ފާއިތުވި 24 ގަޑިއިރުގެ ތެރޭގައި އިސްރާއީލުން ޣައްޒާގެ އެކި ހިސާބުތަކުގައި ދިން ހަމަލާތަކުގައި ފަލަސްތީނުގެ 26 މީހުން ޝަހީދުވެ، 60 މީހުން ޒަޚަމްވެފައިވާ ކަމަށް ޣައްޒާގެ ސިއްހަތާ ބެހޭ ވުޒާރާއިން ބުނެފިއެވެ.

ޓެލެގްރާމްގައި ޣައްޒާގެ ސިއްހަތާ ބެހޭ މިނިސްޓްރީން ނެރުނު ބަޔާނެއްގައި ބުނީ ހާލުގައި ޖެހުނު އެތައް ބަޔަކު ވެއްޓިފައިވާ އިމާރާތްތަކުގެ ދަށުގައި އަދި މަގުމަތީގައި އަދިވެސް އެބަތިބި ކަމަށާއި އެމްބިއުލާންސާއި ސިވިލް ޑިފެންސް އެހީތެރިންނަށް ވެސް އެ ސަރަހައްދަށް ނުދެވޭ ކަމަށެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި މިހާތަނަށް 51،266 މީހުން ޝަހީދުވެ، 116،991 މީހުން ޒަޚަމްވެފައިވާ ކަމަށް އެ މިނިސްޓްރީން ބުނެއެވެ. އިޒްރޭލުން މިދިޔަ މާޗް މަހުގެ 18 ވަނަ ދުވަހު ހަނގުރާމަ ހުއްޓާލުމާ ހިލާފުވި ފަހުން މިހާތަނަށް ޣައްޒާގައި ތިބި ފަލަސްތީނުގެ 1890 މީހުން ޝަހީދުކޮށް، 4،950 މީހުން ޒަޚަމްކޮށްލާފައިވާ ކަމަށް އެ ބަޔާނުގައި ވެ އެވެ.

އަލްޖަޒީރާގައި ރިޕޯޓްކޮށްފައިވާ ގޮތުން، ހޮސްޕިޓަލްތަކުގައި ފަރުވާ ނުދެވި އެތައް ބަޔަކު ވަނީ މަރުވެފައެވެ. ޚާން ޔޫނިސްގައި ފުރަތަމަ ޝަހީދުވީ މީހުން ދިރިއުޅޭ ގެއެއްގައި ބޮން ގޮއްވާލުމުގެ ސަބަބުން އަލިފާން ރޯވެ، އެމީހުންގެ ހަށިގަނޑު ދެނެނުގަނެވޭ ވަރަށް އަނދާފައިވެއެވެ.

މީގެ އިތުރުން އުތުރުގައި ދެ މިސައިލެއް ވަނީ ގެދޮރު ގެއްލިފައިވާ އާއިލާއެއް ދިރިއުޅޭ ޓެންޓަކަށް އަމާޒުކޮށްފައެވެ. އަދި މި ހަމަލާގައި ދެމަފިރިއަކާއި ތިން ކުދިން ޝަހީދުވެފައިވެއެވެ. އެ ސަރަހައްދުން މަދުވެގެން 10 މީހަކު ވަނީ ކައިރީގައި ހުރި ހޮސްޕިޓަލަކަށް ބަދަލުކޮށްފައިވާ ކަމަށް އަލްޖަޒީރާގައި ވަނީ ރިޕޯޓްކޮށްފައެވެ.

އަލްޖަޒިރާގައި ބުނެފައިވަނީ ހޮސްޕިޓަލަށް ގެންނަ ފަރާތްތަކަށް އެކަށީގެންވާ ފަރުވާއެއް ނުލިބޭ ކަމަށެވެ. އަދި އާންމުން ހޮސްޕިޓަލްތަކުގައި މަރުވަނީ ބޭހާއި ސާމާނު މަދުވެ، މެޑިކަލް ސްޓާފުންނަށް އަސާސީ ފަރުވާ ދިނުމަށް ނުކުޅެދެމުންނެވެ.