ޅ. ގާއެރި ފަޅު ކައިރިއަށް ފީނަން ނުކުމެ އުޅުނު ބަޔަކު ތިބި ޑިންގީއެއްގައި ލޯންޗެއް ޖެހި ފަސް މީހަކަށް އަނިޔާވެއްޖެއެވެ.

ފުލުހުން ބުނީ ރޭ ދަންވަރު 12:33 ހާއިރު އެކްސިޑެންޓު ހިނގައިގެން ފުލުހުންނަށް ރިޕޯޓު ކޮށްފައިވާކަމަށެވެ. އަދި މި އެކްސިޑެންޓްގައި، ޑިންގީގައި ތިބި ފަސް މީހުންނަށް އެކި ވަރުގެ އަނިޔާތަކެއް ވެފައިވާ ކަމަށާއި އަދި އެއީ ފަސް ދިވެހި ފިރިހެނުން ކަމަށް ފުލުހުން ބުނެއެވެ.

މީގެ އިތުރުން ފުލުހުން ބުނީ އޭގެ ތެރެއިން އެކަކަށް ސީރިއަސް އަނިޔާތަކެއް ވެފައިވާކަމަށް ފުލުހުންނަށް މައުލޫމާތު ލިބިފައިވާކަމަށާއި އަނިޔާވި ފަސް މީހުންނަށް ޅ. އަތޮޅު ހޮސްޕިޓަލުގައި ފަރުވާދެމުންދާކަމަށެވެ.

އަދި މި އެކްސިޑެންޓުގައި ހިމެނޭ ޑިންގީ ބޭނުން ނުކުރެވޭ ވަރަށް ހަލާކުވެފައިވާކަމަށް ފުލުހުން މައުލޫމާތުދެއެވެ.