ރައީސް މުޢިއްޒުއާ ބައްދަލު ކުރަން ދަރިވަރުން ދެކޮޅު ހެދުމުން ޖަލްސާ ކެންސަލް ކޮށްފި
މެޖޯރިޓީ ދަރިވަރުން ބައިވެރި ނުވާން ނިންމުމުން، އެ ޖަލްސާ ކެންސަލް ކުރަން ނިންމައި، އެކަން ވަނީ ދަރިވަރުންނަށް ވެސް އަންގާފައިި
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސް ޑޮކްޓަރު މުޙައްމަދު މުޢިއްޒު މިހާރު މެލޭޝިޔާ އަށް ކުރައްވަމުން ގެންދަވާ ދަތުރުފުޅުގެ ތެރެއިން، ދަރިވަރުންގެ ޖަމިއްޔާ އިފުތިތާހު ކުރުމަށް ބާއްވަން އުޅުން ޖަލްސާ ކެންސަލް ކޮށްފި އެވެ.
މެލޭޝިޔާ އަށް މިހާރު ރައީސް މުޢިއްޒު ކުރައްވަމުން އަންނަ ދަތުރުފުޅުގެ ތެރެއިން އެ ޤައުމުގައި ތިބި ދިވެހި ދަރިވަރުންގެ ޖަމިއްޔާ އިފުތިތާހު ކުުރުމަށް އޮތީ ރާވައިފަ އެވެ. އެއީ، މޯލްޑިވިއަން ސްޓޫޑެންޓް އެސޯސިއޭޝަން އޮފް މެލޭޝިޔާ އެވެ.
އެ ޖަމިއްޔާ އިފުތިތާހު ކުރުމުގެ ޖަލްސާ ހޯމަ ދުވަހު ބާއްވަން ނިންމާފައި އޮތް ނަމަވެސް، ގިނަ ދަރިވަރުން ވަނީ އެ ޖަލްސާ ބޮއިކޮޓް ކުރަން ނިންމައިފަ އެވެ.
އެއީ މިހާރު މާލޭގައި ހިނގައިގެން އުޅޭ، ޒުވާން އަންހެން ކުއްޖަކު ފުރާޅަށް ވެއްޓުނު މައްސަލައިގައި ދިވެހި ފުލުހުންގެ ޚިދުމަތުން ކުރިއަށް ގެންދާ ތަހުގީގާއި، އެކަމުގައި ސަރުކާރުން އަމަލު ކުރަމުން އަންނަ ގޮތާ މެދު ހިތްހަމަ ނުޖެހިގެންނެވެ.
މެޖޯރިޓީ ދަރިވަރުން ބައިވެރި ނުވާން ނިންމުމުން، އެ ޖަލްސާ ކެންސަލް ކުރަން ނިންމައި، އެކަން ވަނީ ދަރިވަރުންނަށް ވެސް އަންގައިފަ އެވެ.
އެ ހާދިސާއާ ގުޅިގެން މާލޭގައި މިހާރު އަންނަނީ ކޮންމެ ރެޔަކު ސިލްސިލާ ގޮތެއްގައި މުޒާހަރާތައް ކުރިއަށް ގެންދަމުންނެވެ. އެގޮތުން ހެންވޭރު ޕޮލިސް ސްޓޭޝަން ހުންނަ ސަރަހައްދަށް ގިނަ އަދަދެއްގެ ޒުވާނުން އެއްވެ އަންނަނީ، އިހުތިޖާޖު ކުރަމުންނެވެ.
ޒުވާނުންގެ އިހުތިޖާޖާ ގުޅިގެން ރައީސް މުޢިއްޒު މި ފަަހުން ދައްކަވާފައިވާ ވާހަކަތަކާ ވެސް ޒުވާނުން ވަނީ ނުރުހުންވެފަ އެވެ. އަދި އެކަމުގައި ރައީސް މުޢިއްޒު މައާފަށް އެދިވަޑައިގަންނަވަން ޖެހޭނެ ކަމުގައި ވެސް ޒުވާނުން އަންނަނީ ގޮވާލަމުންނެވެ.
މީގެ އިތުރުން ޒުވާނުން ކުރަމުން އަންނަ ޑިމާންޑުތަކުގެ ތެރޭގައި ހޯމް މިނިސްޓަރު އަލީ އިޙުސާން އަދި ޓްރާންސްޕޯޓް މިނިސްޓަރު މުޙައްމަދު އަމީން އިސްތިއުފާ ދެއްވުން ހިމެނެ އެވެ.
ޒުވާނުން އެފަދައިން ޑިމާންޑު ކޮށްފައި ވަނިކޮށް، ރައީސް މުޢިއްޒު މެލޭޝިޔާ އަށް ވަޑައިގެންނެވީ ހޯމް މިނިސްޓަރު އަލީ އިޙުސާން ވެސް އަރިހުގައިގ ގޮވައިގެންނެވެ.
މި މައްސަލައިގައި ސަރުކާރުން އަމަލު ކުރަމުން އަންނަ ގޮތާ މެދު، އެތައް ބަަޔަކު އަންނަނީ ނުރުހުން ފާޅު ކުރަމުންނެވެ.
