ރައީސް މުއިއްޒުގެ ދިގު ނޫސްވެރިންގެ ބައްދަލުވުމުން ރައްޔިތުންނަށް ލިބުނު އުންމީދީކަމެއް ނެތް: ރައީސް ޔާމީން
6 މެއި 2025 | އަންގާރަ 18:18ޑރ މުހައްމަދު މުއިއްޒުގެ ނޫސްވެރިންގެ ބައްދަލުވުމުން ރައްޔިތުންނަށް އެއްވެސް އުއްމީދެއް ނުލިބުނު
ކުރީގެ ރައީސް އަބްދުﷲ ޔާމީން: 14 ގަޑިއިރުވީ އިރުވެސް ރައްޔިތުންނަށް އުންމީދެއް ގެނުވާފަދަ ވާހަފުޅެއް މުއިއްޒު ވިދާޅުނުވާކަން ޔާމީން ފާހަގަކުރެއްވި
ޑރ މުހައްމަދު މުއިއްޒުގެ ދިގު ނޫސްވެރިންގެ ބައްދަލުވުމުން ރައްޔިތުންނަށް ލިބުނު އުއްމީދީ ކަމެއް ނެތް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވެފައި ވަނީ ޕީއެންއެފުން އަންގާރަ ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.
މިމަހުގެ 3 ވަނަ ދުވަހު ރައިސުލްޖުމުހުރިއްޔާ ޑރ.މުހައްމަދު މުއިއްޒު ނޫސްވެރިންނާއި ބައްދަލު ކޮށް ވާހަކަ ފުޅުދެއްކެވި އިރު، ނޫސްވެރިންގެ އެސުވާލުތަކަކީ ރައްޔިތުން އެމަނިކުފާނާއި ކުރަން ބޭނުން ވާސުވާލުތަކެއް ކަމުގައި ޔާމީން ވިދާޅުވިއެވެ.
އެހެން ނަމަވެސް އެ 14 ގަޑިއިރު ތެރޭގައި ތަކުރާރުކޮށް ނޫސްވެރިންނަށްވެސް އަދި ރައްޔިތުން ނައްވެސް އަޑު އިވުނީ އެއް ވާހަކަތަކެއް، އަދި އެއް ޖަވާބު ތަކެއް ކަމަށް ވެސް ޔާމީން ވިދާޅުވިއެވެ. އަދި ނޫސްވެރިންގެ ބައްދަލުވުމަށް ފެކުއަލް ހެއްކާ އެކު ނޫސްވެރިން ގޮސް ސުވާލު ކުރުމުން ވެސް ފެނިގެން ދިޔައީ ރައީސް މުއިއްޒު އެކަންކަން ދޮގުކުރަން މަސައްކަތް ކުރި މަންޒަރު ކަމަށް ވެސް ޔާމީން ވިދާޅުވިއެވެ.
ނޫސްވެރިންގެ ބައްދަލުވުން ދިގުވެގެން ދިޔަ ދިއުމާ ގުޅިގެން ޕީއެންސީއާ އަދި ސަރުކާރު ޕްރޮމޯޓުކުރާ ބޮޓުން މާމޮޅުކަމަކަށް ހަދާ އެ ވާހަކަ އިޝްތިހާރުކުރަމުންދާ ދިއުމަށް އިޝާރާތްކުރައްވާ ޔާމީން ވިދާޅުވީ، އެއްޗެއް ދިގުވުމަކީ އޭގައި އޮއްޓަރު ހުރުމެއް ނޫން ކަމަށާ 14 ގަޑިއިރުގެ ތެރޭގައި ރައީސުލްޖުމްހޫރިއްޔާ ދެއްވީ ދޭސީ ޖަވާބުތަކެއް ކަމަށެވެ.
އަދި ނޫސްވެރިންގެ ބައްދަލުވުމުގައި ފެނިގެން ދިޔައީ ރައީސް މުއިއްޒުގެ ކެތްތެރިކަން ވެސް ނެތް މިންވަރު ކަމަށާއި ނޫސްވެރި ބައްދަލުވުމުގެ ހަޤީގީ މަގުސަދު ހާސިލު ނުވާކަމަށެވެ. އަދި މި ބައްދަލު ވުމަކުން ރައްޔިތުންނަށް ސާފުވި އެއްވެސް މައުލޫމާތެއް ވެސް ނެއްކަމަށް ވެސް ޔާމީން ވިދާޅުވިއެވެ.
އެ ނޫސްވެރިންގެ ބައްދަލުވުމުގައި ނޫސްވެރިންނަށް ރައިސް މުއިއްޒު ހަމައެކަނި ދެއްވި ޖަވާބުތަކަކީ އެމަނިކުފާނަށް ނޭގޭ ކަމަށް، ދެނަހުރިކަމެއް ނޫންކަމުގައި ވިދސާޅުވެ، ދޯދިޔާ، ޖަވާބުތަކެއްކަމަށާއި އެއީ ރައީސެއްގެ ފަރާތުން ޤަބޫލުނުކުރެވޭ ވާހަކަތަކެއް ކަމުގައި އެމަނިކުފާނު ވިދާޅުވެފައިވެއެވެ.
