އޭސީޕީ ރިޔާޒު ޑްރަގް އެޖެންސީއަށް ބަދަލުކުރަން ނިންމައިފި
ރިޔާޒް ނެޝަނަލް ޑްރަގް އެޖެންސީ އަށް ބަދަލުކުރީ މިހާރު ލިބޭ މުސާރައާއި އިނާޔަތް ލިބޭގޮތަށް
އެސިސްޓަންޓް ކޮމިޝަނާ އޮފް ޕޮލިސް މުހައްމަދު ރިޔާޒް
އެސިސްޓަންޓް ކޮމިޝަނާ އޮފް ޕޮލިސް މުހައްމަދު ރިޔާޒް ނެޝަނަލް ޑްރަގް އެޖެންސީ އަށް މިހާރު ލިބޭ މުސާރައާއި އިނާޔަތް ލިބޭގޮތަށް ބަދަލު ކުރަން ނިންމައިފި އެވެ.
މިކަން ރާއްޖެއެމްވީއަށް ވަނީ ކަށަވަރުވެފައެވެ. ރިޔާޒް އެންޑީއޭއަށް ބަދަލުކުރަން ނިންމާފައިވީނަމަވެސް މިހާތަނަށް އައި އިރު އޭނާ ފުލުހުންގެ ވަޒީފާއިން ވަކިކޮށްފައި ނުވެއެވެ. ރިޔާޒް އެންޑީއޭއަށް ބަދަލުކުރަން ނިންމި އިރު، އޭނާ ހުރީ ފުލުހުންގެ މުހިންމު މަސައްކަތްތަކުން ދުރުކޮށްފައެވެ. މި ސަރުކާރު ވެރިކަމަށް އައި އިރު އޭނާ ހުރީ ކްރިމިނަލް އިންވެސްޓިގޭޝަންސް ޑިޕާޓްމަންޓުގެ އިސް ވެރިޔާގެ ގޮތުގައެވެ.
މައުލޫމާތު ލިބިފައިވާ ގޮތުގައި އޭނާ އެންޑީއޭއަށް ބަދަލުކުރަން ނިންމީ ސެކަންޑްމަންޓް އުސޫލުގެ ދަށުންނެވެ. އަދި އެއީ 2 އަހަރުގެ މުއްދަތަކަށެވެ. އެންޑީއޭއަކީ ވެސް ހޯމްލޭންޑްގެ ދަށުން ހިންގަމުން އަންނަ ތަނެކެވެ.
ފުލުހުންގެ ގާނޫނުގެ 31 ވަނަ މާއްދާގައި ބުނާ ގޮތުން ފުލުހުންގެ ވަޒީފާގައި ހުރި މީހަކު ކަނޑައެޅޭ ވަކި މުއްދަތަކަށް ސެކަންޑްމަންޓްގެ އުސޫލުން އެހެން ތަނެއްގައި މަސައްކަތްކުރުމަށް ކޮމިޝަނަރ އޮފް ޕޮލިސްއަށް ކަނޑައެޅިދާނެއެވެ. އަދި އެހެން ތަނެއްގައި ހުރި މީހަކު ފުލުހުންގެ ޚިދުމަތުގެ ތެރޭގައި މަސައްކަތްކުރަން ހުއްދަކުރުމަށް ކޮމިޝަނަރ އޮފް ޕޮލިސްއަށް ފެނިއްޖެނަމަ، މި ޤާނޫނުގެ ދަށުން ހަދާ ގަވާއިދުގައިވާ ގޮތުގެމަތިން އެކަމަށް ހުއްދަ ދެވިދާނެއެވެ.
އެންޑީއޭއަށް ރިޔާޒް ބަދަލުކުރި އިރު، މަސްތުވާތަކެތީގެ މައްސަލަތައް ހައްލުކުރުމަށް ސަރުކާރަށް އެކަށީގެންވާ މަސައްކަތެއް ނުކުރެވޭ ކަމުގެ ޝަކުވާތަކެއް އަންނަނީ ކުރަމުންނެވެ.
އެސިސްޓަންޓު ކޮމިޝަނާ އޮފް ޕޮލިސްގެ މަގާމަށް ރިޔާޒް އައްޔަންކޮށްފައި ވަނީ މާޗް، 2019، ގަ އެވެ. އެ މަގާމަށް ރިޔާޒް އައްޔަން ކުރީ ފުލުހުންގެ ވަޒީފާ އިއާދަކޮށްދިނުމަށްފަހެވެ. އޭނާ ފުލުހުންގެ ވަޒީފާއިން ވަކި ކުރީ ސެޕްޓެމްބަރު، 2017، ގައި ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ.
