އޮޑިޓަރ ޖެނެރަލްގެ އޮފީހުން ކޮށްފައިވާ ފެނަކަ ކޯޕަރޭޝަންގެ ލިމިޓެޑްގެ ހާއްސަ އޮޑިޓް ރިޕޯޓުން ފާހަގަވާ ކޮރަޕްޝަންގެ އަމަލުތައް ތަހުގީގުކޮށް ފިޔަވަޅުއެޅުން އަވަސްކުރުމަށް ގޮވާލައި ހުށަހަޅާ ގަރާރުގެ ބަހުސް ކުރިއަށް ގެންދިއުމަށް އަންގާރަ ދުވަހުގެ މަޖިލިސް ޖަލްސާއަށްވެސް އެޖެންޑާ ކޮށްފި އެވެ.

ހޯމަ ދުވަހުގެ ހެނދުނު 9:00 ގައި ފަށާ މަޖިލިސް ޖަލްސާގައި ފެނަކައިގެ ހާއްސަ އޮޑިޓް ރިޕޯޓުން ފާހަގަވާ ކޮރަޕްޝަންގެ އަމަލުތައް ތަހުގީގުކޮށް ފިޔަވަޅުއެޅުން އަވަސްކުރުމަށް ގޮވާލައި ހުށަހަޅާ ގަރާރުގެ ބަހުސް ކުރިއަށް ގެންދިއުމަށް އެޖެންޑާ ކޮށްފައިވާއިރު ސުވާލު ކުރުމުގެ ބައިގައި ހިމެނެނީ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް މިނިސްޓްރީ އޮފް ހޯމް ލޭންޑް ސެކިއުރިޓީ އަލީ އިހްސާންއާ ލިޔުމުން ޖަވާބު ހޯއްދެވުމަށް ކުރައްވާފައިވާ 3 ސުވާލެވެ.

އެގޮތުން ފުރަތަމަ ސުވާލަކީ މަސްތުވާތަކެއްޗާބެހޭ ގާނޫނު އިސްލާހުކުރުމާއި ޑްރަގް ޕްރިވެލެންސް ދިރާސާއެއް ކުރިއަށް ގެންދިއުމަށް ނިންމާފައިވާިރު އެކަންކަން މިހާރު ގޮސްފައިވާ ހިސާބަކީ ކޮބައިތޯ؟ އަދި ނުނިމޭނަމަ ނުނިމެނީ ކިހިނެތްވެގެންތޯ އެވެ. ދެވަނަ ސުވާލަކަށް ހުށަހަޅާފައިވަނީ މަސްތުވާތަކެތީގެ މައްސަލަ ކުރިމަތިވެފައިވާ ސަރަހައްދުތައް ދެނެގަތުމަށާއި، އެ ސަރަހައްދުތަކުގައި ސަރވޭކުރުމަށް ރޭވިފައިވޭތޯ އެވެ. އަދި ތިން ވަނަ ސުވާލަކަށް ހުށަހަޅޅާފައިވަނީ ޕާޓީ ޑްރަގް ގިނަވެ، ރާއްޖޭގައި އިންޓްރަވޭނަސްކޮށް މަސްތުވާތަކެތި ބޭނުންކުރާ މީހުން ގިނަވެ، ޓީބީ، ހެޕަޓައިޓްސް-ބީ، އެއިޑްސް ފަދަ ކޭސްތައް މަސްތުވާތަކެތި ބޭނުންކުރާ މީހުންގެ ފަރާތުން ފެތުރުމުގެ ބިރުއޮތްކަމަށް އަމިއްލަ އެން.ޖީ.އޯ އަކުން ކުރި ދިރާސާއަކުން ދައްކާ ކަމަށާއި މާލެތެރޭގައި މިހާރު ބޭނުންކުރަނީ ކޮން ބާވަތެއްގެ މަސްތުވާތަކެތިކަން ނޭޝަނަލް ޑްރަގް އެޖެންސީއަށް އެނގޭތޯ؟ އަދި އެކަންކަމަށް އެއްވެސް ސިޔާސަތެއް ނޫނީ ޕްލޭނެއް ހެދިފައިވޭތޯ އެވެ.

މީގެއިތުރުން މަޖިލީހަށް ތައާރަފްކުރާ 2 ބިލެއް ހުށަހަޅާނެ އެވެ. ފުރަތަމަ ބިލުގެ ގޮތުގައި ވަނީ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް ހުށަހަޅާފައިވާ އޮޑިޓް ގާނޫނަށް އިސްލާހު ގެނައުމުގެ ބެލެވެ. އަދި ދެވަނަ ބިލުގެ ގޮތުގައި ވަނީ ދައުލަތުގެ ވިޔަފާރި ތަންތަން ޕްރައިވަޓައިޒް ކުރުމާއި ކޯޕަރަޓައިޒް ކުރުމާއި އަދި މޮނިޓަރކޮށް އިވެލުއޭޓް ކުރުމުގެ ގާނޫނަށް އިސްލާހު ގެނައުމުގެ ބެލެވެ.

ނުނިމި ހުރި މައްސަލަތަކުގެ ތެރޭގައި ސަރުކާރުގެ ފަރާތުން ގުރައިދޫ ދާއިރާގެ މެންބަރު ހަނާން މުހައްމަދު ރަޝީދު ހުށަހަޅުއްވާފައިވާ ރީ-އެމްޕްލޯއިމަންޓްގެ ބިލުގެ ބަހުސްކުރިއަށް ގެންދެވުމާއި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ހުށަހަޅުއްވާފައިވާ އެއްގަމު ދަތުރުފަތުރުގެ ގާނޫނަށް އިސްލާހު ގެނައުމުގެ ބިލުގެ ބަހުސްކުރިއަށް ގެންދިއުމެވެ.