މާލޭގައި ހިނގަމުންދާ އިހުތިޖާޖުތަކާ ގުޅިގެން، ކައުންސިލުގެ ދެ މެންބަރުންގެ ހުށަހެޅުމެއް ސިޓީ ކައުންސިލަށް

މާލޭގައި ހިނގަމުންދާ އިހުތިޖާޖުތަކާ ގުޅިގެން މާލެ ސިޓީ ކައުންސިލުގެ މައްޗަށް އަދާކުރަންޖެހޭ ވާޖިބުތަކެއް ހުރިކަމަށް ފާހަގަކޮށް، މިފަދަ އިހުތިޖާޖުތަކަށް ހިތްވަރުދީ އެހީތެރިވުމަކީ އިންތިޚާބީ މަޤާމުތަކުގައި ތިބި ފަރާތްތަކުގެ އަޚްލާޤީ، ސިޔާސީ އަދި ޤައުމީ ވާޖިބެއް ކަމަށް ބުނެ ދަ ޑިމޮކްރެޓްސް އަށް ނިސްބަތްވާ ދެ ކައުންސިލަރުންގެ ހުށަހެޅުމެއް ސިޓީ ކައުންސިލަށް ހުށަހަޅައިފިއެވެ.

ޑިމޮކްރެޓިކް ޕާޓީއަށް ނިސްބަތްވާ ގަލޮޅު އުތުރު ދާއިރާގެ ކައުންސިލަރު މުޙައްމަދު ސައިފް ފާތިޙް އާއި ގަލޮޅު ހުޅަނގު ދާއިރާގެ ކައުންސިލަރު މަރިޔަމް ނާޒިމާ މުޙައްމަދު ފާއިޒު މި ހުށަހެޅުން ހުށަހަޅާފައިވަނީ، 18 އެޕްރީލް 2025 ވަނަ ދުވަހު ފުރާޅެއްގެ މަތިން ވެއްޓިފައި އޮއްވާ ފެނުނު އަންހެން ކުއްޖާގެ މައްސަލައާ ގުޅިގެން މާލޭގައި ހިނގަމުންދާ އިހުތިޖާޖުތަކާ ގުޅިގެންނެވެ.

Advertisement

މި ހުށަހެޅުމުގައި، އިންސާފަށް އެދި ކުރެވޭ އިހުތިޖާޖުތަކަށް މާލޭގެ މަގުތަކާއި، ހުސްޖާގަތަކާއި، ޕާކުތައް ހުޅުވިފައިވާކަން އޮޅުންފިލުވައިދިނުމަށާއި، މި ހަރަކާތްތަކަތަކަށް ހުރަސްނޭޅުމަށް ސަރުކާރަށް ގޮވާލުމަށް ބާރުއަޅާފައިވެއެވެ. އަދި މައްސަލައިގެ ތަޙުޤީޤު ދެފުށްފެންނަ ގޮތެއްގައި ކުރިއަށް ގެންދިއުމަށާއި، މިނިވަން އިންކުއަރީއެއް ހިންގުމަށް ސަރުކާރަށް ގޮވާލާފައިވެއެވެ.

ހުށަހެޅުމުގައި ފާހަގަކޮށްފައިވާ ގޮތުގައި، މިފަދަ އިހުތިޖާޖުތަކަށް ހިތްވަރުދީ އެހީތެރިވުމަކީ އިންތިޚާބީ މަޤާމުތަކުގައި ތިބި ފަރާތްތަކުގެ އަޚްލާޤީ، ސިޔާސީ އަދި ޤައުމީ ވާޖިބެކެވެ. އަދި މާލެ ސިޓީ ކައުންސިލަކީ މާލޭގެ ރައްޔިތުންގެ ދުޅަހެޔޮކަމާއި ސަލާމަތާއި ރައްކާތެރިކަމާއި އަސާސީ ޙައްޤުތަކާއި މިނިވަންކަމުގެ މައްޗަށް މަސްއޫލުވެފައިވާ އިންތިޚާބީ މުއައްސަސާއެއްކަން ފާހަގަކޮށްފައިވެއެވެ.

މި ހުށަހެޅުމާ ގުޅޭގޮތުން ސިޓީ ކައުންސިލުން އަދި ވަކި ގޮތެއް ނިންމާފައެއް ނުވެއެވެ.