ބޯހިޔާވަހިކަމަށް ދޫކުރާ 'ހިޔާވަހި ފައިނޭންސިންގ ސްކީމަށް' ލޯނަށް, މާލޭ ސިޓީ ކައުންސިލްގެ ކުރެހުން ނެތަސް ހުށަހެޅޭ ގޮތަށް އުސޫލަށް ބަދަލު ގެނެސްފިއެވެ.

ގެދޮރު އަޅަން ބިން އޮވެ، މާލީ ތަނަވަސްކަން ނެތުމުގެ ސަބަބުން އިމާރާތް ނުކުރެވި ތިބި މީހުންނަށް ދޭ އެހީއެއްގެ ގޮތުގައި މި ސްކީމަށް ކުރިމަތިލާން ހުޅުވާލީ މިދިޔަ މާރިޗް މަހުގެ ތެރޭގަ އެވެ. އޭރު ނިންމާފައި އޮތީ، ލޯނަށް ކުރިމަތިލާއިރު ސިޓީ ކައުންސިލުން ފާސް ކުރާ ކުރެހުމެއް ހުށަހަޅަން ޖެހޭ ގޮތަށެވެ.

އެހެން ނަމަވެސް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ހޯމަ ދުވަހު ވިދާޅުވީ، އެ ސްކީމަށް ހުށަހެޅުމުގައި ފާސްކޮށްފައިވާ ކުރެހުމެއް ހުށަހަޅަން ކަނޑައަޅާފައި ވަނީ ބޭންކުތަކުން އެ ކުރެހުން ބޭނުންވާތީ ކަމަށެވެ.

ނަމަވެސް، އެ ސްކީމަށް ހުށަހަޅަން ބޭނުންވާ މީހުން މާލޭ ސިޓީ ކައުންސިލަށް ކުރެހުން ހުށަހަޅައިގެން ފާސްކުރުމަށް ގިނަ ވަގުތު ބޭނުންވާތީ ކައުންސިލްގެ ކުރެހުން ނެތަސް އިންޖިނިއަރާއި އާކިޓެކްޓް ސްޓޭމްޕް ކޮށްފައިވާ ކުރެހުމަކާއެކު ލޯނަށް ހުށަހެޅޭ ގޮތަށް އުސޫލަށް ބަދަލު ގެންނަން ނިންމާފައިވާ ކަމަށް މިނިސްޓަރު ވިދާޅުވެފައިވެއެވެ.

އަދި އިވެލުއޭޝަންގެ މަސައްކަތް ކުރިއަށްދާއިރު، ފާސްކުރި ލިޔުން ހުށަހެޅުމަށް ފުރުސަތު ދޭނެ ކަމަށް ވެސް މިނިސްޓަރ ވިދާޅުވިއެވެ.

ބޯހިޔާވަހިކަމަށް ދޫކުރާ ހިޔާވަހި ފައިނޭންސިންގ ސްކީމް އަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ.

އަދި ބޯހިޔާވަހިކަމަށް ގެދޮރު އިމާރާތްކުރުމަށް ފަސް ޕަސެންޓުގެ އިންޓަރެސްޓަށް ވުރެ ބޮޑު ނޫން އިންޓަރެސްޓު ރޭޓުގައި ލޯނު ދިނުމަށް އެ ސްކީމް އިފުތިތާހުކުރީ މިދިޔަ އަހަރުގެ ނޮވެމްބަރު މަހުގެ ފަސްވަނަ ދުވަހު އެވެ.

މި ސްކީމްގެ ދަށުން ލޯނު ދޫކުރުމަށް މިއަހަރުގެ ބަޖެޓުގައި އެއް ބިލިއަން ރުފިޔާ ޚާއްސަކޮށްފައިވާއިރު، މި ލޯނަށް ކުރިމަތިލުމުގެ ފުރުސަތު މި މަހުގެ ނިޔަލަށް ހަމަވާނެ އެވެ.