އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ، އިތުރު ދައުރަކަށް ވާދަ ކުރައްވާނެ ކަމަށް އިއުލާން ކުރައްވައިފި އެވެ.

ޗެނަލް 14 ގެ ޕްރޮގްރާމެއްގައި ބައިވެރިވެ ވަޑައިގެން ވާހަކަ ދައްކަވަމުން ނަތަންޔާހޫ ވިދާޅުވެފައި ވަނީ، 2026 ވަނަ އަހަރުގެ ނޮވެމްބަރު މަހު ބޭއްވުމަށް ހަމަޖެހިފައިވާ އިންތިޚާބުގައި ވާދަ ކުރައްވާނެ ކަމަށެވެ. އަދި އެ އިންތިޚާބު ކާމިޔާބު ކުރެވޭނެ ކަމުގެ އުންމީދު ވެސް ބޮޑު ކަމަށް އޭނާ ވަނީ ވިދާޅުވެފަ އެވެ.

އިސްރާއީލްގެ ކަނާއަތު ފިޔައިގެ ޕާޓީ އެއް ކަމަށްވާ ލިކުޑްގެ ލީޑަރުކަން ކުރައްވާ ނަތަންޔާހޫ އަކީ، އިސްރާއީލްގެ ބޮޑު ވަޒީރު ކަމުގައި އެންމެ ދިގު މުއްދަތެއް ވަންދެން ހުންނެވި ފަރާތެވެ. އެގޮތުން 1996 ވަނަ އަހަރުގެ ފަހުން، މެދު ކެނޑުމެއް ނެތި 18 އަހަރަށް ވުރެ ގިނަ ދުވަހު އޭނާ ވަނީ ބޮޑު ވަޒީރުކަން ކުރައްވައިފަ އެވެ.

އެންމެ ފަހުން އޮތް އިންތިޚާބުގައި ނަތަންޔާހޫގެ ޕާޓީ އިން ވަނީ ޤާނޫނު ހަދާ މަޖިލީހުގެ 32 ގޮނޑި ކާމިޔާބު ކޮށްފަ އެވެ. އޯތޮޑޮކްސް އެލައިސް އަށް 18 ގޮނޑި ކާމިޔާބު ކުރެވުނުއިރު، ރިލިޖަސް ޒައިއޮނިޒަމް އެލައެންސް އިން ވަނީ 14 ގޮނޑި ކާމިޔާބު ކޮށްފަ އެވެ.

އިތުރު ދައުރަކަށް ވާދަ ކުރައްވާނެކަން ނަތަންޔާހޫ އިއުލާން ކުރައްވާފައިވާއިރު، އެ ޤައުމުގައި އޭނާ އަށް ވަނީ ޕްރެޝަރު ބޮޑުވެފަ އެވެ. އެގޮތުން ޣައްޒާގައި އިސްރާއީލް އިން ހިންގަމުން އައި ހަނގުރާމައިގެ ސަބަބުން، ހަމާސް އިން ރަހީނު ކޮށްފައި ތިބި އިސްރާއީލްގެ ރައްޔިތުން މިނިވަން ކުރުމަށް ގޮވާލާ އޭނާގެ ސަރުކާރާ ދެކޮޅަށް އެތައް ހާސް އިސްރާއީލުގެ ރައްޔިތުން އެތައް މުޒާހާރާ އެއް ކޮށްފައިވެއެވެ.

ނަމަވެސް، އިތުރު ދައުރަކަށް ވާދަ ކުރައްވާކަން ނަތަންޔާހޫ އިއުލާން ކުރެއްވިއިރު، މިހާރު ވަނީ ޣައްޒާ ހަނގުރާމަ ހުއްޓާލުމުގެ އެއްބަސްވުން ޤާއިމު ކޮށްފަ އެވެ. އޭގެ ތެރެއިން ދިރި ތިބި އެންމެން މިނިވަން ކޮށްފައިވާއިރު، މިހާރު ހަމާސް އިން އަންނަނީ މަރުވެފައިވާ މީހުންގެ ހަށިގަނޑުތައް ހަވާލު ކުރުމުގެ މަސައްކަތް ކުރަމުންނެވެ.