އެމެރިކާ އިން ހޫތީން އަށް ދެމުން އަންނަ ހަމަލާތައް ހުއްޓާލަން އެ ޤައުމުގެ ރައީސް ޑޮނަލްޑް ޓްރަމްޕް ނިންމެވުމާ އެކު، އސްރާއީލްގެ ބޮޑު ވަޒީރު ބެންޖަމިން ނަތަންޔާހޫގެ ސަރުކާރުން ނުރުހުން ވެއްޖެ އެވެ.

ހޫތީންއާ ދެކޮޅަށް ދެމުން އަންނަ ހަމަލާތައް ހުއްޓާލަން އެމެރިކާ އިން ނިންމާފައިވާއިރު، ދާދި ފަހުން ހޫތީން އިން ވަނީ އިސްރާއީލްގެ މައި ވައިގެ ބަނދަރަށް އަމާޒުކޮށް ހަމަލާ ދީފަ އެވެ. އެ ހަމަލާއާ ގުޅިގެން، އިސްރާއީލް އިން ވެސް އަންނަނީ ހޫތީންއާ ދެކޮޅަށް ހަމަލާތައް ދެމުންނެވެ.

އިސްރާއީލްގެ ވައިގެ ބަނދަރަށް އަމާޒުކޮށް ހޫތީން އިން ދިން ހަަމަލާގެ ސަބަބުން، ބައިނަލްއަޤުވާމީ ގިނަ އެއާލައިންތަކަކުން ވަނީ ވަގުތީ ގޮތުން ދަތުރުތައް ހުއްޓާލައިފަ އެވެ. ޚާއްސަކޮށް ތެލްއަވީވަށް ކުރަމުން އައި ގިނަ ދަތުރުތަކެއް ހުއްޓުނެވެ. 

އެހެން ނަމަވެސް، އިސްރާއީލް އިން ވަނީ ހޫތީން އަށް އަމާޒުކޮށް ހަމަލާ ދޭން ފަށައިފަ އެވެ. ދެ ވަނަ ފަހަރަށް ހަމަލާ ދިން ފަހުން، އެެމެރިކާ އިން ވަނީ ހޫތީންއާ ދެކޮޅަށް ދެމުން އަންނަ ހަމަލާތައް ހުއްޓާލަން ނިންމައިފަ އެވެ. 

އެކަމާ ގުޅިގެން އިސްރާއީލް ސަރުކާރުގެ އިސް އޮފިޝަލަކާ ހަވާލާދީ މީޑިއާ ތަކުގައި ބުނެފައި ވަނީ، އެމެރިކާ އިން އެއްވެސް ކަހަލަ އެންގުމެއް ނުވަތަ އިޝާރާތެއް ދިނުމެއް ނެތި އެ ފަދަ ނިންމުމެއް ނިންމުމަކީ އިސްރާއީލް އިން ކަންބޮޑުވާ ކަމެކެވެ. 

ބައިނަލްއަޤުވާމީ މީޑިއާ ތަކުގައި ބުނެފައިވާ ގޮތުން، މި ފަހުން ޓްރަމްޕް ވަނީ އިސްރާއީލްގެ ސަރުކާރާ ހިއްސާ ކުރުމެއް ނެތި ތިން ނިންމުމެއް ނިންމައިފަ އެވެ.

އެމެރިކާގެ މި ނިންމުމާ ގުޅިގެން ހޫތީން އިން ވަނީ އެ އެއްބަސްވުމާ އެއްކޮޅަށް ވާހަކަ ދައްކައި، އެއްބަސްވުމަށް ތައުރީފު ކޮށްފަ އެވެ. އަދި މިއީ އެމެރިކާގެ އެހީތެރިކަމުން އިސްރާއީލް ދުރުކުރެވުން ކަހަލަ ކާމިޔާބެއްގެ ގޮތުގައި ވެސް ވަނީ ސިފަ ކޮށްފަ އެވެ.