުން އަދި ނޭޝަނަލް އިންޓަގްރިޓީ ކޮމިޝަންގެ ފަރާތުން މިފަދަ ފުލުހުންގެ މައްސަލަތައް ތަހުގީގު ކުރަމުންދާ ކަމަށް ނަވީން ވިދާޅުވިއެވެ.
ދެން އެންމެ ބޮޑު ކަމެއްގެ ގޮތުގައި ދެންމެ ފާހަގަކުރެއްވީ ފުލުހުންގެ މައްޗަށްވެސް ބައެއް ތުހުމަތުތައް އެބަ ހުއްޓޭ މިކަހަލަ ކުށްކުރާ މީހުންނަށް ގުޅުން އޮންނަ. އަޅުގަނޑު ހަމަ ޔަގީންކަން ދެން ބައެއް ފަރާތްތަކުގެ ބައެއް ތުހުމަތުތައް މިހާރު ވެސް އެދަނީ ބެލެމުން. ޕްރޮފެޝަނަލް ސްޓޭންޑް ކޮމާންޑްގެ ފަރާތުން އަދި ނޭޝަނަލް އިންޓަގްރިޓީ ކޮމިޝަންގެ ފަރާތުން ވެސް ދަނީ ބަލަމުން. މިގާނޫނު ތަންފީޒު ކުރާ ހިސާބުން ފެށިގެން ޔުނީފޯމް އެޅި އެއްވެސް ފުލުހަކު މި ކަހަލަ އެއްވެސް ކުށެއްގައި ނޫޅޭނެ ކަމުގެ ޔަގީންކަމާއި، ހަމައަށް ދިއުމަށްޓަކައި އަޅުގަނޑުމެން މޯލްޑިވްސް ޕޮލިސް ސަރވިސްގެ ހަމަ ހުރިހާ އެގްޒެކްޓިވް އޮފިސަރުން ވެސް އެމަސައްކަތް ކުރައްވާނެ. އެ ޔަގީންކަން ހަމަ އަޅުގަނޑު ރައްޔިތުންނަށް ދޭން ބޭނުންވޭ.ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން
ނަވީން ވިދާޅުވީ ރައްޔިތުންގެ އިތުބާރު ދެމެހެއްޓުމަށް މަސައްކަތް ކުރާނެ ކަމަށެވެ. އަދި ވިދާޅުވީ ގޭންގުތަކުން ހިންގާ ކުށްތަކާއި، އެނޫންވެސް ނުރައްކާތެރި ކުށްތައް ހުއްޓުވުމުގެ ހުރިހާ މަސައްކަތެއް ކުރާނެ ކަމަށެވެ.
