މި ސަރުކާރަށް މިހާތަނަށް ބޭރުން އެންމެ ޑޮލަރެއް ވެސް ހޯދިފައެއްނުވޭ، ރިޒާވް މެނޭޖްނުކުރެވޭ: ކުރީގެ ފިނޭންސް މިނިސްޓަރު
ވިޔަފާރިތައް ދަށްވެ، ބްލެކް މާކެޓްގައި ޑޮލަރުގެ ރޭޓް ދަނީ މަތިވަމުން
ނޫސްވެރިންގެ ބައްދަލުވުމެއްގައި ކުރީގެ ފިނޭންސް މިނިސްޓަރު އިބްރާހިމް އަމީރު ވާހަކަދައްކަވަނީ
މި ސަރުކާރަށް މިހާތަނަށް ރާއްޖެއިން ބޭރުން އެންމެ ޑޮލަރެއް ވެސް ހޯދިފައިނުވާ ކަމަށާއި، ރިޒާވް މެނޭޖްނުކުރެވޭ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި އަމީރު ވިދާޅުވީ ރައީސް ޑރ.މުހައްމަދު މުއިއްޒުގެ ޑޮލަރު މާރުކުރުމުގެ ސިޔާސަތުގެ ސަބަބުން އޭގެ ނޭދެވޭ އަސަރު ހުރިހާ ވިޔަފާރިއަކަށް ކުރާނެ ކަމަށާއި، އެކަން މިއަދު ފެންނަމުންދާ ކަމަށެވެ. ވިޔަފާރިތައް ދަށްވެ، ބްލެކް މާކެޓްގައި ޑޮލަރުގެ ރޭޓް މަތިވަމުންދާ ކަމަށް އޭނާ ވިދާޅުވިއެވެ.
އަމީރު ވިދާޅުވީ މިސަރުކާރުގައި ޑޮލަރުގެ ރޭޓް ދަށް ނުވާ ކަމަށާއި، ރޭޓް ހުރީ 19.40 ނުވަތަ 19.30 ގައި ކަމަށެވެ. އަދި ދުވަހަކުން ދުވަހެއް ދަނީ މަތިވަމުން ކަމަށާއި، ހާލަތު ދަނީ ގޯހުން ގޯހަށް ކަމަށެވެ. ޓޫރިޒަމް ވިޔަފާރިތަކާއި ޑޮލަރުން އާމްދަނީ ލިބޭ ބޮޑެތި ވިޔަފާރިތަކުގެ އާމްދަނީން ބައެއް މާރުކުރަން މަޖުބޫރުކުރި ފަހުން މިހާތަަނަށް 5 މަސްވެގެންދާއިރު، ރަނގަޅު ނަތީޖާއެއް ނުފެންނަކަމަށް އޭނާ ވިދާޅުވިއެވެ.
މި ސަރުކާރަށް މިހާތަނަށް ރާއްޖެއިން ބޭރުން އެއްވެސް ޑޮލަރެއް ހޯދިފައިނުވާކަން ފާހަގަކުރައްވައި އަމީރު ވިދާޅުވީ ރިޒާވް މެނޭޖްނުކުރެވޭ ކަމަށާއި، ރިޒާވް މެނޭޖުކުރުމަށް ބޭރުގެ އެހީތެރިކަން ބޭނުންވާ ކަމަށެވެ. ޑޮލަރު މާރުގެ ކުރުމުގެ ސިޔާސަތު ބަދަލު ކޮށްފައިވަނީ ސަރުކާރުގެ ބޭނުމަށް ކަމަށާއި، ސަރުކާރުން ކުރިއަށް އޮތްތަނުގައި ރިޒާވްގެ ފައިސާ ބޭނުންކުރާނެ ކަމަށް އޭނާ ވިދާޅުވިއެވެ. އަދި ވިދާޅުވީ ސަރުކާރުގެ ކުންފުނިތަކުން ދަރަނި އަދާކުރުމަށާއި، ސަރުކާރު ކުންފުނިތަކުން ބޭނުންވާ ކަންކަމަށް އެފައިސާ ބޭނުންކުރާނެ ކަމަށެވެ.
އެމްއެމްއޭއިން ކުރިން މާރުކުރަމުން އައީ 60 ޕަސެންޓް. މިހާރު އިތުރަށް 30 ޕަސެންޓް. 90 ޕަސެންޓަށް މާރުކުރާ ގޮތަށް ބަދަލުކުރީ. އެހެންވީމަ އަޅުގަނޑަށް ގަބޫލުކުރެވެނީ އަސްލު އެއްކަމަކަށް ސަރުކާރަށް ބޭރުން ފަންޑިންގ ނުލިބިގެން ރިޒާވް މެނޭޖްކުރަން ދަތިތަކެއް ހުރީމަ އެމްއެމްއޭއިން ގެނެވުނު ބަދަލެއް. އެންމެ ފުރަތަމަ އެންމެ މުހިންމު ކަމަކީ މިހާތަނަށް 2 އަހަރުވެގެންދާއިރު ސަރުކާރަށް ބޭރުން އެންމެ ޑޮލަރެއް ވެސް ގެނެވިފައިނުވޭ ރިޒާވް މެނޭޖްކުރަން. މިދިޔަ ހުރިހާ އަހަރުތަކެއްގައި ވެސް ރާއްޖޭގެ ރިޒާވް މެނޭޖްކުރަން އެންމެ މުހިންމު އެއްކަމަކަށްވޭ ސަރުކާރުތަކުން ބޭރުން ގެންނަ ފައިސާ ހަމަ އަޅުގަނޑުމެންގެ ސަރުކާރުގައި ވެސް ރައީސް ޔަމީންގެ ސަރުކާރުގައި ވެސް އަދި އޭގެ ކުރީ ސަރުކާރުތަކުގައި ވެސް ރިޒާވް މެނޭޖްކުރަން ބޭރުން ސަރުކާރުން ގެންނަ ފައިސާއަކީ ވަރަށް މުހިންމު ފައިސާއަކަށްވެގެންދޭ. އެކަމަކު މިހާތަނަށް މިސަރުކާރުން އެންމެ ޑޮލަރެއް ވެސް ނުގެނެވޭ.ކުރީގެ ފިނޭންސް މިނިސްޓަރު އިބްރާހިމް އަމީރު
އަމީރު ވިދާޅުވީ މިސަރުކާރުގައި ކުރިއަށް އޮތްތަނުގައި ވިޔަފާރިތަކަށް ވަރަށް ދަތިވާނެ ކަމަށާއި، އާއްމު ފަރުދުންނަށް ޑޮލަރުގެ ދަތިކަން ކުރިމަތިވާނެ ކަމަށެވެ. އަދި ވިޔަފާރިވެރިން ބޭރުން މުދާ ގަތުމަށް ބޭރަށް ޓީޓީ މެދުވެރިކޮށް ފޮނުވަންޖެހޭ ފައިސާ ފޮނުވުމަށް ވެސް މި 90% ނަގަން ފެށުމުން އުދަނގޫވެ ދަތިވާނެ ކަމަށް އޭނާ ވިދާޅުވިއެވެ.
