ގަވައިދާ ޚިލާފަށް ސިނގިރޭޓް އެތެރެކުރި ބިދޭސީއަކު ހައްޔަރު ކޮށްފި
މެންޗެސްޓާރ ބްރޭންޑުގެ 32 ކާޓޫނު ސިނގިރެޓް ފެނިފައިވޭ
ވަގަށް ސިނގިރޭޓު އެތެރެކުރިކަމަށް ތުހުމަތު ކުރެވޭ ބިދޭސީ މިހާ
ގާނޫނާއި ގަވައިދާ ޚިލާފަށް ދިވެހި ރާއްޖެއަށް ސިނގިރޭޓް އެތެރުކޮށް ވިޔަފާރި ކުރާކަމަށް ތުހުމަތުކުރެވޭ މައްސަލައެއްގައި ބިދޭސީއަކު ހައްޔަރުކޮށްފިއެވެ.
މިކަމާއި ގުޅިގެން ފުލުހުން ބުނީ، މެއި މަހުގެ 23 ވަނަ ދުވަހުގެ ރޭ 12:15 ހާއިރު ވިލިމާލެ ފުލުހުން ހިންގި އޮޕަރޭޝަނެއްގައި ތިލަފުށު ބޯޓުޔާޑުގައި އޮތް ދޯންޏެއް ބަލައި ފާސްކުރިއިރު ގަވައިދާ ހިލާފަށް ރާއްޖެ އެތެރެކޮށްފައިވާ ކަމަށް ތުހުމަތުކުރެވޭ މެންޗެސްޓާރ ބްރޭންޑުގެ 32 ކާޓޫނު ސިނގިރެޓް ފެނިފައިވާ ކަމަށެވެ.
މެންޗެސްޓާ ބްރޭންޑުގެ ސިނގިރޭޓަކީ މި ފަހުން ދުންފަތުގެ ބާވަތްތަކުން ނަގާ ޑިއުޓީ ބޮޑު ކުރުމުން, ރާއްޖެއަށް ވަގަށް ގިނައިން އެތެރެކުރި ބާވަތެކެވެ. ބްލެކް މާކެޓުގައި އަގުހެޔޮކޮށް މި ބްރޭންޑުގެ ސިނގިރޭޓް ދިޔައީ ވިއްކަމުންނެވެ.
ފުލުހުން ބުނީ މި މައްސަލައާ ގުޅިގެން ބަންގްލަދޭޝްއަށް ނިސްބަތްވާ, އުމުރުން 45 އަހަރުގެ އަބްދުލް ކަރީމް ހައްޔަރުކޮށްފައިވާ ކަމަށެވެ. އޭނާއަކީ ގަވާއިދާ ހިލާފަށް ރާއްޖޭގައި އުޅެމުންދާ މީހެއްކަން ތަހުގީގަށް އެނގިފައިވާ ކަމަށް ވެސް ފުލުހުން ބުންޏެވެ.
މި މައްސަލައާ ގުޅިގެން ހައްޔަރުކޮށްފައިވަނީ އަބްދުލް ކަރީމް، ބަންގްލަދޭޝް (45އ) ކަމަށާއި އޭނާއަކީ ގަވާއިދާ ހިލާފަށް ރާއްޖޭގައި އުޅެމުންދާ މީހެއްކަން ވެސް ތަހުގީގަށް އެނގިފައިވާ ކަމަށް ފުލުހުން ބުނެއެވެ.
މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް އަމުރުކޮށްފައިވެއެވެ.
ދުންފަތާ ދެކޮޅަށް ސަރުކާރުން އެޅި ފިޔަވަޅުތަކުގެ ސަބަބުން ވޭޕް ބޭނުންކުރުން ރާއްޖޭގައި މަނާވެ, ސިނގިރޭޓްގެ އަގު ވަރަށް ބޮޑަށް ވަނީ އުފުލިފައެވެ. މިއާއެކު ވަގު ސިނގިރޭޓްގެ ބްލެކް މާކެޓެއް އޮތީ ވަރަށް ބޮޑަށް އުފެދިފައެވެ.
