ރައީސް މުއިއްޒު، ފިޔާޒު އަށް އިންޒާރު ދެއްވި މައްސަލާގައި ޖިނާއީ ކަމަކަށް ގަބޫލުކުރެވޭ އެއްވެސް ކަމެއް ނެތް: މިނިސްޓަރު އިހުސާން
25 މާޗްގައި ފިޔާޒު އަމިއްލައަށް ސެކިއުރިޓީ ބޭނުންނުވާ ކަމަށް ފުލުހުންނަށް އަންގާފައިވޭ
އަދަދު ނޫހުގެ ސީއީއޯ ހުސައިން ފިޔާޒު
ރައީސް ޑރ. މުހައްމަދު މުއިއްޒު، އަދަދު ނޫހުގެ ސީއީއޯ ހުސައިން ފިޔާޒު އަށް އިންޒާރު ދެއްވި މައްސަލާގައި ޖިނާއީ ކަމަކަށް ގަބޫލުކުރެވޭ އެއްވެސް ކަމެއް ނެތް ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ބުދަ ދުވަހުގެ ރައްޔިތުން މަޖިލީހުގެ ޖަލްސާގައި ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް ވަނީ ރައީސް މުއިއްޒު، އަދަދު ނޫހުގެ ސީއީއޯ ފިޔާޒު އަށް އިންޒާރު ދެއްވި މައްސަލައާ ގުޅިގެން އޭނާއަށް އިތުރު ރައްކާތެރިކަން ފޯރުކޮށްދިނުމަށް ފުލުހުންގެ ފަރާތުން އަޅުއްވާފައިވާ ފިޔަވަޅުތަކާ ގުޅޭގޮތުން ސުވާލު ކުރައްވާފައެވެ.
މިސުވާލާ ގުޅިގެން މިނިސްޓަރު އިހުސާން ވިދާޅުވީ މި މައްސަލައާ ގުޅިގެން ޕްރޮސެކިއުޓަރ ޖެނަރަލް އޮފީހުން ނިންމުން ނިންމާފައިވާ ކަމަށާއި، އެ މައްސަލަ ބެލިއިރު، ޖިނާއީ ކަމަކަށް ގަބޫލުކުރެވޭ އެއްވެސް ކަމެއް ފާހަގަކުރެވިފައިނުވާ ކަމަށެވެ. އަދި ވިދާޅުވީ 25 މާޗްގައި ފިޔާޒު އަމިއްލައަށް ސެކިއުރިޓީ ބޭނުންނުވާ ކަމަށް ފުލުހުންނަށް އަންގާފައިވާ ކަމަށެވެ.
މީގެ އިތުރުން 2023 ވަނަ އަހަރުގެ ތެރޭގައި ވެސް ފިޔާޒަށް ލިބުނު އިންޒާރަކާ ގުޅިގެން އެސެސްމެންޓް ހެދުމަށްފަހު ސެކިއުރިޓީ ފޯރުކޮށްދީފައިވާ ކަމަށް މިނިސްޓަރު އިހުސާން ވިދާޅުވިއެވެ.
އެ އެލޫޓު ކުރައްވާ ސުވާލުގައި އެ ވިދާޅުވާ މައްސަލާގައި ޕްރޮސެކިއުޓަރ ޖެނަރަލް ވާނެ ނިންމެވުމެއް ނިންމަވާފައި. އެއީ އެމައްސަލަ ބެއްލެވިއިރުގައި އެ މައްސަލާގެ ތެރޭގައި ޖިނާއީ ކަމަކަށް ގަބޫލުކުރެވޭ އެއްވެސް ކަމެއް އޭގެ ތެރޭގައި ނެތް ވާހަކަ. އެހެންވުމާ ގުޅިގެން އޭގެ ތެރޭގައި ވެސް އަޅުގަނޑުމެންނަށް ވެސް ފާހަގަނުކުރެވޭ އެ ބާވަތުގެ އެއްވެސް ކަމެއް. އެހެންނަމަވެސް އަޅުގަނޑުމެން އޭގެކުރިން ހަމަ އެ ނޫސްވެރިޔާއަށް އެ މީގެ ކުރީގައި އެ އަޅުގަނޑު ހަނދާންވަނީ 2023 ވަނަ އަހަރުގައި ބިރު ދެއްކި މައްސަލައެއް އެ ނޫސްވެރިޔާއަށް އޮތް ތްރެޓެއް އެސެސްމަންޓެއް ހަދާފައި މިހާލަތުގައި އެނޫސްވެރިޔާގެ ބަޔާނެއްގައި މިކަހަލަ އެއްޗެއް ވިދާޅުވީމަ އަޅުގަނޑުމެންވާނެ ސެކިއުރިޓީ ފޯރުކޮށްދޭން ފަށާފައި.ހޯމް މިނިސްޓަރު އަލީ އިހުސާން
މިނިސްޓަރު އިހުސާންގެ މިވާހަކާތަކާ ގުޅިގެން އިތުރަށް މެންބަރު މީކާއީލް ވަނީ، ފުލުހުންގެ މުއައްސަސާގައި ތަހުގީގު ކުރަމުންދާ މައްސަލަތަކުގެ ތެރެއިން ސިޔާސީ ފަރާތްތަކާ ގުޅުންހުރި ފަރާތްތަކާ އާރާބާރު ހުރި ފަރާތްތަކުގެ އާއިލާތަކުގެ ތަހުގީގުތަކުގައި ރައީސުލްޖުމްހޫރިއްޔާ އަދި ސަރުކާރަށް ފުލުހުންނަށް ނުފޫޒު ނުފޯރުވޭކަން ކަށަވަރު ކުރަނީ ކިހައި މިންވަރަކަށްތޯ ސުވާލު ކުރައްވާފައެވެ.
މިސުވާލަށް މިނިސްޓަރު އިހުސާން ވިދާޅުވީ މީގެ ކުރިން ރާއްޖޭގައި ހިނގާދިޔަ ސަފާރީ ކޭސްގައި ކަން ހިނގާ ދިޔަ ގޮތަށް މިހާރު ކަންކަން ނުހިނގާނެ ކަމަށެވެ.
މިނިސްޓަރު އިހުސާން ވިދާޅުވީ، ފުލުހުންގެ އިދާރާއަށް ރައީސް މުއިއްޒު ވެސް، ދައުލަތުގެ އެއްވެސް ފަރާތަކުން ނުފޫޒު ނުފޯރުވާނެ ކަމަށާއި، އެއީ ކަށަވަރު ކުރެވިފައިވާ ކަމެއް ކަމަށެވެ. އަދި ފުލުހުން ބަލަމުންދާ މައްސަލައަކަށް ވެސް އިރުޝާދު ނުދޭނެ ކަމަށާއި، މިނިވަންކަމާއެކު އެ ތަހުގީގު ކުރިއަށް ގެންދިއުމުގެ ފުރިހަމަ ބާރު ލިބޭނެ ކަމަށް މިނިސްޓަރު އިހުސާން ވިދާޅުވިއެވެ.
