ދުންފަތް ކޮންޓްރޯލް ކުރުމާއި ބެހޭ ޤާނޫނަށް ގެނެވޭ ބަދަލާއެކު ރާއްޖޭގައި ބްލެކް މާކެޓެއް އުފެދިދާނެތޯ ސުވާލުކުރުމުން ރައީސް ޑރ. މުޙައްމަދު މުޢިއްޒު ވިދާޅުވީ ދިވެހި ރާއްޖެއަކީ ޔުނިކް ޤައުމެއް ކަމަށެވެ.

ދުންފަތް ކޮންޓްރޯލް ކުރުމާއި ބެހޭ ޤާނޫނަށް 2 ވަނަ އިސްލާހު ގެނައުމުގެ ބިލު ތަސްދީގު ކުރެއްވުމުގެ ރަސްމިއްޔާތުގައި ނޫސްވެރިއަކު ރައީސާ ކުރެއްވި ސުވާލަކީ، ނިއުޒިލޭންޑުގައި 2022 ވަނަ އަހަރު ހަމަ މިކަހަލަ ގާނޫނެއް ގެނެވުނު ކަމަށާއި އަދި 2023 ވަނަ އަހަރު ވަނީ އަނބުރާ ގެނެސްފައިކަމަށެވެ. އަދި އެބަދަލު އަނބުރާ ގެނެސްފައިވަނީ ބްލެކް މާކެޓަކަށް ދާނެކަމަށް ބެލެވޭތީ ކަމަށް ބުނާއިރު ރާއްޖޭގައި އެފަދަ ސިޓުއޭޝަނެއްގައި އަމަލުކުރާނި ކޮންގޮތަކަށްތޯއޭ ސުވާލު ކުރުމުން ރައީސް ދެއްވި ޖަވާބުން ހާމަވީ ސަރުކާރުން އެފަދަ ސިޓުއޭޝަނަކަށް ރެޑީވެފައިނެތްކަމެވެ.

ރައީސް ވިދާޅުވީ، ރާއްޖޭއަކީ 5 ލައްކަ މީހުން ހަމަ ނުވާ ކުޑަކުޑަ އާބާދީއެއް ކަމަށާއި ބްލެކް މާކެޓެއް އުފެދެންޖެހޭ ސަބަބެއް ނެތް ކަމަށެވެ.

ދުންފަތް ކޮންޓްރޯލް ކުރުމާއި ބެހޭ ޤާނޫނަށް 2 ވަނަ އިސްލާހު ގެނައުމުގެ މިއަދު ތަސްދީގު ކޮށްފައިވާއިރު ދުންފަތާ ބެހޭ މާސްޓާ ޕްލޭން އަދި ވުޖޫދު ނުވެއެވެ. ދުންފަތާ ގުޅޭ މާސްޓާ ޕްލޭނެއް ހަދަން ރައީސް ކެބިނެޓަށް އެންގެވީ އޮކްޓޯބަރު 16، 2024، ގަ އެވެ. އެ މާސްޓާ ޕްލޭން ހަދަން ރައީސް ދެއްވި ސުންގަޑި ވެސް ވަނީ ހަމަވެފަ އެވެ. އެ މާސްޓާ ޕްލޭން ހެދުމަށްފަހު ވަޒީރުންގެ މަޖިލީހަށް ހުށަހަޅަން ދިން ސުންގަޑިއަކީ އޮކްޓޯބަރު 27، 2024، އެވެ.