ރައީސް މުއިއްޒު މާޅޮސްމަޑުލު އުތުރުބުރީގެ ރަށްތަކަށް ކުރެއްވި ދަތުރުފުޅަށް ހަތަރުލައްކައަށް ވުރެ ގިނަ ރުފިޔާ ޚަރަދުކުރިކަން ހާމަވެއްޖެ
23 މެއި 2025 | ހުކުރު 11:582025 ވަނަ އަހަރުގެ ޖެނުއަރީ 21 އިން 23 އަށް ރައީސް ކުރެއްވި ދަތުރުފުޅުގައި އެ އަތޮޅު 11 ރަށަކަށް ވަޑައިގަތް
މާޅޮސްމަޑުލު އުތުރުބުރީގެ ބައެއް ރަށްތަކަށް ރައީސް ކުރެއްވި ދަތުރުފުޅުގެ ތެރެއިން ރ. މާކުރަތުގައި
ރައީސް ޑރ. މުޙައްމަދު މުއިއްޒު މި އަހަރުގެ ޖެނުއަރީމަހުގެ 21 އިން 23 އަށް މާޅޮސްމަޑުލު އުތުރުބުރީ ރަށްތަކަށް ކުރެއްވި ދަތުރުފުޅުގެ ޚަރަދަށް ހަތަރު ލައްކައަށް ވުރެ ގިނަ ރުފިޔާ ޚަރަދުކޮށްފައިވާކަން ހާމަވެއްޖެއެވެ.
މިކަން ހާމަވީ މައުލޫމާތު ހޯދައި ލިބިގަތުމުގެ ޤާނޫނުގެ ހައްޤުގެ ދަށުން ރައީސް މާޅޮސްމަޑުލު އުތުރުބުރީ ރަށްތަކަށް ކުރެއްވި ދަތުރުފުޅުގެ ޚަރަދުގެ ތަފްސީލް ހޯދުމަށް "ރާއްޖެ އެމްވީ" ގެ ފަރާތުން ރައީސް އޮފީހަށް ހުށަހެޅި އާރްޓީއައިގެ ޖަވާބުގަ އެވެ.
ރައީސް އޮފީހުގެ އިންފޮމޭޝަން އޮފިޝަރ މަރްޔަމް ޝައުފާ ސޮއިކުރައްވާ ރާއްޖެ ޓީވީއަށް ފޮނުވި ޖަވާބު ފޯމުގައި ވިދާޅުވެފައި ވަނީ މައުލޫމާތު ހޯދައި ލިބިގަތުމުގެ ހައްޤުގެ ޤާނޫނުގެ ދަށުން 2025 ވަނަ އަހަރުގެ ޖެނުއަރީ 21 ޖެނުއއިން 23 އަށް ރައީސް ކުރެއްވި ދަތުރުފުޅުގެ ޚަރަދަށް 487،447.45 (ހަތަރު ލައްކަ އަށްޑިހަ ހަތް ހާސް، ހަތަރު ސަތޭކަ ސާޅީސް ހަތް ރުފިޔާ ސާޅީސް ފަސް ލާރި) ޚަރަދުވެފައިވާ ކަމަށެވެ.
ރައީސް މުޢިއްޒު މާޅޮސްމަޑުލު އުތުރުބުރީގެ ރަށްތަކަށް ކުރެއްވި މި ދަތުރުފުޅުގައި ވަނީ އެ އަތޮޅުގެ އެގާރަ ރަށަކަށް ވަޑައިގަންނަވާފައެވެ. ރައީސް ވަޑައިގެންނެވި ރަށްތަކަކީ އަނގޮޅިތީމު، ހުޅުދުއްފާރު، އިންނަމާދޫ، ކިނޮޅަސް، މާކުރަތު، މަޑުއްވަރި، ފައިނު، ރަސްގެތީމު، ރަސްމާދޫ، އަދި އުނގޫފާރެވެ.
ރައީސް އޮފީހުން އޭރު ބުނެފައި ވަނީ މި ދަތުރުފުޅުގައި އެކި ރަށްރަށުގެ ތަރައްޤީއަށް ކުރިއަށްގެންދާ މަޝްރޫޢުތައް ފައްޓަވައިދެއްވުމަށާއި ބައެއް ރަށްރަށުގައި ޤާއިމުކޮށް ނިމިފައިވާ ޚިދުމަތްތައް އިފުތިތާހުކޮށްދެއްވުމަށް ހަމަޖެހިފައިވާ ކަމަށެވެ. ނަމަވެސް އަދި ވެސް އެ ވިދާޅުވި މަޝްރޫޢުތަކެއް ފެއްޓިފައި ނުވެއެވެ.
އަދި މި ދަތުރުފުޅުގައި އެ ރަށްތަކަށް ރައީސް މުއިއްޒު ވަޑައިގެން ދެއްކެވި އެއްވެސް ވާހަކައަކާއި ހަމަލާއި ދިމާނުވާކަމަށް އިދިކޮޅުފަރާތްތަކުން ވަނީ ބުނެފައެވެ.
