އީރާނާއި އެމެރިކާގެ މަޝްވަރާތައް އޮމާންގައި ކުރިއަށް ގެންގޮސްފި، އިތުރު ބައްދަލުވުމެއް ބާއްވާނެ

އީރާނާއި އެމެރިކާގެ ނިއުކްލިއާ މަޝްވަރާތަައް އޮމާންގައި ކުރިއަށް ގެންގޮސްފި އެވެ.

އާދީއްތަ ދުވަހު އޮމާންގައި ކުރިއަށް ގެންދިޔަ މަޝްވަރާ ބައްދަލުވުން ނިންމާލާފައި ވަނީ، އިތުރު މަޝްވަރާ ބައްދަލުވުންތަކެއް ބޭއްވުމަށް ދެ ޤައުމުގެ ދެ މެދުގައި އެބަސްވުމަށް ފަހު އެވެ. 

އީރާންގެ ޚާރިޖީ ވުޒާރާގެ ތަރުޖަމާނު އިސްމާއީލް ބަޣާއީ ވިދާޅުވި ގޮތުގައި، ދަތިތަކާ އެކު ވެސް ނުސީދާ މަޝްވަރާތަކުން ދެ ފަރާތުގެ ވެސް ބޭނުންތައް ދެނެގަނެވިފައިވާ ކަމަށެވެ. އަދި އެކަމަށްޓަކައި މަޝްވަރާތައް ބޭނުންތެރި ކަމަށް ވެސް އޭނާ ވިދާޅުވި އެވެ.

މީގެ އިތުރުން އޭނާ ވިދާޅުވީ އިތުރު މަޝްވަރާ ބައްދަލުވުމެއް ބޭއްވުމަށް ނިންމާފައިވާ ކަމަށެވެ. އަދި ދެން މަޝްވަރާ ބައްދަލުވުން އޮންނާނެ ތާރީޚަކާއި ވަގުތެއް އޮމާންގެ ސަރުކާރުން ހާމަ ކުރާނެ ކަމަށް ވެސް ވަނީ ވިދާޅުވެފަ އެވެ. 

އެމެރިކާ ސަރުކާރުގެ އިސް އޮފިޝަަލަކާ ހަވާލާދީ މީޑިއާ ތަކުގައި ބުނެފައިވާ ގޮތުން، އާދީއްތަ ދުވަހު ކުރިއަށް ދިޔަ ސީދާ އަދި ނުސީދާ މަޝްވަރާ ބައްދަލުވުން ގާތް ގަނޑަކަށް ތިން ގަޑި އިރަށް ވުރެ ދިގު މިނަކަށް ދެމިގެން ދިޔަ އެވެ. 

މި މަޝްވަރާތަކުގައި ބައިވެރިވެ ވަޑައިގެންފައި ވަނީ އީރާންގެ ޚާރިޖީ ވަޒީރު އައްބާސް އަރާގްޗީގެ އިތުރުން، އެމެރިކާގެ ޚާއްސަ މަންދޫބު ސްޓީވް ވިކްޓޮފްގެ އިތުރުން އޮމާން ސަރުކާރުގެ ފަރާތުން މެދުވެރިންގެ ގޮތުގައި ތިއްބަވާ ބޭފުޅުންނެވެ. 

އީރާނާއި އެމެރިކާއާ ދެމެދު މި މަޝްވަރާތައް ކުރިއަށް ގެންގޮސްފައިވާއިރު، މީގެ ކުރިން ބާއްވަން މަސައްކަތް ކުރި މަޝްވަރާ ބައްދަލުވުން ވަނީ ކެންސަލްކޮށްފަ އެވެ. މީޑިއާ ތަކުގައި ބުނެފައިވާ ގޮތުން އެއީ އެމެރިކާ އިން މަޝްވަރާތަކުގައި ބައިވެރިވާން އެއްބަސްވެފައި ނުވާތީ އެވެ.

އާދީއްތަ ދުވަހު އޮތް މަޝްވަރާ ބައްދަލުވުމުގެ ކުރިން އީރާންގެ ޚާރިޖީ ވަޒީރު އަރާގްޗީ ވިދާޅުވެފައި ވަނީ އެމެރިކާގެ މަޤުސަދަކީ އީރާންގެ ނިއުކްލިއާ ހައްގުތައް ނިގުޅައި ގަތުން ކަމަށް ވާ ނަމަ، އީރާނުން އެއްވެސް ހައްގަކުން ފަހަތަށް ނުޖެހޭނެ ކަމަށެވެ.