އޭވިއޭޝަންގެ ލައިސަންސް އޮންނަ މުވައްޒަފުންނަށް އެންޑީއޭއިން ޑްރަގް ޓެސްޓް ހަދަނީ

ސިވިލް އޭވިއޭޝަން އޮތޯރިޓީ (ސީއޭއޭ) ގެ ލައިސަންސް އޮންނަ މުވައްޒަފުންގެ ޑްރަގް ޓެސްޓު ހެދުމަށް ނެޝަނަލް ޑްރަގް އެޖެންސީ (އެންޑީއޭ) އާ އެކު އެއްބަސްވެއްޖެ އެވެ.

އެންޑީއޭއިން އިއްޔެ އެކްސްގައި ކުރި ޕޯސްޓެއްގައި ބުނެފައިވަނީ މި އެއްބަސްވުމުގެ ދަށުން ސީއޭއޭގެ ލައިސަންސް އޮންނަ އެންމެހާ މުވައްޒަފުންގެ ރެންޑަމް ޑްރަގް އަދި އަލްކަހޯލް ޓެސްޓު ހެދުމުގައި އެހީތެރިކަން ފޯރުކޮށްދޭނެ ކަމަށެވެ. މި ޓެސްޓުތައް ކުރިއަށް ގެންދާނީ ރޭމްޕް އިންސްޕެކްޝަންގެ ތެރެއިން ކަމަށް މިހާރު އެކުލަވާލާފައިވާ ގަވާއިދުގައި ބަޔާންކޮށްފައިވެ އެވެ.

ސީއޭއޭގެ ލައިސަންސް އޮންނަ މުވައްޒަފުންގެ ތެރޭގައި ޕައިލެޓުންނާއި، އެއާކްރާފްޓް މެއިންޓަނަންސް އިންޖިނިއަރުންނާއި އަދި ފްލައިޓް ކްރޫ ހިމެނެ އެވެ. މި މުވައްޒަފުންގެ ޑްރަގް ޓެސްޓު ހެދުމަކީ މަތިންދާބޯޓުގެ ސަލާމަތާއި ރައްކާތެރިކަމަށް އިތުރު ކަށަވަރުކަމެއް ގެނެސްދޭނެ ކަމެއްކަމަށް ސީއޭއޭއިން ފާހަގަކުރެ އެވެ.

އެންޑީއޭއިން ފާހަގަކުރި ގޮތުގައި ސީއޭއޭއިން މިދިޔަ މެއި މަހު އަމަލުކުރަން ފެށި އައު ގަވާއިދުގެ ދަށުން ކުރިއަށް ގެންދާ މަސައްކަތަށް އެ އިދާރާއިން ދޭންޖެހޭ ފުރިހަމަ އެއްބާރުލުން ދޭނެ އެވެ. މި އެއްބަސްވުމަކީ ދެ މުއައްސަސާގެ މެދުގައި އޮންނަ ގުޅުން އިތުރަށް ބަދަހިކޮށް، ވައިގެ ދަތުރުފަތުރުގެ ސަލާމަތާއި ރައްކާތެރިކަން އިތުރުކުރުމަށް އެޅޭ މުހިންމު ފިޔަވަޅެކެވެ.