ވެރިކަން ހިންމުގެ ކަންކަން މާލޭގައި ޤާއިމްވެފައިވާ ފަދައިން މާލީ ކަންކަން ހިންގުމުގެ މައި ތަނަކަށް ހެދުމަކީ އުންމީދުކުރައްވާ ގޮތް ކަމަށް ރައީށް ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު އެފަދައިން ވިދާޅުވީ ހުޅުމާލޭގެ މާސްޓަރ ޕްލޭން އިފްތިތާހުކުރުމުގެ ރަސްމިއްޔާތުގައި ވާހަކަދައްކަވަމުންނެވެ. އެމަނިކުފާނު ވިދާޅުވީ ގްރޭޓަރ މާލޭ އޭރިއާގެ ފައިނޭންޝަލް ކެޕިޓަލް އަކަށް ހުޅުމާލެ ހެދުމަށް ހުޅުމާލޭގެ މާސްޓަރ ޕްލޭނުގެ ސަބަބުން މަގުފަހިވެގެންދާނެ ކަމަށެވެ. އެޗްޑީސީން ތައްޔާރުކޮށްފައިވާ މާސްޓަރޕްލޭނަކީ ހުޅުމާލޭގައި ކުރިއަށްގެންދިއުމަށް ވަރަށް ބޮޑަށް ފަސޭހަވެގެންދާނެ ކަމަށް އެ މަނިކުފާނު ވަނީ ވިދާޅުވެފައެވެ.

ތަރައްޤީގެ އެކި މަޝްރޫޢުތައް ކުރިއަށް ގެންދިއުމުގައި މަޝްރޫޢުތައް ގުޅި ލާމިގެން ކުރިއަށް ގެންދިއުމަށް މި މާސްޓަރ ޕްލޭންގެ ސަބަބުން މަގުފަހިވެގެންދާނެ ކަމަށް ރައީސް ވިދާޅުވިއެވެ. އަދި ދުރު ރާސްތާގެ މުސްތަޤްބަލަށް ވިސްނާ އިރު މިއީ ރަނގަޅު ޕްލޭނަކަށް ވެގެންދާނެ ކަމަށް ރައީސް ވަނީ ވިދާޅުވެފައެވެ. މީގެ އިތުރުން ދެމެހެއްޓެނެވި ގޮތެއްގައި ތަރައްޤީ ގެނައުމަށް ވެސް އެފަދަ ޕްލޭނެއް މުހިންމު ކަމަށް އޭނާ ވަނީ ވިދާޅުވެފައެވެ.

"މާލޭގައި ވެރިކަމުގެ އެޑްމިނިސްޓްރޭޓިވް ސީޓް ގާއިމްވެފައިވާގޮތަށް އެއަށް ކޮމްޕްލިމަންޓް ކުރަން ފައިނޭންޝަލް ސީޓަކީ ހުޅުމާލެ ކަމުގައި ހެދުމަކީ އަޅުގަނޑު އެންމެ ބޭނުންވާ ގުޅިލާމެހިފައިވާ ތަރައްޤީ އަކީ." ރައީސް ވިދާޅުވިއެވެ.

ހުޅުމާލެ ތަރައްގީ ކުރުމުގައި އެމަނިކުފާނު ވެވަޑައިގެންފައިވާ ހުރިހާ ވައުދުތައް އެޗްޑީސީއާއި ސަރުކާރުގެ މުއައްސަސާތައް ގުޅިގެން ކުރިއަށް ގެންދަވާނެ ކަމަށް ވެސް އެ މަނިކުފާނު ވަނީ ވިދާޅުވެފައެވެ.

ރައީސް ވިދާޅުވީ ދާދިފަހުން ތައާރަފުކުރި އިންޓަނޭޝަނަލް ފައިނޭންޝަލް ސެންޓަރ މަޝްރޫއަކީ ހުޅުމާލެ ފައިނޭންޝަލް ސިޓީ އަށް ހެދުމުގެ އުންމީދު ހަގީގަކަށް ހެދުމުގައި އިންގިލާބީ ބަދަލެއް އަންނާނެ ވަރަށް މުހިންމު މަސައްކަތެއް ކަމަށެވެ. ހުޅުމާލޭގެ މާސްޓަރ ޕްލޭނާއި ރަސްމީ ވެބްސައިޓް އިފްތިތާހުކޮށްދެއްވާފައި ވަނީ ރައީސް ޑރ.މުހައްމަދު މުއިއްޒު އެވެ.