ނާސިރު ހޮސްޕިޓަލް އަށް އިސްރާއީލުން ބޮން އަޅައިފި

އިސްރާއީލީ ބާރުތަކުން ޚާން ޔޫނިސްގައި ހުންނަ ނާސިރު މެޑިކަލް ކޮމްޕްލެކްސް އަށް ބޮން އަޅައި، ދެ މީހަކު ޝަހީދު ކޮށްލައިފިއެވެ. އޭގެ ތެރޭގައި ނޫސްވެރިޔަކު ހިމެނޭ ކަމަށް އަލް ޖަޒީރާ އިން ބުނެފައިވެއެވެ. މިހަމަލާގެ ސަބަބުން ހޮސްޕިޓަލަށް ބޮޑެތި ގެއްލުންތަކެއް ލިބުމުގެ އިތުރުން އެތައް ބަލިމީހުންނާއި މުވައްޒަފުންނަށް އަނިޔާވެފައިވާ ކަމަށް ރިޕޯޓުތައް ބުނެއެވެ.

އަނެއްކޮޅުން އިސްރާއީލުގެ ފިއްތުންތަކުގެ ސަބަބުން ޣައްޒާގެ މުޅި އާބާދީ އަށް ބަނޑުހައިހޫނުކަމުގެ ނުރައްކާ ކުރިމަތިވެފައިވާ ކަމަށް ކަމާ ބެހޭ ބައިނަލް އަގްވާމީ ޖަމާއަތްތަކުން ވަނީ ބުނެފައެވެ. ބަނޑުހައިހޫނުކަން އިތުރުވަމުން ދިއުމާއެކު އދ.ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް ވަނީ އިސްރާއީލުން ޣައްޒާއަށް އަޅާފައިވާ ބްލޮކޭޑް ނިމުމަކަށް ގެނައުމަށް ގޮވާލައްވާފައެވެ.

އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ވިދާޅުވެފައިވަނީ ހަމާސްގެ ބަންދުގައި ތިބި މީހުންގެ ތެރެއިން އެމެރިކާ-އިސްރާއީލު ސިފައިންގެ މީހަކު ދޫކޮށްލުމާ ގުޅިގެން، ހަމަލާތައް ހުއްޓުމަކަށް ގެނައުމާ ބެހޭ މަޝްވަރާތަކަށް މެދުވެރިއެއްގެ ދައުރު އަދާ ކުރާ ޤަތަރަށް އިސްރާއީލުގެ މަންދޫބުން ފޮނުވާނެ ކަމަށެވެ. އޭގެ އިތުރުން އޭނާގެ އޮފީހުން ބުނެފައިވަނީ އެމެރިކާގެ ރައީސް ޑޮނަލްޑް ޓްރަމްޕް މެދުއިރުމަތީގެ ދަތުރުފުޅު ނިމެންދެން ޣައްޒާ ގައި ހަނގުރާމަ ފުޅާކުރުމުގެ ރޭވުންތައް ފަސްކުރާނެ ކަމަށެވެ.

ޣައްޒާގެ ސިއްހީ ވުޒާރާއިން ބުނާ ގޮތުގައި އިސްރާއީލުން ޣައްޒާ ގައި ކުރަމުންދާ ހަނގުރާމައިގައި މަދުވެގެން 52,908 ފަލަސްތީނު މީހުން މަރުވެ، 119,721 މީހުންނަށް އަނިޔާވެފައިވެއެވެ. ސަރުކާރުގެ މީޑިއާ އޮފީހުން މަރުވި މީހުންގެ އަދަދު އަޕްޑޭޓްކޮށް 61,700 އަށްވުރެ ގިނަ ކަމަށް ބުނެފައިވެއެވެ. އެއީ ފުނޑުވެފައިވާ އިމާރާތްތަކުގެ ދަށުވެފައިވާ މީހުން މަރުވެފައިވާނެ ކަމަށް ބެލޭތީ ކަމަށް ބުނެފައިވެއެވެ.