ރައީސް މުއިއްޒު ލާމަރުކަޒީ ނިޒާމު އަގުވައްޓާލަން ދައްކަވާ ވާހަކަތައް ޑިމޮކްރެޓްސްއިން ކުށްވެރިކޮށްފި
16 މެއި 2025 | ހުކުރު 16:12ރައީސްވަނީ ޕީއެންސީގެ ނުފޫޒުގަދަ މަޖިލީސް މެންބަރުން ލައްވާ " ކުރީ ކަތީބުން ތިބިއިރު މާ ރަނގަޅުކަމަށް" ވާހަކަ ދައްކުވާފައި
ޑިމޮކްރެޓްސް އިން ވަގުފޯމްގެ މައްސަލަ ހުށަހެޅުމަށް ފުލުހުންގެ އިދާރާއަށް ދިއުން
ރައީސުލްޖުމްހޫރިއްޔާ ޑރ. މުުހައްމަދު މުއިއްޒު، ލާމަރުކަޒީ ނިޒާމު އަގުވައްޓާލަން ދައްކަވާ ވާހަކަތައް ކުށްވެރިކޮށް ޑިމޮކްރެޓްސްއިން ކަންބޮޑުވުން ފާޅުކޮށްފިއެވެ.
ޑޮމޮކްރެޓްސް އިން ނެރުނު ނޫސްބަޔާނެއްގައި ބުނީ، މާލޭގެ މޭޔަރު ކަމުގައި ހުންނަވައިގެން ލާމަރުކަޒީ ނިޒާމު ހިންގަން ހުރި ދަތިތަކުގެ ވާހަކަތައް އެންމެ ގިނައިން ދައްކަވާ އަދި ލާމަރުކަޒީ ނިޒާމު ޗެމްޕިއަން ކުރައްވާނެ ކަމުގެ ބޮޑު ވައުދާއެކު ވަޑައިގެންނެވުމަށްފަހު ކަނޑައެޅިގެން އެ ނިޒާމަށް ކުޑައިމީސްކޮށް އަގު ވައްޓާލަން ޑރ. މުޙައްމަދު މުޢިއްޒު މަސައްކަތް ކުރައްވާ އަދި ކަނޑައެޅިގެން ދޮގު ވާހަކަތައް ދައްކަވަމުން ގެންދަވާތީ، އެޕާޓިން ނުހަނު ކަންބޮޑުވާ ކަމެއްކަމަށެވެ.
އެޕާޓީން ބުނީ އެމަނިކުފާނު ކުރިއަށްގެންދަވާ ޕޮޑްކާސްޓްގައި ދައްކާފައިވާ ވާހަކަފުޅެއްގައި ކައުންސިލްތަކަށް ލިބޭ ބްލޮކް ގްރާންޓް ނަގައިގެން ކައުންސިލްތަށް އޮތްގޮތަށް ދަނީ ތަޖުރިބާ ދަތުރުކިޔާފައި ބެންކޮކަށްކަމަށް ވިދާޅުވެފައެވެ.
އަދި މިދިޔަ އަހަރުގެ ޖުމްހޫރީ ދުވަހުގެ ރަސްމީ ޖަލްސާގައި ތަގުރީރުކުރައްވަމުން "ސަތޭކަ މީހުން ހަމަނުވާ ރަށެއްގައިވެސް ފަސް ކައުންސިލަރުން އެބަތިއްބޭ، ކައުންސިލުގައި މިތިބެނީ ބައްޕައާ މަންމައާ ދަރިންނޭ، އެއްބަޔަކު މިދަނީ މަހަށޭ" ވިދާޅުވެ ވަނީ ކަނޑައެޅިގެން ދޮގު މައުލޫމާތު ބޭނުން ކޮށްފައިކަމަށް އެޕާޓީން ނެރުނު ނޫސްބަޔާނުގައި ބުނެފައެވެ.
މީގެ އިތުރުން ވެރިކަންކުރާ ޕީއެންސީގެ ނުފޫޒުގަދަ މަޖިލީސް މެންބަރުން ލައްވާ "ކުރީ ކަތީބުން ތިބިއިރު މާ ރަނގަޅުކަމަށް" ވާހަކަ ދައްކުވާފައިވާ ކަމަށްވެސް އެޕާޓީން ބުނެފައިވެއެވެ.
ޑިމޮކްރެޓްސްއިން ވަނީ ރައީސް މުއިއްޒު ވެރިކަމަށް ވަޑައިގެންނެވިއިރު، ވެވަޑައިގެންނެވި ވައުދުތައް ހަނދާން އައު ކޮށްދީ އެ ވައުދުތަކާއި އެއްގޮތަށް އަމަލު ކުރެއްވުމަށް އެމަނިކުފާނަށް ނަސޭހަތްތެރިވެފަ އެވެ.
