ކުރިން ދެއްކެވި ވާހަކައަށް ޒިންމާ ނުވެވޭނެ ކަމަށް ޑިފެންސް މިނިސްޓަރ ޣައްސާން މައުމޫން ވިދާޅުވެއްޖެއެވެ.

ޑިފެންސް މިނިސްޓަރ ޣައްސާން މިފަދައިން ވިދާޅުވީ ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާފައި މެންބަރަކު ކުރެއްވި ސުވާލަށް ޖަވާބު ދެއްވަމުންނެވެ.

މެންބަރު ޒިޔާދު ވިދާޅުވީ މީގެ ކުރިންވެސް ސިފައިންގެ ބޭފުޅުން ވިދާޅުވަމުންދިޔައީ އިންޑިއާއިން ދީފައިވާ ވައިގެ އުޅަނދުތައް އުދުއްސަމުންދިޔައީ ހުއްދައާއެކު ކަމަށާއި، އަދި މިހާރުވެސް އެކަން ހިނގަނީ އެގޮތަށް ކަމަށް ޑިފެންސް މިނިސްޓަރ ވިދާޅުވާ ކަމަށެވެ.

އަދި ހެލިކޮޕްޓަރާއި ޑޯނިއަރ މިހާރު ދުއްވަނީ އެއްބަސްވުމަށް ގެނައި ބަދަލުތަކުގެ ފަހުންތޯއާއި، ރާއްޖޭގައި ދުއްވާ ހެލިކޮޕްޓަރާއި ޑޯނިއަރ އަކީ އިންޑިއާގެ އަސްކަރީ އުޅަނދުކަމަށް ވިދާޅުވާން ދަތިފުޅުތޯއެވެ.

ސުވާލުގެ ޖަވާބުގައި މިނިސްޓަރ ޣައްސާން ވިދާޅުވީ އިންޑިއާއިން ހަދިޔާކޮށްފައިވާ ހެލިކޮޕްޓަރާއި މަތިންދާބޯޓު އުދުއްސުމާއި ގުޅޭގޮތުން ކުރިން ދެއްކެވި ވާހަކަތަކަށް ޒިންމާ ނުވެވޭނެ ކަމަށެވެ. އަދި އެއްވެސް ކަމެއް ދަންނަވާކަށް ދައްޗެއް ނޫން ކަމަށެވެ. ނަމަވެސް މެންބަރު ޒިޔާދުގެ ދެވަނަ ސުވާލުގެ ފުރަތަމަ ބައިގައި ވިދާޅުވި، ހެލިކޮޕްޓަރާއި ޑޯނިއަރ މިހާރު ދުއްވަނީ އެއްބަސްވުމަށް ގެނައި ބަދަލުތަކުގެ ފަހުންތޯ ސުވާލަށް ޖަވާބެއް ނުދެއްވާ މިނިސްޓަރު ޣައްސާން އިށީންދެވަޑައިގެންނެވިއެވެ.

އިދިކޮޅުގައި އޮތް އިރު ޣައްސާންއާއި އެއިރުގެ އިދިކޮޅު އިސް ފަރާތްތަކުން ބުނަމުންދިޔައީ ހެލިކޮޕްޓަރާއި މަތިންދާ ބޯޓަކީ އިންޑިއާގެ އަސްކަރީ އުޅަނދު ކަމަށާއި، އެ އުދުއްސަން ދިވެހި ސިފައިންގެ ހުއްދަ ހޯދަން ނުޖެހޭ ކަމަށެވެ. ނަމަވެސް އެއިރު ސަރުކާރުން ބުނަމުން ދިޔައީ ވައިގެ އުޅަނދުތައް ބޭނުންކުރަމުން ދިޔައީ ސިއްހީ ކުއްލި ހާލަތްތަކުގައި ބަލި މީހުން އުފުލުމަށާއި، ކަނޑުމަތީ ހާދިސާތަކުގައި މީހުން ސަލާމަތްކުރުމަށެވެ. އަދި އެ ދުއްވަނީ ދިވެހި ސިފައިންގެ ހުއްދައާއެކު ދިވެހި ސިފައިން ތިބެގެން ކަމަށެވެ.