ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އިނގިރޭސިވިލާތުގެ ލިވަޕޫލް ސިޓީއަށް ކުރެއްވި ދަތުރުފުޅަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން އެއްވެސް ޚަރަދެއް ކޮށްފައިނުވާނޭ ކަމަށް އެ ކޯޕަރޭޝަނުން ބުނެފިއެވެ.

އެމްއެމްޕީއާރުސީން މިފަދައިން ބުނެފައި ވަނީ މައުލޫމާތު ހޯދައި ލިބިގަތުމުގެ ޤާނޫނުގެ ހައްޤުގެ ދަށުން ރައީސް ލިވަޕޫލްއަށް ކުރެއްވި ދަތުރުފުޅަށް އެ ކޯޕަރޭޝަނުން ހަރަދުކުރީ ކިހާވަރެއްތޯ ސާފުކުރުމަށް "ރާއްޖެ އެމްވީ" ގެ ފަރާތުން ރައީސް އޮފީހަށް ހުށަހެޅި އާރްޓީއައިގެ ޖަވާބުގަ އެވެ.

އެމްއެމްޕީއާރުސީގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝިއުރީ ސޮއިކުރައްވާ ރާއްޖެ ޓީވީއަށް ފޮނުވި ޖަވާބު ސިޓީގައި ވިދާޅުވެފައި ވަނީ މައުލޫމާތު ހޯދައި ލިބިގަތުމުގެ ހައްޤުގެ ޤާނޫނުގެ ދަށުން 10 އޭޕްރީލް 2025 ވަނަ ދުވަހު ރައީސް ލިވަޕޫލްއަށް ކުރެއްވި ދަތުރުފުޅަށް އެއްވެސް ޚަރަދެއް އެ ކޯޕަރެޝަނު ކޮށްފައި ނުވާނެކަމަށެވެ.

އެއްވެސް ކަމެއްގައި ފޮރުވުމެއް، އޮޅުވާލުމެއް، ސިއްރުކުރުމެއް ނޯންނާނެ ކަމަށް މި ސަރުކާރުން ބުނި ނަމަވެސް ކަންކަން ފެނިގެންދަނީ އެގޮތަކަށް ނޫނެވެ. ފެނިގެންދަނީ އެންމެ އާދާއިގެ ކަންކަން ވެސް ރައްޔިތުންނަށް ފޮރުވާ އޮޅުވާލަން މަސައްކަތްކުރާ މަންޒަރުކަމަށް ގިނަ ބަޔަކު އަންނަނީ ބުނަމުންނެވެ.

ރައީސް މުއިއްޒު އިނގިރޭސިވިލާތަށް ފުރާވަޑައިގެންނެވީ މިދިއަ އޭޕްރީލް މަހުގެ އެއްވަނަ ދުވަހުގައެވެ. އަދި ދަތުރުފުޅު ނިންމަވާލެއްވުމަށް ފަހު އެނބުރި ގައުމަށް ވަޑައިގަތީ އޭޕްރީލް މަހުގެ ފަސްވަނަ ދުވަހުގައެވެ.

ރައީސް ލިވަޕޫލަށް ކުރެއްވި ދަތުރުފުލަކީ އިނގިރޭސިވިލާތުގެ ލިވަޕޫލް ފުޓްބޯލް ކްލަބް (ލިވަޕޫލް އެފް.ސީ) އާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރު.ސީ) / ވިޒިޓް މޯލްޑިވްސްއާ ގުޅިގެން، ދިވެހިރާއްޖޭގެ ފަތުރުވެރިކަން އިޝްތިހާރު ކުރުމަށް ކުރިއަށްގެންދާ ކޯ-ބްރޭންޑް ކެމްޕޭން ހަރަކާތް ފެށުމުގައި ބައިވެރިވެވަޑައިގަތުމަށް ކަމަށް ރައީސް އޮފީހުން ވަނީ ބުނެފައެވެ.