ކޮމިޝަނަރ އޮފް ޕޮލިސް މަގާމުގައި ހުންނެވި އަލީ ސުޖާއު މަގާމުން އިސްތިއުފާ ދެއްވަން ހުށަހެޅުއްވުމުން، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އިސްތިއުފާ ޤަބޫލުފުޅު ކުރައްވައިފި އެވެ.

އެކަން ހާމަ ކުރެއްވީ ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގަ އެވެ.

މަގާމުން އިސްތިއުފާ ދެއްވަން ސުޖާއު ނިންމެވީ ހޮނިހިރު ދުވަހުގެ ވަގުތެއްގަ އެވެ.

ސުޖާއު އިސްތިއުފާ ދެއްވުމުގެ ކުރިން ވަނީ، އެކަން ފުލުހުންގެ އިސްވެރިންގެ އިތުރުން، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަށް ވެސް އަންގަވައިފަ އެވެ.

ސުޖާއުގެ އިސްތިއުފާގެ ކުރިން ފުލުހުންގެ ބޯޑު ބައްދަލުވުމެއް ބޭއްވި ކަމުގެ މައުލޫމާތު ވެސް ވަނީ ލިބިފަ އެވެ.

ސުޖާއު މަގާމުން އިސްތިއުފާ ދެއްވިއިރު، މާލޭގައި ގެއެއްްގެ ފުރާޅު މައްޗަށް ޒުވާން އަންހެން ކުއްޖަކު ވެއްޓުނު މައްސަލައިގައި ފުލުހުން އަދި ސުޖާއު އަށް ވެސް ވަނީ ފާޑު ކިޔުން އަމާޒުވެފަ އެވެ.

އަދި އެކަމާ ދެކޮޅަށް މިހާރު މާލޭގައި ކުރަމުން އަންނަ ސިލްސިލާ މުޒާހަރާތަކުގައި ވެސް ވަނީ ސުޖާއުގެ އިސްތިއުފާ އަށް ގޮވައިފަ އެވެ.

މުޒާހަރާގެ ބައިވެރިންގެ ފަރާތުން ކުރަމުން އައި ޑިމާންޑުތަކުގެ ތެރޭގައި ވެސް ސުޖާއު އިސްތިއުފާ ދިނުމަށް ވަނީ އެދިފަ އެވެ.

އެ މައްސަލައިގައި ފުލުހުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި ސުޖާއު ދެއްކެވި ވާަހަކަ ތަކަަށް ވެސް އާންމުން ވަނީ ވަރަށް ބޮޑަށް ފާޑު ކިޔައިފަ އެވެ.