ހަނގުރާމަ ހުއްޓާލުމުގެ މަޝްވަރާ ފެށުމަށް ޕުޓިން ތައްޔާރު ކަމަށް ޓްރަމްޕް ވިދާޅުވެއްޖެ
20 މެއި 2025 | އަންގާރަ 06:53އެ ފޯނު ކޯލަށް ފަހު ޓްރަމްޕް ވިދާޅުވެފައި ވަނީ، ޔުކްެރެއިން ހަނގުރާމަ ހުއްޓުވުމަށްޓަކައި ވަގުތުން މަޝްވަރާތައް ފެށުން ޕުޓިން އެއްބަސްވެ ވަޑައިގެންފައިވާ ކަމަށެވެ.
ރަޝިޔާގެ ރައީސް ޕުޓިން، އެމެރިކާގެ ރައީސް ޓްރަމްޕް އަދި ޔުކްރެއިންގެ ރައީސް ޒެލެންސްކީ
ރަޝިޔާ އިން ޔުކްރެއިން ގައި ހިންގަމުން އަންނަ ހަނގުރާމަ ނިމުމަކަށް ގެނައަށްޓަކައި މަޝްވަރާ ކުރަން، ރަޝިޔާގެ ރައީސް ވްލަޑިމިއާ ޕުޓިން ހުންނެވީ ތައްޔާރަށް ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ރަޝިޔާ ޔުކްރެއިން ހަނގުރާމަ ނިންމުމަށް ވަރަށް ބޮޑަށް ބާރު އަޅުއްވަމުން އަންނަ ޓްރަމްޕް ވަނީ، ހޯމަ ދުވަހު ފޯނު މެދެވެރިކޮށް ޕުޓިންއާ މަޝްވަރާ ކުރައްވާފައި އެވެ. ދެ ރައީސުންގެ އެ ފޯނު ކޯލު ގާތް ގަނޑަކަށް ދެ ގަޑިއިރަށް ވުރެ ދިގު ދެމިގެން ދިޔަ އެވެ.
އެ ފޯނު ކޯލަށް ފަހު ޓްރަމްޕް ވިދާޅުވެފައި ވަނީ، ޔުކްެރެއިން ހަނގުރާމަ ހުއްޓުވުމަށްޓަކައި ވަގުތުން މަޝްވަރާތައް ފެށުން ޕުޓިން އެއްބަސްވެ ވަޑައިގެންފައިވާ ކަމަށެވެ.
ފާއިތުވި ހަފުތާގެ ތެރޭގައި ތުރުކީގެ އިސްތަންބޫލުގައި ވަނީ ރަޝިޔާ އަދި ޔުކްރެއިންއާ ދެމެދު މަޝްވަރާތައް ބާއްވާފައި އެވެ. މިއީ 2022 ވަނަ އަހަރުގެ ފަހުން މި ދެ ޤައުމުގެ ދެމެދުގައި މަޝްވަރާ ބައްދަލުވުން ބޭއްވުނު ފުރަތަމަ ފަހަރެވެ. ނަމަވެސް އެ ބައްދަލުވުމުގައި ވެސް ހަނގުރާމަ ހުއްޓާލުމާ ގުޅޭ އެއްވެސް އެއްބަސްވުމަކާ ހަމަައަށް ވާސިލްވެވިފައި ނުވެ އެވެ.
ޓްރަމްޕް އިތުރަށް ވިދާޅުވެފައިވާ ގޮތުގައި ޕުޓިން އާއެކު ކުރެއްވި ކާމިޔާބު މަޝްވަރާތަކަށް ފަހު، ފްރާންސް، އިޓަލީ، ޖަރުމަނު އަދި ފިންފެލްންޑުގެ ލީޑަރުންނާ އެކު ވެސް ވަނީ މަޝްވަރާ ކުރައްވާފައި އެވެ. އެ މަޝްވަރާތަކުގައި ޔުކްރެއިންގެ ރައީސް ވުލެޑިމިއަރ ޒެލެންސްކީ ވެސް ވަނީ ބައިވެރިވެ ވަޑައިގެންފަ އެވެ.
އިތުރަށް ޓްރަމްޕް ވިދާޅުވެފައި ވަނީ ޔުކްރެއިން ހަނގުރާމަ ނިންމުމަށް ފަހު، ރަޝިޔާ އިން އެމެރިކާއާ އެކު ވިޔަފާރީގެ ގުޅުން ފުޅާ ކުރުމަށް ބޭނުންވާ ކަމަށެވެ. އަދި ހަމަ އެހެންމެ، ހަނގުރާމަ ނިންމުމަށް ފަހު، ޔުކްރެއިން އަލުން ބިނާ ކުރުމުގެ މަސައްކަތް ކުރެވިގެން ދާނެ ކަމަށް ވެސް އޭނާ ވިދާޅުވި އެވެ.
ޔުކްރެއިން އިން އޮތީ ހަނގުރާމަ ހުއްޓާލުމުގެ އެއްބަަސްވުމަށް ޤަބޫލު ވާނެ ކަމަށް ހާމަކޮށްފަ އެވެ. އަދި ވަގުތުން ހަނގުރާމަ ހުއްޓާލުމަށް ތައްޔާރަށް އޮތްކަން ވެސް ހާމަކޮށްފަ އެވެ.
ނަމަވެސް، މީގެ ކުރިން ރަޝިޔާ އިން ވަނީ ހަނގުރާމަ ހުއްޓާލުމަށް ޝަރުތުތަކެއް ކޮށްފަ އެވެ. އޭގެ ތެރޭގައި ޔުކްރެއިން އިން އެ ޤައުމުގެ ބިމުން ބައެއް ދޫކޮށްލުން ވެސް ހިމެނެ އެވެ. ނަމަވެސް، އެ ޝަރުތުތަކާ ދެކޮޅު ހަދާކަން ޔުކްރެއިން އިން ވަނީ ހާމަކޮށްފަ އެވެ.
