3 އަހަރުގެ މުއްދަތަކަށް އެންޑީއޭއަށް ސީއީއޯ އެއް ހޯދަނީ

3 އަހަރުގެ މުއްދަތަކަށް ސީއީއޯއެއް ހޯދަން ނެޝަނަލް ޑްރަގް އެޖެންސީ (އެންޑީއޭ) އިން އިއުލާނުކޮށްފިއެވެ.

ނެޝަނަލް ޑްރަގް އެޖެންސީ (އެންޑީއޭ) އިން މި އިއުލާން ފުރަތަމަ ކުރީ ހޯމަ ދުވަހުއެވެ. ހޯމަ ދުވަހު ކުރި އިއުލާން ފަހުން އެންޑީއޭއިން ވަނީ ބާތިލުކޮށްފައެވެ. ފަހުން އަންގާރަ ދުވަހު އަނެއްކާ ވެސް އިއުލާން ކޮށްފައެވެ.

އެންޑީއޭގެ ސީއޯއެއް 3 އަހަރުގެ ކޮންޓްރެކްޓް މުއްދަތަކަށް އިއުލާން ކުރި އިރު އެ މަގާމް ހުސްވެ ގާނޫނުގައި ބުނާ ގޮތަށް ސީއީއޯއެއް ނަގާފައި ނުވެއެވެ. އެމަގާމުގައި ކުރިން ހުންނެވި އިމާދު ސޯލިހު ވަކިކުރިތާ މިހާރު އަހަރަކަށްވުރެ ގިނަ ދުވަސްވެއްޖެއެވެ. އަދި އެ މަގާމު ވަގުތީ ގޮތުން ހަވާލުވެ ހުންނެވީ މުހައްމަދު ރާޝިދުއެވެ.

މުސާރައިގެ ގޮތުގައި ސީއީއޯ އަކަށް ލިބެނީ މަހަކު 35،000 ރުފިޔާ އެވެ. މަގާމުގެ މަސްއޫލިއްޔަތުގެ ތެރޭގައި ހިމެނެނީ ނޭޝަންލް ޑްރަގް އެޖެންސީގެ ބޯޑުގެ ލަފަޔާ އިރުޝާދުގެ މަތިން އޭޖެންސީ ހިންގުމުގެ އެންމެ އިސްފަރާތްކަމުގައި ވުމާއި، ނެޝަނަލް ޑްރަގް އޭޖެންސީގެ ބޯޑުގެ ނިންމުންތައް ތަންފީޒުކުރުމުގެ މަސްއޫލިއްޔަތު އަދާކުރުމެވެ.

މަގާމުގެ ޝަރުތުތަކުގެ ތެރޭގައި ހިމެނެނީ ބިޒްނަސް މެނޭޖްމަންޓް ނުވަތަ ޕަބްލިކް އެޑްމިނިސްޓްރޭޝަން ނުވަތަ ހިއުމަން ރިސޯސް މެނޭޖްމަންޓް ނުވަޔަ ސޯޝަލް ސައިންސަސްގެ ދާއިރާއިން ފުރަތަމަ ޑިގްރީ ނުވަތަ މާސްޓަރސް ޑިގްރީއެއް ހާސިލްކޮށްފައިވުމާއެކު ހިންގުމުގެ ދާއިރާގައި މަދުވެގެން 5 އަހަރު ދުވަހުގެ ތަޖުރިބާ ލިބިފައިވުން ނުވަތަ ހިންގމުގެ ދާއިރާ ނުވަތަ ސީނިއަރ މެނޭޖްމަންޓް ލެވެލްގައި މަދުވެގެން 10 އަހަރު ދުވަހުގެ ތަޖުރިބާ ލިބިފައިވުމެވެ.

އަދި އިސްލާމްދީނުގައި ހައްދެއް ކަނޑައެޅިފައިވާ ކުށެއް ނުވަތަ ޚިޔާނާތުގެ ކުށެއް ނުވަތަ ރިޝްވަތުގެ ކުށެއް ނުވަތަ ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްސަ އުސޫލުތަކަކަށް ޢަމަލުކުރުމުގެ ޤާނޫނުގައި ބަޔާންކޮށްފައިވާ އެއްވެސް ކުށެއް ނުވަތަ ގަދަކަމުން ބަދުއަޚްލާޤީ ޢަމަލު ހިންގުމުގެ ކުށެއް ނުވަތަ ތޫނު އެއްޗެހި ބޭނުންކޮށްގެން މާރާމާރީ ހިންގުމުގެ ކުށެއް ނުވަތަ މީހަކު މެރުމުގެ ކުށެއް ނުވަތަ ޓެރަރިޒަމްގެ ކުށެއް ނުވަތަ މަސްތުވާތަކެއްޗާބެހޭ ގާނޫނު ގައި ބަޔާންކޮށްފައިވާ އެއްވެސް ކުށެއް ޝަރީޢަތަށް ސާބިތުވެފައިވާ މީހަކު ކަމުގައި ނުވުމެވެ.

އެންޑީއޭގެ އިއުލާނުގައި ސުންގަޑިއެއްގެ ގޮތުގައި ބުނެފައިވަނީ 06 ނޮވެންބަރ 2025 ވާ ބުރާސްފަތި ދުވަހުގެ މެންދުރު 1:00 ގައެވެ.

ގާނޫނުގައި ލާޒިމުކުރާ ގޮތަށް އެންޑީއޭއަށް ސީއީއޯއެއް އައްޔަން ނުކުރެވި އެތަނުގެ ހިންގުން ވަނީ ދޯދިޔާވެފައެވެ. ނޭޝަނަލް ޑްރަގް ކޮންޓްރޯލް ކައުންސިލަކީ 3 މަހުން 1 މަހު ބައްދަލުވާންޖެހޭ ކައުންސިލަކަށް ވީ ނަމަވެސް އެކަން އެގޮތަށް ނުހިނގައެވެ.